EFESINGOLU 1

1Nte Poli le xa ɲin safe in ke, nte men mu Isa Kirisita la kiladinŋo ti, x'a la Ala sago xan. Ń b'a kila Ala la moxo senunŋolu ma, mennu be siginin Efesi gallo to, wo mennu mu xantigo ti Isa Kirisita la kafuɲoxoya xono. 2N Fa Ala anin Marigi Isa Kirisita xa neemo nin heero ke alu ɲen. 3Tanto be n Marigi Isa Kirisita Fa Ala ɲen, ate men xa Ni Senunŋo la duwawu sifa bee ke n ɲen sanŋo to. N xa wo duwawolu soto n nin Kirisita la kafuɲoxoya le xono. 4Jannin duniya xa da, Ala xa n sugandi xa ban, Kirisita barako to, walasa n xa senuya xa ke jalagibalolu ti a ɲa xoto. A xa n xanu, 5x'a latege kabirin folofolo, xo n si ke a dinŋolu ti, Isa Kirisita barako to. Wo le diyata a ɲen a la ɲumaya xono. 6A xa wo ke, walasa n x'a tantu a la neema maɲoxonjebalo xanma, a xa men ni n na, a Dinxe baato horomo to. 7Ala xa n kunbo Isa le jelo barako la, men bonta. N na junubolu yaafata n ma, a la neemaba xanma. 8Ala xa wo neemo di n ma, x'a siya, xa hakilitigiya nin lonniya sifa bee di n ma. 9Ala x'a sago yita n na, men tun be gullo to. A xa wo latege kabirin folofolo a la ɲumaya le xanma, Isa Kirisita barako to. 10Ala tun xa men natege x'a si a dafa waxati labanŋolu, wo mu le, xa sanxulo to fenŋolu nin duguxulo xan fenŋolu bee kamari xa kuntigi kilin nasigi i kunna, nin wo mu Kirisita ti. 11Isa Kirisita le du koso, n xa n nidula soto, x'a la ate Ala sago xan, ate men be kuwo bee lategela: N sugandita kabirin folofolo. 12A xa wo ke, walasa n xa ke Ala nooro tantubaxolu ti, ntelu mennu xa n gigo ke Kirisita ti xa ban. 13Kirisita barako to, alu dulu xa tonɲa xumo me tumo men, nin wo mu alu kisilo xibaru Dimanŋo ti, alu xa lannaya ke. Wo to, Ala x'a la taagumanseedo ke alu la, Ni Senunŋo dinmalo fe, wo men tun lahido tata. 14Ni Senunŋo dita n ma folo, x'a yita n na, xo n si a la fen ɲuma to dulu soto, nin Ala la moxolu kunbolo dafata tumo men. Alan xa barako bula Ala ɲen, a la bunɲa xanma. 15Wo le x'a tu, nte x'alu la lannaya xibaro me tumo men Marigi Isa la, anin alu la xanuya Ala la moxo senunŋolu bee ɲen, 16ń nte segela xa barako bula Ala ɲen alu la kuwo xanma. Ń hakilo be tula alu kun ń na Alamataralu xono. 17Ń b'a ŋininna n Marigi Isa Kirisita la Ala fe, Fa nooroma, xo a xa hakilitigiya Niyo di alu ma, men si ate yita alu la, walasa alu xa ate lon bete. 18Ń b'a tarala du, xo a x'alu hakilibunda yele, walasa a x'alu kili gigo men xanma, alu xa wo lon, anin a xa fen ɲuma mennu toben a la moxo senunŋolu ɲen, alu xa wolu nooro lon, anin x'a lon xo dan nte wolu la. 19Ń be Ala tarala du, walasa alu x'a la sintigiya danjebalo lon, a xa men nabaara ntelu lannayabaxolu ɲen. Ala xa wo sintigiya le yita barakeba to, 20a xa Kirisita lakuni tumo men xa bo furelu to, x'a lasigi a kininŋo xoto, sanŋo to. 21A xa Kirisita lasigi kuntigiya bee nin fango bee nin sintigiya bee nin mansaya bee anin toxo bee kunna. Ɲin duniya in toxolu doronnu nte; bari duniya kuto men be nala du toxolu. 22Ala xa fenŋo bee xulu Kirisita ɲen, x'a di a xa ke Ala la jama bee kuntigo ti fen bee to. 23Ala la jama mu Kirisita balo le ti. Ate men be fenŋo bee fanin, Ala la jama mu wo la dafaninɲa le ti.

will be added

X\