EFESINGOLU 3

1Wo xanma, nte Poli be Ala matarala alu ɲen. Nte keta kasolamoxo ti Isa Kirisita toxo nofe, bawo ń be xibaru Dimanŋo fola atelu siya tolu ɲen. 2Ala la ɲumaya xono, a xa baaro men xarifa nte ma, xo ń x'a ke alu ɲen, sikka nte a to alu xa wo me. 3Ala x'a la gallo yita nte la. Ń birin wo le safela xumakese dantalu la. 4Nin alu x'e xaran, alu si a lon ń xa lonŋo soto ɲa men Kirisita la gullo xan. 5Waxato mennu tanbita, wo gullo man yita hadamadinŋolu la; bari saasa, Ala x'a yita a la senumanŋolu la, nin wo mu a la kiladinŋolu nin a la kilalu ti, Ni Senunŋo barako to. 6Wo gullo fele xo: Xibaru Dimanŋo barako to, Ala be heero men kela a la moxolu ɲen, Yahudiyalu nin siya tolu bee xa xan wo to. I bee keta í xo bala kilinŋo dulalu. I bee xa xan du Ala la lahidu taninŋo to, Isa Kirisita kafuɲoxoya xono. 7Nte keta Ala la baaradinŋo ti a la neema dinmaninŋo xanma, xa ń bula Xibaru Dimanŋo fola moxolu ɲen. A xa wo ke ten a la sintigiya to. 8Nte men mu Ala la moxo senumanŋolu bee to doxomandinŋo ti, Ala xa don neemo ke nte ɲen, xa Xibaru Dimanŋo lasi siya tolu ma, nin wo mu Kirisita la naafulu banbalo ti. 9Ń xa xan x'a xoyiya hadamadinŋo bee ɲen, Ala b'a la gullo labaarala ɲa men. Ate Ala men mu fenŋo bee dabaxo ti, a tun xa wo kuwo tu duguwo to kabirin duniya man da. 10A xa wo ke walasa Ala la jama fe; kuntigiyalu nin fangolu mennu be sanŋo to, wolu xa Ala la hakilitigiya ɲasifa bee lon. 11Ala tun xa kuwo men natege kabirin abada, a xa wo ke, n Marigi Isa Kirisita barako to. 12N nin Kirisita la kafuɲoxoya xanma, anin n na lannaya koso ate la, n si fatiya no x'e sodun Ala la, n hakilo lasigininŋo. 13Wo xanma, ń b'a ŋininna alu fe xo, nte be tooro mennu xono alu nofe, wo xana alu juso doxoya. Wo mu alu kunxotota kunŋo le ti. 14Wo xanma, ń be ɲongila Fa Ala xoto, 15dinbayalu bee sabaabubaxo, sanŋo to anin duguxulo xan. 16Ń b'a tarala xo a x'a ke a la nooro danjebalo xanma, a xa barako dun alu jusukunŋo to, a Ni Senunŋo la sintigiya fe. 17Ń b'a tarala du xo Kirisita xa sigi alu jusukunŋolu la lannaya fe; anin alu xa lillidun, xa sinsin xanuya to; 18walasa alu nin Ala la senumanŋolu bee xa sin xa Kirisita la xanuya xono nin a lo nin a janɲa nin a jironɲa lonŋo soto. 19Ń b'a tarala xo alu xa Kirisita la xanuya lon, wo men xa bun xa tanbi lonŋo bee xan; walasa alu xa fa Ala la dafaninɲa bee la. 20Ala men si sin no xa fen bee ke, xa tanbi n na taralolu nin n miirolu xan, a la sintigiya fe, men be baaro la n jusukunŋo la; 21tanto b'a ɲen Ala la jama xono, anin Isa Kirisita kafuɲoxoya xono, tuma bee, fo abada. Amiini.

will be added

X\