GALASINGOLU 1

1Ɲin safe in bota nte Poli le la, nte men keta kiladinŋo ti. Wo kiladinɲa man bo moxolu to, moxo sabaabu du la nte; bari Isa Kirisita le x'a ke anin Fa Ala, wo men x'a lakuni xa bo furelu to. 2Badin lannayabaxo mennu bee be jan, wolu nin nte be ɲin safe in kila Galasi maro Ala la jamalu ma. 3N Fa Ala, anin Marigi Isa Kirisita xa neemo nin heero ke alu ɲen. 4Isa Kirisita x'a fan di xa ke sadaxo ti n na junubolu koso, walasa n xa bo ɲin duniya in ku jaxo bee bulu, x'a la n Fa Ala sago xan. 5Nooro xa la n Fa Ala xan fo abada. Amiini! 6Ń badinŋolu, Ala men x'alu kili Kirisita la neemo barako to, alu xa i xodi wo la ɲa men tariya, xa i ɲadi xibaru diman xote la, wo xa nte dabaro ban de. 7A xoto nte xo xibaru diman xote be je; bari moxo do lelu be alu hakilo ɲaxamila, mennu b'a fe xa Kirisita la xibaru Dimanŋo yelema. 8Bari haali nin ntelu fannu, walla sanxulo melekiyo do le nata xibaru diman xote fo alu ɲen, men nin n na folo foninŋo nte kilin ti, a tigo xa danga! 9Ń x'a fo alu ɲen xa ban, ń be saagila a ma alu ɲen tugun xo, nin do xa xibaru diman xote fo alu ɲen, alu sonta men ma, men nte wo ti, a tigo xa danga! 10Awa saasa, nte b'a fe xa ń fan kudiya moxolu ɲen ba? Ayi, ń b'a fe xa ń fan kudiya Ala le ɲen. Nte b'a fe xa ń fan maadiya moxolu ma ba? Ayi! Nin ń tun b'a fe xa ń fan maadiya moxolu ma, ń tun me ke Kirisita la jonŋo ti. 11Ń badinŋolu, ń b'a fola alu ɲen xo, nte xa xibaru Dimanŋo men fo alu ɲen, wo man bo moxolu la. 12Ń man a soto moxo la, moxo du man ń xaran a la, bari Isa Kirisita le x'a yita ń na. 13Folofolo, nte tun be ɲa men Yahudiyalu la diino to, alu fannu xa wo lon. Alu x'a lon du ń xa Ala la jama tooro jaxu ɲa men, xa ń balan fo ń s'a tiɲa. 14Yahudiyalu to, nte xa ń fulan kiika dan Yahudiyalu la diino to. Nte tun be balannin n na moxobalu la laadolu to xa tanbi wolu xan. 15Bari Ala x'é tu a la ɲumaya xono xa ń sugandi jannin haali nte xa wulu, xa ń kili a la baaro xanma. A diyata a ɲen tumo men x'a Dinxe yita nte la, walasa ń xa taxa a la Xibaru Dimanŋo fo siya tolu ɲen, nte man taxa moxo si ŋininxa. 17Men dulu keta kiladinŋo ti nte ɲa, ń man taxa Yerusaleme xa taxa wolu ŋininxa. Bari wo no bee to, nte taxata Arabu jamano to, wo xo, ń xa ń koppa xa na Damasi gallo to. 18San saba xo le mu, nin ń taxata Yerusaleme walasa ń nin Piyere x'e ɲoxo lon. Ń tuta a bata loxokun fula xono. 19Nte ɲa man la kiladin xote xan nin Marigi doxoxe Yaxuba kilin doron nte. 20Nte be men safela x'a ki alu ma ten, wo mu tonɲa le ti. Ala mu ń seede ti, xo wo nte faniya ti. 21Wo xo, ń taxata Siri nin Silisi jamanolu to. 22Bari Kirisita la jamalu mennu be Yude maro xono, wolu tunnu man nte je folo xa ń lon. 23I tunnu b'a mela doron xo: «Men tun x'a lo n nofe xa n tooro, fo a si lannaya tiɲa, wo be lannaya silo waajula saasa.» 24I tunnu be barako bulaxan Ala ɲen, nte la kuwo xanma.

will be added

X\