GALASINGOLU 2

1San tan nin naani tanbo xo, ń saagita taxanin Yerusaleme, ń nin Baranabasi. Ń nin Tite du taxata. 2Ń taxata, bawo Ala tun x'a yita ń na xo ń xa xan xa taxa. Ń taxaninma je, ń be xibaru Dimanŋo men ma x'a waaju siya tolu ɲen, ń xa wo ɲa fo lannayabaxolu la ɲamoxolu ɲen i danna. Ń tun nte a fe ń xa baaro men ke, anin ń be nala men kela, xo wo xa ke fuwo ti. 3Awa, nte taxamaɲoxo Tite men tun mu Gereko ti, wo la ɲaxo man ke waajibi ti; 4haali x'a tara badin fanolu mennu x'e soli xa dun n to, wolu tunnu x'a la ɲaxo waajibiya. Wolu x'e soli xa dun n to, xa na n nasaxa, walasa n xa hooroya men soto Isa Kirisita la kafuɲoxoya xanma, i xa wo tiɲa, xa n bula sariya la jonɲa xono tugun. 5Bari haali waxatindin kilin, n man i lame, xa son i ta ma; walasa Xibaru Dimanŋo men mu tonɲa ti, wo yelemabalo xa tu alu bulu. 6Bari moxo mennu jaateta ɲamoxolu ti, i tunnu mu men ti, nte la jaate tun nte wo xan, bawo Ala nte kiito tegela kuwolu jeɲa gansanŋo ma. Nte be Xibaru Dimanŋo men waajuxan, wo moxolu man fusi kafu wo ma. 7Bari i fannu x'a je xo Ala xa don baaro xarifa nte ma, xa Xibaru Dimanŋo fo siya tolu ɲen, í xo a xa wo baara kilinŋo xarifa Piyere ma ɲa men Yahudiyalu to. 8Awa Ala xa Piyere ke Yahudiyalu la kiladinŋo ti ɲa men, a xa nte du ke siya tolu la kiladinŋo ti ten. 9Yaxuba nin Piyere nin Yaya men tunnu be jaatenin Ala la jama tulumalu ti, wolu x'a lon xo Ala xa wo baaro xarifa nte ma. Wo xanma, i x'e bulo dun nte nin Baranabasi bulu, x'a yita wo fe xo i nin n keta kilin ti. Wo to, n bee benta a to xo ntelu xa taxa baaro ke siya tolu to, itelu xa taxa baaro ke Yahudiyalu to. 10I xo n ɲen doron xo n x'e hakilo tu i la jama lannayabaxa segebaxantunŋolu la. Nte du xa ń jija xa wo ke. 11Bari Piyere nata Antiyosi tumo men, ń x'a sooso jama bee ɲala, bawo jalago tun b'a ma. 12Moxo dolu tunnu bota Yaxuba bata xa taxa non. Jannin wo moxo tunnu xa na Antiyosi, Piyere nin siya tolu lannayabaxolu tunnu be domolo kela. Bari wo moxolu naninma, a x'é soobo wo siya tolu la, a nin i man kafu domolo ma tugun, bawo Yahudiya lannayabaxo men tunnu b'a fe xo siya tolu xa ɲaxa, a silata wolu ɲa. 13Badin Yahudiya tolu dulu x'a la fulankafuya ɲoxon ke, fo i xa Baranabasi du ladun i la fulankafuya xono. 14Ń x'a je tumo men xo i bosilo nte tilinnin, a nte lanin xibaru Dimanŋo la tonɲa foninŋo xan, ń xo Piyere ɲen bee ɲala xo: «Ite men mu Yahudiya ti, í xa siya tolu moxolu bosilo ta, xa Yahudiyalu bosilo bula. Awa, í si siya tolu diyakuwa no ɲa di xo i x'e taxama í xo Yahudiyalu?» 15Tonɲa le mu ntelu mu Yahudiya yeerewuluwo lelu ti, n nte siya xote moxolu ti, mennu kilita xo junubekelalu. 16Bari wo bee nin a ta, n x'a lon xo moxo si me jaate moxo tilinninŋo ti Ala bulu Musa la sariya silo taxamo xanma, fo í xa lannaya le ke Isa Kirisita la. Wo le x'a tu, n dulu lata Isa Kirisita la, walasa n xa jaate moxo tilinninŋolu ti Ala bulu, n na lannaya xanma. Wo xana ke sariya no ti, bawo moxo si me jaate tilinninŋo ti Ala bulu, sariya silo taxamo xanma. 17Awa, xa n tu tilinninɲa ŋininna Ala ɲa xoto, Isa Kirisita barako to, nin a tarata xo n dulu mu junubekelalu ti í xo siya tolu, wo xoto mu don ti ba xo Kirisita mu junubo la baarakela ti? Abada! 18Nte fan xa men totiɲa, nin nte fan saagita wo todaranin, wo tumo la, nte fan ne keta sariya tiɲabaxo ti. 19Men mu Musa la sariya dappo ti, nte be le í xo moxo saninŋo, ń nin sariya fatata. Sariya fan ne keta wo saya sabaabo ti, walasa nte xa nilamaya Ala ɲen. Nte nin Kirisita gengenta i ɲoxo fe, xa sa. 20Wo ɲa ma, nte nte ń nila tugun, Kirisita le be í nila nte to. Bawo nte be nilamaya men xono saasa, ń be wo kela lannaya le to, Ala Dinxe la. Ate le xa ń xanu, fo a x'a niyo di xa ke sadaxo ti nte ɲen. 21Nte nte ń banna Ala la neemo to. Nin moxo tun si jaate moxo tilinninŋo ti Ala bulu, Musa la sariya silo taxamo le fe, wo to a be í xo Kirisita sata fu le.

will be added

X\