KOLOSENGOLU 1

1Nte Poli, nte men mu Isa Kirisita la kiladinŋo ti, x'a la Ala sago xan, anin n badinxe Timote, 2nte lelu be ɲin safe in kila n badinŋolu ma, senuman xantigolu Kirisita la kafuɲoxoya xono, mennu be Kolose gallo to. N Fa Ala xa neemo nin heero ke alu ɲen. 3N be barako bulala n Marigi Isa Kirisita Fa Ala ɲen tuma bee, nin n be Ala matarala alu ɲen. 4Lannaya men be alu la Isa Kirisita la, n xa wo xibaro me anin xanuya men be alu la, moxo senumanŋolu bee ɲen. 5Alu be wo kela gigo xono, men be maranin alu ɲa sanŋo to. Wo gigo kufota alu ɲen tonɲa xumo fe, nin wo mu xibaru Dimanŋo ti. 6Xibaru Dimanŋo be jenjenxan xa nafa ke duniya bee xono, í xo a x'a ke alu tema ɲa men, kabirin lun folo men, nin alu xa Ala la neemo kume anin x'a lon a mu men ti tonɲa la. 7N baarakeɲoxo xanuninŋo Epafarasi le xa xaranŋo di alu ma wo kuwo la. A be baaro kela alu ɲen í xo Kirisita la baarakedin xantigo. 8Ni Senunŋo xa xanuya men di alu ma, a xa wo fo n ɲen. 9Wo le x'a tu, kabirin n x'alu la xibaruya me, n nte Alamatara dabulala alu ɲen. N b'a ŋininna Ala fe alu x'a sago lon bete, anin alu xa hakilitigiya nin faamuyalo soto Ni Senunŋo fe. 10Wo ɲa ma, alu si sin no x'e taxama x'a ben Marigi sago ma, x'a diyanɲekuwo ke tuma bee. Alu si ku beto sifa bee ke, anin xa taxa ɲa Ala lonŋo to. 11N be a ŋininna a fe, xo a xa barako di alu ma kuwo bee to, a la sintigiya nooroma la, walasa alu xa sin xa kuwo bee kun muɲo to. 12Alu ɲaɲaninŋo xa barako la n Fa Ala ɲen, ate men xa sinŋo di alu ma xa nidula soto senumanŋolu la ke to, men be keneya xono. 13A xa n bo dibo fango bulu, xa taxa n ti a Dinxe xanuninŋo la mansaya xono. 14Ate le barako to n kunbota, n na junubolu yaafata. 15Kirisita mu Alajebalo mununŋo le ti. A xa dafenŋolu bee saawa. 16Bawo fenŋo bee data ate le fe, sanŋo to anin duguxulo xan, fen jetalu nin fen jebalolu, mansayalu, marigiyalu, kuntigiyalu, fangolu. Fenŋo bee data ate le fe anin ate le ɲen. 17A tun be je kabirin dafen si man da, ate le du barako to, nin fenŋo bee b'a no to. 18Ate le mu balo kunŋo ti, nin wo mu Ala la jama ti. Ate le mu damuto ti. Ate le mu folo ti xa bo furelu to, walasa a xa foloya soto kuwo bee to. 19Bawo a diyata Ala ɲen x'a la dafaninɲa bee lasigi a Dinxe to. 20Ate le fe, nin a xa benŋo ke a nin fen bee te: Mennu be duguxulo xan, anin mennu be sanŋo to. A xa benŋo ke i te a jelu bonninŋo fe, gengenyiro xan. 21Ate mennu nin Ala te tun xa jan folo, alu tunnu mu a jaxo lelu ti jaxumanŋo miiriya nin a ko koso. 22Bari saasa, Ala xa benŋo ke alu nin a te, a Dinxe la saya fe, x'a moxoma balo tu a ma. A xa wo ke walasa alu senumanŋo nin alu fentanŋo nin alu jalagibalo xa lo a ɲa xoto. 23Bari alu xa xan xa tu lannaya xono, xa tu siginin bete jusigilan xolenŋolu xan. Alu xa gigo men soto xibaru Dimanŋo lamelo fe, fusi xana wo lasoto alu la. Wo Xibaru Dimanŋo waajulo keta hadamadinŋolu bee ɲen duniya xono. Nte Poli keta baaradinŋo ti wo Xibaru Dimanŋo fo le xanma. 24Saasa, nte be ɲaxalila toorolu la, ń be mennu xono alu koso. Tooro mennu tuta Kirisita ɲen xo, nte be wolu dafala ń balasubo to ate balo ɲen, nin wo mu Ala la jama ti. 25Ń keta Ala la jama la baarakedinŋo ti, x'a la baaro xan, Ala xa men xarifa nte ma xo ń x'a ke alu ɲen: A xa nte bula Ala la xumo fola x'a dafa, 26nin wo mu a la gullo ti, a tun xa men tu dugunin hadamadinŋolu bee ma kabirin waxati jan. Bari saasa, Ala x'a yita a la moxo senumanŋolu la. 27Bawo a diyata Ala ɲen xa wo gullo yita i la, dan nte men nafa ma, anin dan nte men nooro ma, a xa men toben siyalu bee ɲen. Wo gullo fele: Kirisita be alu xono, nin wo mu alu la nooro sotota gigo ti. 28N be Kirisita la kuwo waajulo le kela hadamadinŋolu bee ɲen. N be bee lasobila anin xa bee xaran hakilitigiya dafaninŋo to, walasa moxo bee xa dafa Kirisita la kafuɲoxoya xono. 29Wo le x'a tu, nte be baaro kela anin xa kelo ke Kirisita barako la, men be baaro la nte to, sintigiya to.

will be added

X\