KEWALOLU 9

1Wo waxato, Soli tuta a ma xa faxalo lahenne Marigi la xarandinŋolu ma. Wo to, a taxata sadaxalasibaxa kuntigiba bata, 2xo a xa safelu di a ma, mennu si a yanmaru xa taxa i di Damasi Alabatusuwolu moxolu ma; walasa nin a xa Marigi la silo taxamabaxo dolu soto je, musu nin xe, a x'e muta x'e siti, xa taxa i ti Yerusaleme. 3Xa Soli tu Damasi silo to, fo a sutiyata gallo la, ɲakun kilin, keneya do bota sanŋo to, xa mana a boxo bee. 4Soli boyita dugo ma. A xa xumaxanŋo do me xo: «Soli, Soli, mun na í be nte toorola?» 5A xo: «Ite mu jon ti, Marigi?» A xo: «Nte mu Isa le ti, í be men tooroxan. 6Wuli í xa dun gallo xono. Í xa xan xa men ke, wo si fo í ɲen.» 7Soli taxamaɲoxolu ja tegeninŋo tuta lonin. I korita fen fola. I tulo be xumaxanŋo la, bari i ɲa nte moxo la. 8Soli wulita dugo ma. Haali x'a ɲalu yeleninŋo tu, a tun ɲa nte dula la. I x'a muta a bulo ma xa taxa a ti Damasi. 9Tili saba xono, a man fuyi je, a man domoli ke, a man ji min. 10Isa la xarandinŋo do tun be Damasi, a toxo xo Ananiyasi. Marigi x'é yita a la, a xo: «Ananiyasi.» A xo: «Ń Marigi, ń x'é lamuta!» 11Marigi xo a ɲen xo: «Wuli í xa taxa bedo fe, men be kilila xo Bede Tilinninŋo. Í xa taxa Yudasi la luwo ma, xa Tarasingo do maŋininxa; a toxo xo Soli. A be Ala matarala ɲin waxati in. 12X'a tu wo Alamatara la, Ala x'a yita a la, xo xe do dunta a bata, men toxo xo Ananiyasi. Wo xe x'a bulolu la a xan, walasa a xa dula je.» 13Ananiyasi x'a jaabi xo: «Marigi, ɲin xe in xa ku jaxo mennu bee ke í la moxo senumanŋolu la Yerusaleme, moxo kiika xa wolu fo nte ɲen. 14A xa fango soto sadaxalasibaxa kuntigolu la xa na jan, x'é toxo kilibaxolu bee siti.» 15Marigi xo Ananiyasi ɲen xo: «Taxa, bawo nte xa ɲin xe in sugandi le, x'a ke ń na baarakedinŋo ti, nin a si nte toxo yita siya tolu nin i la mansaxelu la anin Banisirayila dinŋolu la. 16A xa xan xa tooro fen fen soto nte toxo nofe, nte fan si wolu yita a la.» 17Wo to, Ananiyasi taxata. A sininma luwo ma, a x'a bulolu la Soli xan. A xo: «Ń badinxe Soli, Marigi Isa men x'é yita í la silo to, wo xa ń ki í ma, walasa í xa dula je tugun, anin í xa fa Ni Senunŋo la.» 18Wo no bee to, fen dolu wasema butunta xa bo a ɲalu la. A xa dula je tugun. A wulita xa batise. 19Wo xo, a xa domolo ke, xa barako soto. Soli tuta Damasi xarandinŋolu bata tili dantalu xono. 20Wo waxato fan, a xa waajulo ke Alabatusuwolu xono, xo Isa mu Ala Dinxe le ti. 21Moxo fen wo fen x'a lame, wolu bee dabaro banta, x'a fo xo: «Ɲin xe in ne tun nte Isa toxo fobaxolu tooroxan Yerusaleme? A man na wolu sitilo le xanma ba, xa taxa i di sadaxalasibaxa kuntigolu ma Yerusaleme?» 22Bari do le tun be kafuxan Soli barako ma xa taxa a fe waajulo to. A tun b'a yitaxan xo Isa le mu Kirisita ti. Yahudiya mennu be siginin Damasi tunnu man a lon i s'a jaabi men na tugun. 