EFESINGOLU 4

1Nte men be kaso la Marigi la kuwo xanma, ń b'a xoleyala alu ma, xo Ala x'alu kili men xanma, alu i taxama xa ben wo ma. 2Alu i majigi xa sabari xa muɲa. Alu muɲa i ɲoxo xoto xanuya to. 3Ni Senunŋo x'alu ke kilin ti xa benŋo ke alu te, alu i balan wo benŋo xa tu alu nin i ɲoxo te. 4Bala kilin ne be je; anin Ni Senun kilin, í xo gigi kilin be je ɲa men, alu kilita men xanma. 5Marigi kilin ne be je, anin lannaya kilin, anin batiseli kilin. 6Ala kilin ne be je, n bee Fa, men be n bee kunna, men be baaro la n bee to, anin men be n bee jusukunŋo la. 7Ala x'a la neemo do xarifa n bee ma, x'a la Kirisita la solifen sumanninŋo xan. 8Wo le x'a tu, a safeta Ala la Kitaabo xono xo: «A yeleto sanŋo to, a nin kasolamoxo kiika taxata; a xa fenŋolu di moxolu ma fu.» 9X'a fo xo: «A yeleta», wo xoto mu mun ti? Wo xoto mu le xo a tun jigita folo, fo duguxulo dula jigininŋolu. 10Men jigita, wo le du yeleta fo sanxulo dulalu bee sanŋo to, walasa a xa duniya bee fa. 11Ate le xa solifen mategeninŋolu di moxolu ma. A xa dolu ke kiladinŋolu ti, xa dolu ke kilalu ti, xa dolu ke xibaru Dimanŋo waajubaxolu ti, xa dolu ke lannayabaxolu negaanibaxolu ti, xa dolu ke karanmoxolu ti. 12A xa wo bee ke, walasa xa senumanŋolu toben Ala la baaro xanma, nin Kirisita balo, wo xoto Ala la jama, wo si taxa ɲa lannaya to ɲa men. 13Nin wo keta, n bee kafuninŋo si ke kilin ti lannaya to, anin Ala Dinxe lonŋo to. N si ke lannayabaxa moninŋolu nin moxo dafaninŋolu ti, í xo ate Kirisita be dafanin ɲa men. 14Wo ɲa ma, n me ke í xo dindin bitugun, xa tu í fillifallala, xa taxa diina silo sifa bee woyo fe, moxolu la lafililo koso. Wo moxolu be kewuya le kela xa moxo tolu lafili. 15Bari xa n tu tonɲa fola xanuya to; n si bunɲa lannaya to ɲa bee do ma, fo xa ke í xo Kirisita, ate men mu Ala la jama kunŋo ti. 16Ate le barako to, nin balo bee mu kilin ti, men dulalu bee be i ɲoxo mutaninbete a xulukunnafasolu la. Wo to, nin wo balo dulalu bee kilin kilin be a la baaro kela a ɲa ma, balo muume si bunɲa xa taxa ɲa xanuya to. 17Awa ń badinŋolu, saasa ń be nala men xoleyala alu ma, Marigi koso, wo mu le xo: Atelu lannayabaxolu kukeɲa man xan xa ke í xo siya tolu mennu man Ala lon; wolu be i taxamala hakilintanɲa xono. 18I be i miirila í xo dibitomoxolu. Ala be nilamaya kuto men dila, i luntanŋo le be wo to i la kulonbaliya koso, i la sondonme xoleya xa men sabaabu. 19Maluya kese kilin nte i la. I xa i fannu ladi jadoya ma, xa son xa ku noxonin sifa bee do ke, dansigi nte men na. 20Bari atelu xa men xaran Isa Kirisita la kuwo to, wo nte wo kuwolu ɲoxonnu ti de! 21Sikka nte a to, men be Isa la kuwo to, alu xa wo bee me; anin alu xaranta a la tonɲa ma. 22Wo to, alu tunnu be i taxamala ɲa men ma folofolo, alu wo dabula. Alu moxo xoto nego lelu be moxo lafilila, xa halagilo lasi a ma. 23Wo xanma, alu a tu alu hakilolu nin alu miirolu bee xa yelema xa ke kuto ti. 24Alu moxo kuto jigolu ta, wo men data Ala mununŋo la. Wo mu le xa í taxama tilinninɲa nin senuya xono, tonɲa xa mennu bange. 25Wo le x'a tu, alu faniya dabula, xa tonɲa fo i ɲoxo ɲen, bawo n bee kafunin mu bala kilin dula lelu ti. 26Nin alu diminta, alu i korosi alu xana junube ke. Tilo xana boyi x'alu diminninŋo tara. 27Alu xana a tu Sentane xa ɲa si soto alu xan. 28Nin men tun be suuɲalo kela, wo xa suuɲalo dabula, bari a xa baaro ke a bulu fulo la, x'a baluwo soto tilinŋo to, anin xa fen soto xa segebaxantunŋolu deema. 29Xuma jaxu si xana bo alu da, fo xuma ɲumalu, mennu si moxo do maakuwo ɲiɲa, xa do kafu moxo xotelu barako ma, walasa a xa neemo ke alu lamebaxolu ɲen. 30Alu xana Ni Senunŋo juso xasi, wo men mu Ala la taagumanseedo ti alu la, xo lunŋo si na, Ala si alu kunbo pewu. 31Alu miiriya jaxo, nin juso, nin diminŋo, nin sonxo, nin nanilo, nin jaxuya sifa bee xoyi x'e soobo alu la. 32Alu ɲuma ke i ɲoxo ɲen, xa hinna, xa yaafa i ɲoxo ma, í xo Ala yaafata alu ma Kirisita koso ɲa men.

will be added

X\