KOLOSENGOLU 2

1Ń b'a fe alu xa nte la kelo xoleya lon, ń be men na alu ɲen, Lawodisengolu ɲen, anin kiika xotelu ɲen, mennu man nte je abada. 2Nte b'a fe wo ɲa ma x'e jusudun, anin i xa xanben xanuya to, i xa faamuyali dafaninŋo soto, xa Ala la gullo lon. Wo gullo mu Kirisita le ti. 3Hakilitigiya nin lonŋo bee juwo duguninŋo be ate le to. 4Nte be wo fola walasa moxo si xana alu lafili xumaxan dimanŋolu la. 5Haali nin nte xunturo nte alu bata, ń be alu bata ń hakilo la. Nte be ɲaɲanin bawo ń x'a je xo alu be alu lono to, anin xo alu sinsinninŋo be alu la lannaya to, Kirisita la. 6Awa, x'a la a xan alu sonta Isa Kirisita ma, xo a le mu Marigi ti, alu i taxama a la kafuɲoxoya xono. 7Alu i lillidun anin xa jusigi ate kafuɲoxoya to, xa sinsin lannaya to, í xo alu laxaranta a ma ɲa men. Waleɲumalonŋo kiika xa bo alu la. 8Alu i korosi moxo si xana alu neene lafililixumolu nin xuma toxulunŋolu la, mennu be bola hadamadinŋolu la hakilitigiya xono: Wolu be tanin hadamadinŋolu la laadolu ma, anin fangolu mennu be ɲin duniya in kunna, i nte tanin Kirisita ma. 9Bawo Ala la dafaninɲa balama bee be siginin ate to. 10Alu xa fenŋo bee soto x'alu wasa ate le barako to, ate men be kuntigiyalu nin fangolu bee kunna. 11Alu nin ate la kafuɲoxoya xono, alu ɲaxata ɲaxalo men nte hadamadinŋolu ta ti, bari ɲaxalo men keta Kirisita fe, men x'alu bala junubema bo alu la. 12Awa, alu batiseta tumo men, alu nin Kirisita lasita i ɲoxo fe, alu nin a kunita du i ɲoxo fe, bawo alu lata Ala la sintigiya la, men x'a lakuni xa bo furelu to. 13Folofolo, alu tunnu saninŋo le mu alu la junubolu nin alu la ɲaxabaliya koso. Bari saasa, Ala x'alu nin Kirisita nilamaya i ɲoxo fe. A xa n na junubolu bee yaafa. 14Jalagisafe men tun be n xanma n na sariya tiɲalo koso, a xa wo lasanko. A x'a gengen yiro ma. 15A xa kuntigolu nin fangatigolu la sinŋo bo i bulu, x'e ke jelefenŋo ti. A xa sinŋo soto i xan Kirisita gengenyiro le barako to. 16Wo le x'a tu, alu xana son moxo si x'alu jalagi domolifen ku walla minfen ku to, anin salli ku walla xaru kuta ku, walla tofoɲolun ku to. 17Wo kuwolu bee mu fen natalu niiniyo lelu ti, bari tonɲa fan, wo mu Kirisita le ti. 18Alu xana a tu moxo si x'alu bali x'alu la kunnawulijala soto a la fu fanmajigo, walla a la melekebato la. Wo moxo sifalu be i la jelifenŋolu jaatebetela. I be bunɲaba fuwo dila i fannu ma i la hadamadin miiriya gansanŋolu fe. 19I nte tula sitinin Kirisita la, wo men mu kunŋo ti. Ate le ken barako to, nin balo muume be balunin x'e ɲoxo muta bete, xa tu kilin ti, xulutugudalu nin xulukunnafasolu fe, anin a be bunɲala í xo a xa di Ala ɲen ɲa men. 20Alu nin Kirisita sata i ɲoxo fe, fango mennu be ɲin duniya in kunna, alu bota wolu bulu. Wo to, mun na alu be i taxamala a be í xo nin alu be dennin ɲin duniya in ne la, xa son ɲin sariya sifa innu xa la alu xan: 21«Í xana ɲin ta», «í xana ɲin nene», «í xana maxa ɲin na»? 22Wo fenŋolu bee be banna le, nin i x'e maakuwo ɲan i la. Wolu mu hadamadinŋolu la ku lategeninŋolu anin i la xaranŋo lelu ti. 23Wolu be bonin hakilitigiya fe moxolu ɲala, x'a la i la batuliɲa xan, men be bola moxo la, anin i la fu fanmajigo nin i fannu balasubo toorolo. Bari nafa nte wolu si la. Hadamadinŋo nidiyanɲekuwo doron nelu mu.

will be added

X\