KOLOSENGOLU 4

1Marigolu, al'alu la jonŋolu mutakubete tilinninɲa la, x'a lon xo Marigo be alu dulu ma sanŋo to. 2Alu i timinadiya Alamatara la. Alu tu i ɲala wo la, xa barako bula Ala ɲen. 3Alu Ala matara ntelu dulu ɲen, walasa Ala xa da do yele n ɲen x'a la xumo fo, xa Kirisita la kuwo gullo fo. Nte be kaso la saasa wo le nofe. 4Alu Ala matara ń ɲen walasa ń xa sin xa wo gullo fo a foɲa ma. 5Mennu nte lannayabaxa ti, alu i taxama hakilitigiya la wolu mafan, xa waxato tomuta bete. 6Horomo xa ke alu la xumolu to tuma bee, anin i xa ke xuma nafamalu ti. Alu moxo bee jaabiɲa ɲuma lon. 7Tisike, men mu n badinxe xanuninŋo anin n baarakeɲoxo xantigo ti Marigi la baaro to, wo si nte xibaruyalu bee lasi alu ma. 8Nte b'a kila alu ma ɲin ne xanma, walasa a xa ntelu xibaruya di alu ma, anin a x'alu hakilo lasigi. 9N badinxe xantigo nin xanuninŋo, Onesime, men mu alu do ti, wo le b'a dandanna. Kuwo mennu be kexan jan, i si alu lalon wolu bee la. 10Arisitarake, men nin nte be kaso la, wo be alu xontonna, anin Maraka, nin wo mu Baranabasi badinxe ti. Maraka la kuwo ɲafota alu ɲen xa ban: Nin a nata alu bata, alu a mutakubete. 11Isa men be kilila xo Yusitusi du be alu xontonna. Wolu doronnu Yahudiya lelu nin nte be baaro la Ala la Mansaya ɲen. I keta nte hakililasigo ti. 12Epafarasi men du mu alu do ti, wo be alu xontonna. Isa Kirisita la jonŋo le mu, men nte Alamatara kelo dabulala alu ɲen walasa alu xa tu sinsinnin, xa dafa anin xa son Ala sago bee ma. 13Nte mu a seedo ti xo alu hanmo b'a la bete, atelu nin Lawodise lannayabaxolu anin Hiyerapolisi lannayabaxolu. 14N xanunte dogotooro Luka nin Demasi be alu xontonna. 15Alu Lawodise badinŋolu xonton, anin Ninfa nin Ala la jama men be kamarila a la luwo ma. 16Nin alu xa ń na safe xaran, alu i balan Ala la jama men be Lawodise du x'a xaran. Men du je bo Lawodise, alu dulu xa wo xaran. 17Alu a fo Arasipe ɲen xo: «Marigi xa baaro men xarifa í ma, í hakilo tu wo la, x'a ke x'a dafa.» 18Nte Poli fan bulo le be ɲin xontonni xuma innu safela: Alu xana ŋina xo ń be kaso la. Ala la neemo xa ke alu fe.

will be added

X\