GALASINGOLU 3

1He Galasinga hakilintanŋolu! Jontigi le x'alu kunnafili ten? Isa Kirisita la saya gengenyiro xan, wo dun yitata le alu la de x'a xoyiya! 2Nte b'a fe alu xa ɲin ŋininxali kilin in ne jaabi xo: Alu xa Ni Senunŋo soto sariya silo taxamo le to ba, walla alu x'a soto bawo alu xa xibaru Dimanŋo lame xa la a la? 3Alu dunnu keta hakilintanŋolu ti ten ɲa di? Alu xa kuwo men damuta Ni Senunŋo barako to, saasa alu b'a fe xa wo laban alu fannu barako la ba? 4Kuba mennu yitata alu la, wolu keta fuwo ti ba? Abada! Wolu me ke no fu ti. 5Nin Ala b'a Ni Senunŋo dila alu ma, xa kawakuwolu yita alu la, a be wo kela ba xo bawo alu be sariya la folu dafala, walla a b'a kela bawo alu be Xibaru Dimanŋo lamela xa la a la? 6Wo ɲa ma, Kitaabo b'a fola Burehima la kuwo to xo: «A lata Ala la, wo xanma Ala x'a jaate moxo tilinninŋo ti.» 7Alu a faamu xo mennu xa lannaya ke, wo lelu mu Burehima bonson soobelu ti. 8Kitaabo folota x'a fo xo Ala be nala siya tolu jaatela moxo tilinninŋolu ti i la lannaya le sabaabo la. Wo le x'a tu, a folota xa ɲin xibaru diman in fo Burehima ɲen xo: «Siyalu bee si Ala la duwawo soto ite le sabaabo la.» 9Burehima xa lannaya ke, a xa Ala la duwawo soto. Wo ɲa ma, moxo wo moxo be lannaya kela, wolu si Ala la duwawo soto í xo ate. 10Awa, moxo mennu la jaate to, xo xa kila Musa la sariya silo taxama, wo si a tu xo Ala s'i jaate moxo tilinninŋolu ti, wolu bee be dango xono; bawo Kitaabo x'a fo xo: «Fen wo fen safeta sariya Kitaabo xono, moxo wo moxo nte wo bee kela, wo tigo be danganin.» 11Awa, a xoyiyaninŋo le fan mu, xo moxo si me jaate moxo tilinninŋo ti Ala bulu sariya barako to; bawo a be safenin Kitaabo to xo: «Moxo men xa tilinninɲa soto lannaya fe, wo si nilamaya.» 12Musa la sariya ken nin lannaya nte dennin i ɲoxo la. Bawo a be safenin xo: «Men je sariya la folu latimme, wo si nilamaya wolu fe.» 13Kirisita xa n kunbo sariya la dangalo ma. Ate fan dangata ntelu no to, bawo a be safenin Kitaabo to xo: «Moxo men je den yiro la, x'a faxa, wo dangata.» 14A keta ten, walasa Burehima xa duwawo men soto, wo xa di siya to dulu ma, Isa Kirisita barako to. A keta ten du, walasa Ni Senunŋo men lahido tata, n xa wo soto lannaya xanma. 15Ń badinŋolu, ń be nala misaalo do dila alu ma, moxolu be men ɲoxon kexan. Nin moxo do xa safe ke jannin a xa sa, safe men b'a yitala a ke xa xan xa tala ɲa men, nin wo keta a ɲa ma, moxo si me a tiɲa no, walla xa do kafu a ma. 16Ala x'a la lahidolu ta Burehima nin a bonsonŋo ɲen. Kitaabo man don fo xo: «anin a bonsonŋolu», a be í xo nin bonson kiika le mu. Kitaabo xo le: «anin í bonsonŋo». Wo xoto xo moxo kilin ne mu, nin wo mu Kirisita ti. 17Ń b'a fe xa men fo, wo mu ɲin ne ti xo: Ala tun xa Kafuxanŋo do dara folo, men me wuli. Sariya men nata sanji keme naani nin tan saba xofe, wo me wo tiɲa no, xa Ala la lahido bo a ma. 18Awa, Ala be fenŋo men dila ke ti, nin wo be dennin sariya le la, wo to a nte dennin lahido la tugun. Bari Ala x'a la ɲumaya ke Burehima ɲen, x'a la lahido le xan. 19Sariya dikunŋo dun mu mun ti? A kafuta lahido ma le, walasa kebaaro mennu man di Ala ɲen, xa wolu yita n na, fo Burehima bonsonŋo xa na, lahido tata wo men ɲen. Melekiyo lelu xa wo sariya lasi, xa moxo do ke a lasibaxo ti moxolu ma. 20Wo lasibaxo ken nte lasibaxo ti moxo kilin ɲen, x'a tara Ala dun mu kilinpe le ti. 21Wo xoto mu ba xo Musa la sariya be Ala la lahidolu soosola? Abada! A nte i soosola. Nin sariya do tun dita, men si nilamaya soobe di no moxolu ma, wo to, moxolu tunnu si jaate no moxo tilinninŋolu ti Ala ɲa xoto, wo sariya sabaabo la. 22Bari Kitaabo b'a fola xo duniya muume bee be junubo fango xoto, walasa Ala xa nilifenŋo men lahido ta, wo xa di lannayabaxolu ma, i la lannaya xanma, Isa Kirisita la. 23Jannin lannaya waxato tun xa na, sariya tun be n maranin, fo xa si lannaya yitalunŋo ma. 24Wo ɲa ma, sariya keta n korosibaxo ti, jannin Kirisita xa na; walasa n xa jaate moxo tilinninŋolu ti Ala ɲa xoto, lannaya barako to. 25Awa, lannaya la waxato naninma, wo korosibaxo la la nte n xan tugun. 26Katugu alu bee keta Ala dinŋolu ti lannaya le xanma, Isa Kirisita la kafuɲoxoya xono. 27Wo to, atelu mennu bee batiseta Isa Kirisita la kafuɲoxoya xono, alu xa Kirisita jigolu dun alu to í xo alu xannadoroko. 28Wo le x'a tu saasa, Yahudiya wo, siya tolu wo, jon ne wo, hooro le wo, xe wo, musu wo, faranfansi nte wolu te tugun, bawo alu bee mu kilin ne ti, Isa Kirisita la kafuɲoxoya xono. 29Nin alu mu Kirisita talu ti, wo to, alu mu Burehima bonsonŋo ti. Awa, Ala xa ke men lahido ta, alu si wo soto.

will be added

X\