23Waxati keta, wo xo Yahudiyalu benta a to xo xa Soli faxa. 24Bari a lasobita i la janfo la. Su nin tili, i tunnu be gallo dundalu korosinin walasa i s'a faxa ɲa men. 25Bari lun do suwo to, Soli la xarandinŋolu x'a bula sinso xono, x'a lajigi julo la, tato xo ma. 26Soli sininma Yerusaleme, a x'a ŋinin kafo xa dun a nin lannayabaxolu te. Bari i bee silata a ɲa, bawo i man la a la xo a keta lannayabaxo ti soobeya la. 27Wo to, Baranabasi nata Soli ti kiladinŋolu bata. A x'a fo i ɲen xo Soli xa Marigi je Damasi silo xan, xo Marigi xumata a ɲen. Soli xa Isa la kuwo waajulo ke xoleya to ɲa men Damasi, Baranabasi xa wo du ɲa fo i ɲen. 28Wo xo, Soli nin i tuta xa taxa anin xa na Yerusaleme. A tun nte silala xa waajulo ke Marigi toxo la. 29Yahudiya men tunnu be gerekixanŋo fola, Soli tun be xumala wo dulu ɲen; a nin i tunnu be tula i ɲoxo soosola. Bari wo tunnu be ɲa ŋininna a faxaɲa la. 30Lannayabaxolu xa wo lon tumo men, i taxata Soli ti Sesare gallo to. Wo xo, i x'a bula xa taxa Tarasi. 31Wo tumo, Ala la jama tun be heero xono Yude nin Galile nin Samari jamanolu bee to. A tun be barako sotoxan, x'é taxama Marigi ɲasilanɲa to, xa bunɲa Ni Senunŋo la jusudunno fe. 32Awa xa Piyere tu jamano bee yaalala, a sita Lide lannayabaxolu dulu ma. 33A xa xe do tara non, a toxo xo Ene. Wo xe tun be lanin bariyo to sanji sagi. A tun be muruxunin. 34Piyere xo a ɲen xo: «Ene, Isa Kirisita be nala í kendeyala. Wuli í x'é la laranŋo toben.» Wo no bee to, Ene wulita. 35Lidengolu nin Saron keneba xan sigibaxolu xa wo je tumo men, i bee tuubita Marigi ɲen. 36Musu lannayabaxo do tun be Jope, a toxo xo Tabita. Wo toxo gerekixanŋo to xo «Dorokasi». Wo xoto xo «tanxonŋo». A tun be ku ɲuma kela tuma bee, xa bulutoxulunŋolu deema. 37Wo waxato, a jangaruta xa sa. I x'a ku tumo men, i x'a bula bunŋo do xono, sankansuwo sanŋo to. 38Jope lannayabaxolu tunnu x'a me xo Piyere be Lide. Non tun nin Jope te tun man jan. I xa xe fula ki a ma xa ɲin xuma in dun i da xo: «N b'é tarala, xo í xa í tariya xa na n bata.» 39Wo no bee to, Piyere nin i taxata. A sininma je, i taxata a ti wo sankansuwo sanŋo to. Musujaxelu bee xasito x'e sodun a la. Dorokasi nilama xa dorokexotobulolu nin dorokeba mennu xara, i xa wolu yita Piyere la. 40Piyere xa moxo bee labo banto to, x'é ɲongi, xa Ala matara. Wo xo, a x'é ɲadi fure la, x'a fo xo: «Tabita, wuli!» Tabita x'a ɲalu yele. A xa Piyere je tumo men, a wulita x'é sigi. 41Piyere x'a bulo muta, x'a deema wulila. Wo xo, Piyere xa lannayabaxolu nin musujaxelu kili, xa Dorokasi nilama yita i la. 42Jopengolu bee xa wo kuwo lon, i kiika lata Marigi la. 43Piyere xa waxati jan ke Jope, gulubaarala do bata, xo Simon.

will be added

X\