1 Ń b'a fe xa men fo, wo mu ɲin ne ti xo: Xa ketabaxo dindinma tu, faranfansi si nte a nin jonŋo te, haali x'a tara a mu a fa la fenŋo bee tigo le ti. 2 X'a dindinma tu, a be korosibaxolu nin kuɲabobaxolu bulu, fo xa taxa si a fa la waxati lategeninŋo ma. 3 Wo be ɲa men, n du tunnu be le í xo dindinŋolu. N tunnu be ɲin duniya in fenŋolu la jonɲafango xoto. 4 Bari waxato dafaninma, Ala x'a Dinxe ki xa na: Muso x'a bange, a bulata sariya xoto, 5 walasa a xa sariya xotomoxolu kunbo, xa n ke Ala dinŋolu ti. 6 Alu keta Ala dinŋolu ti, wo xanma, Ala x'a Dinxe Niyo ki, nin wo mu Ni Senunŋo ti, a xa na sigi n jusukunŋolu la. Wo Niyo be fetenna xo: «Aba!» Wo xoto xo: «Baaba!» 7 Wo to, í nte jon ti tugun, bari Ala dinŋo. Nin í mu a dinŋo ti, awa í mu a ketabaxo du ti, ate Ala barako to. 8 Folofolo, alu tunnu man Ala lon tumo men, alu tunnu mu bolibatuta dolu la jonŋolu ti. Wolu nte bolibatuta soobelu ti. 9 Bari saasa alu xa Ala lon. Walla ń s'a fo xo Ala x'atelu lon. Alu s'i koppa no duniya la wo fen gansanŋolu nin wo batarafenŋolu ma ɲa di tugun? Alu si ke a fe xa dun wolu la jonɲa la ɲa di tugun? 10 Alu be lunŋo dolu nin xaro dolu nin waxato dolu nin sanŋo dolu jaatela xa tanbi dolu xan. 11 Alu la kuwo hanmo be nte la. A fo nte xa baaro fen fen ke alu ɲen, wo bee si ke fuwo ti? 12 Ń badinŋolu, ń be alu matarala, alu ke í xo nte be ɲa men, bawo nte xa ń fan ke í xo atelu be ɲa men. Alu man jaxuman fusi lasi nte ma. 13 Alu hakilo b'a la, ń sinɲa folo xa xibaru Dimanŋo fo alu ɲen, wo keta x'a la kunŋo men xan: Alu x'a lon xo jangaro le xa wo ke. 14 Haali x'a tara nte la jangaro tun mu atelu xotoboli kuba ti, wo bee xan alu man nte doxoya walla xa ɲaxun ń to; bari alu xa nte tomuta í xo Ala la melekiyo do, walla Isa Kirisita fan. 15 Alu tunnu sewoninba le mu! Mun dun nata alu ma? Ń si alu seedeya ɲin na xo: Haali nin wo tun si ke no, alu tunnu si son x'alu fannu ɲakesolu bo, x'e di nte ma. 16 Nte xa tonɲa men fo alu ɲen, wo le x'a tu nte keta alu jaxo ti bi ba? 17 Alu la kuwo xa di wo moxo dolu ɲen; bari i ŋanneya man ɲin. I be men nofe, wo mu le x'alu kunbo nte la, walasa alu x'e balan itelu la kuwo to. 18 Balanŋo ken xa ɲin ku ɲuma nofe tuma bee, wo xana ke nin nte be alu bata tumo men doron. 19 Nte la dindinŋolu, nte be tooroba xono tugun alu la kuwo koso, í xo musu tinto, fo Isa Kirisita xa basigi alu xono. 20 A xa di bete nte ɲen, xa ke alu bata saasa; walasa nte xa ń xumaɲa mayelema. Nte man a lon ń si men ke alu la kuwo to. 21 Atelu mennu b'a fe xa sariya labatu, nte xo sariya be men fola, alu man wo me ba? 22 A be safenin Kitaabo to xo Burehima xa din fula soto. Do mu a la jonmuso dinŋo ti, nin wo mu Agare ti. Do mu a la hooromuso dinŋo ti, nin wo mu Saran ti. 23 Jonmuso dinŋo bangeta x'a la hadamadinŋo sago xan. Bari hooromuso ta bangeta x'a la Ala la lahidu taninŋo xan. 24 Xoto xote be ɲin ku in na. Wo musu fulo mu Kafuxan fula le taagumanseedo ti. Kafuxanŋo men tata Turusinna kuro xan, Agare be wo le yitala. Ate be dinŋolu wulula jonɲa xanma. 25 Agare mu Turusinna kuro le ti, men be Arabu jamano to. Wo si xaaɲan Yerusaleme saasandinma ma, bawo ate nin a dinŋolu be jonɲa xono bi. 26 Bari Yerusaleme kuto, men be sanŋo to, wo be hooroya xono, wo le mu alan ntelu na ti. 27 Bawo Kitaabo b'a fola xo: «Muso, ite men tun man din soto, ɲaxali. Ɲaxalixanŋo labo, ite men man tinŋo tooro lon; bawo muso men kilin tuta a danna, wo dinŋo si siya xa tanbi musu xetigo ta xan.» 28 Ń badinŋolu, atelu kennu mu dinŋolu ti, mennu wuluta x'a la Ala la lahido xan, í xo Nsiyaxa keta Ala la lahido dinŋo ti ɲa men. 29 Xotonin, dinŋo men wuluta x'a la hadamadinŋo sago xan, wo xa dinŋo jaxuya, men wuluta Ala Ni Senunŋo sago la. Wo keta ɲa men, a be kela ten bi du. 30 Bari Kitaabo xo di? A xo: «Ɲin jonmusu in xoyi, a nin a dinxe; bawo jonmuso dinxe nin hooromuso dinxe man xan xa kafu ke la.» 31 Wo le x'a tu, ń badinŋolu, alan nte jonmuso dinnu ti, n mu hooromuso dinŋo lelu ti.
