KEWALOLU 8

1Eceni la saya benta Soli ma. Wo lun kilinŋo, tooroba wulita Ala la jama xanma Yerusaleme. Lannayabaxolu bee jenjenta xa taxa Yude nin Samari marolu dulalu bee to, x'a tu kiladinŋolu doronnu ma Yerusaleme. 2Alaɲasilanɲabaxo dolu xa Eceni lasi, x'a xasi bete. 3Soli ken tun b'a sinkuwo ma x'a ke, walasa xa Ala la jama silatunu. A tun be dunna luwolu bee xono, xa lannayabaxolu musuma nin xema saba, x'e bula kaso la. 4Awa, wo lannayabaxa jenjenninŋolu taxata dula bee, xa xibaru Dimanŋo fo moxolu ɲen. 5Filipe taxata Samari galluba do to, xa Kirisita la kuwo waajulo ke je moxolu ɲen. 6Jama xa Filipe lame, x'a la taagumanseede keninŋolu je tumo men, i bee x'e tulo lo bete x'a lame. 7I xa wo ke, bawo a tun be jinneto kiika la jinnolu xoyila. Wo jinnolu boto tun be xuurela. A xa muruxuntelu nin sin kilinŋolu kiika lakendeya. 8Wo kuwo keta ɲaxalikuba ti wo gallo moxolu bulu. 9Xe do tun be wo gallo to kabirin waxati jan, a toxo xo Simon. A tun be doomaya kela, xa Samari moxolu dabaro ban, x'a fan ke moxoba ti. 10Dindin nin moxoba, bee tun b'a lamenin bete x'a fo xo: «Ɲin ken mu Ala la sintigiya le ti, Ala la sintigiyaba.» 11I tunnu b'a lamela, bawo a x'e dabaro ban a la doomaya la kabirin tuma jan. 12Bari Filipe xa Xibaru Dimanŋo fo i ɲen tumo men, men be Ala la Mansaya nin Isa Kirisita xan, wo moxolu sonta a la xumo ma. Musu nin xe, a bee nata xa batise. 13Haali Simon fan sonta Ala la xumo ma. A batiseta tumo men, a tuta Filipe nofe. Filipe tun be taagumanseedolu nin sintigiya kuba mennu kela, wolu x'a dabaro ban haali. 14Kiladinŋolu x'a me x'e tu Yerusaleme, xo Samaringolu sonta Ala la xumo ma. Wo to, i xa Piyere nin Yaya ki wolu ma. 15Piyere nin Yaya sininŋo Samari, i xa Ala matara lannayabaxolu ɲen, walasa i xa Ni Senunŋo soto. 16I xa wo ke, bawo Ni Senunŋo tun man jigi i si xan folo. I tunnu batiseta le doron Marigi Isa toxo la. 17Wo tumo la, Piyere nin Yaya x'e bulolu la i xan, i xa Ni Senunŋo soto. 18Simon x'a je tumo men xo lannayabaxolu xa Ni Senunŋo soto kiladinŋolu la bululanxanŋo fe, a nata xaaliso ti, x'a fo Piyere nin Yaya ɲen xo: 19«Alu ɲin sintigiya in di ń du ma, walasa nin ń xa ń bulo la moxo men xan, wo xa Ni Senunŋo soto.» 20Bari Piyere x'a jaabi xo: «Í nin í la xaaliso alu fulo bee xa halagi, bawo í x'a miiri xo Ala la nilifenŋo si soto xaaliso la. 21Nidula nin sotofen nte í kun ɲin ku in to, bawo í jusukunŋo man tilin Ala ɲa xoto. 22Wo to, nimisi í la ku jaxo la, xa Marigi matara a xa yaafa í ma, nin wo si ke no, í la ɲin miiriya in xanma. 23Bawo ń ɲa b'a la xo í jusukunŋo be fanin ɲangoya la. Í be junubo la jonɲa la.» 24Simon xo Piyere nin Yaya ɲen xo: «Alu fannu xa Marigi matara nte ɲen walasa alu xa mennu fo, wolu si xana ń soto.» 25Piyere nin Yaya xa seedeya bo tumo men, xa Marigi la xumo fo, i x'e koppa xa taxa Yerusaleme. I taxato xa Xibaru Dimanŋo fo Samari gallu kiika to. 26Marigi la melekiyo do xumata Filipe ɲen xo: «Wuli í xa taxa banbugu mafanŋo. Silo men be bola Yerusaleme xa taxa Gasa, nin wo mu sila ti men nte taxamala bete, í xa taxa wo fe.» 27Filipe wulita xa taxa. X'a tu silo fe, a xa xe do je. Ecopi mansamuso Kandasi la kuntigiba do le mu. Ate le tun b'a la naafulo kunna. Wo xe tun taxata Yerusaleme, xa Ala batu. 28A koppato, x'a sigininŋo tu a la wuturo xono, a tun b'a ma xa kila Esayi la kitaabo xaran. 29Ni Senunŋo xo Filipe ɲen xo: «Si ɲin wuturu in ma, í nin a xa taxa i ɲoxo la.» 30Filipe x'é bori xa wuturo soto. A xa Ecopingo xanme kila Esayi la kitaabo xaranna. A xo a ɲen xo: «Í be men xaranna, í b'a faamula ba?» 31A x'a jaabi xo: «Ń si wo faamu ɲa di nin moxo man a xoto fo ń ɲen?» A xo Filipe ɲen xo a xa yele xa sigi a bata. 32A tun be Kitaabo dula men xaranna, wo fele: «A keta í xo saaxo men be taxanin a faxadula; a be í xo saaxandinŋo, men nte xunbola a tiyo xabaxo bulu; a man a da yele muume. 33A la majigo xono, a la tonɲa man di a ma. Jon si xuma a bonsonŋo xan; bawo a siyo banta duguxulo xan?» 34Kuntigi in xa Filipe ŋininxa xo: «Ń b'é matarala, kila be xumala jon ma ten? A fan ba, walla do xote?» 35Wo to, Filipe xa xumo ta, a x'a damuta Kitaabo wo xumolu ma, xa Isa la xibaru Dimanŋo fo a ɲen. 36X'e tu taxanin ɲafe silo to, i sita jiyo ma. Kuntigo xo: «Jiyo fele, mun na ń me batise jan?» [ 37Filipe xo: «Nin í xa lannaya ke í jusukunŋo bee la, í si batise.» Kuntigo x'a jaabi xo: «Ń lata a la xo Isa mu Ala Dinxe le ti.»] 38A xa yanmaro di xo wuturo xa lalo. Filipe nin kuntigo fulo bee jigita jiyo to. Filipe woman in xa kuntigi in batise. 39I yeleninma xa bo jiyo to, Marigi Niyo xa Filipe ta xa taxa. Kuntigo man a je wo xo. A ɲaɲaninŋo x'a la silo muta xa taxa. 40Filipe taxata a fan tara Asoti. A x'é tu non, xa taxa fo Sesare gallo to. A tanbito bota gallo fen fen na, a xa Xibaru Dimanŋo fo wolu bee to.

will be added

X\