EFESINGOLU 5

1Awa, x'a la a xan alu mu Ala dinŋolu ti, a be mennu xanunin, alu ke a ladigibaxolu ti. 2Alu xanuya yita alu la nilamaya xono, í xo Kirisita xa n xanu ɲa men, fo a x'a niyo di n nofe, xa ke nilifenŋo nin sadaxo ti, men diyata Ala ɲen. 3Alu keta Ala la moxolu ti; wo xanma a man xan jadoya nin kunoxoninko, anin wasabaliya ɲa wo ɲa xa haali me alu dappo to. 4Malibaliya xumolu nin xuma kuntanŋolu walla xuma noxoninŋo dulu man xan xa me alu da. Alu xa xan xa men ke, wo mu barakelalo le ti Ala ɲen. 5Alu xa xan x'a lon, sikka nte a to xo: Jadolu nin moxo noxoninŋolu, anin wasabalolu, wo mennu mu bolibatulalu ti, wolu si me nidula soto Kirisita nin Ala la Mansaya xono abada. 6Alu xana a tu moxolu x'alu lafili xuma fuwolu la. Wo ɲoxon junube lelu b'a tula nin Ala la diminŋo be boyila a soosobaxolu to. 7Wo to, alu nin wo moxolu xana kafu fusi la. 8Folofolo, alu tunnu mu dibo le ti, bari saasa, alu mu keneya le ti, bawo alu nin Marigi kafuta. Wo to, alu i taxama í xo moxo mennu be keneya la. 9Awa, keneya ken be ɲumaya nin tilinninɲa nin tonɲa le bangela. 10Alu i balan xa Marigi diyanɲo mategeninŋo lon. 11Kuwo mennu be kela dibo to, nin nafa nte i la, alu sin xana dun wolu to. Alu xuma i xan ne fan, x'a yita xo i man ɲin. 12Moxo dolu be kuwo mennu kela dibo to, maluya be wolu tofolo fan na. 13Ku wo ku je yita xo a man ɲin, wo bulata keneya la. 14Fen fen du bulata keneya la, wo keta keneya ti. Wo le x'a tu, a fota xo: «Ite men be sinnoxola, kuni. Kuni xa bo furelu to, Kirisita si keneya bo í ɲen.» 15Wo to, alu i korosi alu bosilolu to. Alu xana i taxama í xo hakilintanŋolu, bari alu i taxama í xo hakilimalu. 16Alu waxato tomuta bete, bawo bi lunŋolu xa jaxu. 17Wo to, alu xana ke hakilintanŋolu ti, bari alu i balan xa Marigi sago lon. 18Alu xana i fa dolo la; wo si alu bula kukuntanko le la. Bari alu a tu Ni Senunŋo x'alu fa. 19Alu i ɲoxo jusudun Jaburu donkilolu nin tantuli donkilolu nin Alabunɲa donkilolu la. Alu donkilo la xa Marigi tantu alu jusukunŋo bee la. 20Alu barako bula n Fa Ala ɲen tuma bee, anin kuwo bee to, n Marigi Isa Kirisita toxo la. 21Alu xulu i ɲoxo ɲen, Kirisita ɲasilanɲa xanma. 22Musolu, alu xulu alu xelu ɲen í xo alu be xulunin Marigi ɲen ɲa men. 23Bawo, xe le mu a musu kuntigo ti, í xo Kirisita mu Ala la jama kuntigo ti ɲa men. Kirisita le mu Ala la jama Kisibaxo ti, nin wo mu a balo ti. 24Wo xanma, musolu xa xan xa xulu i xelu ɲen kuwo bee to, í xo Ala la jama be xulunin Kirisita ɲen ɲa men. 25Xelu, alu dulu x'alu musulu xanu í xo Kirisita xa Ala la jama xanu ɲa men, fo a x'a fan niyo di a nofe. 26A keta a fe wo ɲa ma Ala la jama xa ke Ala ta ti, tumo men a x'a senuya jiyo nin Ala la xumo la. 27Katugala a diyata a ɲen xa Ala la jama lalo a fan ɲa xoto, a nooroma, a matakkibalo, a moromorobalo, anin a fentanŋo. A diyata a ɲen a xa ke senumanŋo nin jalagibalo ti. 28Wo ɲa ma, xe xa xan x'a musu xanu í xo a fan balo. Xe men be a musu xanula, wo be a fan ne xanula. 29Awa moxo bada man í ban a fan balo to; bari a si a balu, x'a topoto, í xo Kirisita be Ala la jama topotola ɲa men, 30nin wo mu a balo ti, n bee mu men dula do ti. 31Kitaabo x'a fo xo: «Wo le xanma, xeba si a na nin a fa bula x'é noto a musu la; i fulo si ke kilin ti.» 32Gulleba le mu ɲin ti. Nte b'a fola xo Kirisita nin Ala la jama te kuwo le mu le wo ti. 33Wo bee nin a ta, bee kilin kilin x'é musu xanu í xo í fan. Muso du x'a xe bunɲa.

will be added

X\