KEWALOLU 7

1Sadaxalasibaxa kuntigiba xa Eceni ŋininxa xo: «Moxolu be men fola, tonɲa le mu ba?» 2Eceni x'a jaabi xo: «Ń falu anin ń badinŋolu, alu ń name! Noorotigi Ala x'é yita n mamaxe Burehima la, x'a tu Mesopotami, jannin a xa sigi Xaaran. 3Ala xo a ɲen xo: “Bo í la jamano nin í fasuwo la, ń be nala jamano men yitala í la, í xa taxa non.” 4Wo to, Burehima bota Kalidengolu la jamano to, xa taxa sigi Xaaran. A fa saninma, Ala nata a ti ɲin jamana in to, alu sigininŋo be jan men saasa. 5Ala man duguxulu si di a ma ɲin jamana in xono, haali sin lodula. Bari Ala xa lahido ta a ɲen, xo a si ɲin jamana in di a nin a bonsonŋo ma, haali x'a tara din tun nte a bulu folo. 6Ala x'a fo xo Burehima bonsonŋolu si ke siginfelu ti jamana xote to, xo wo moxolu s'i ke jonŋolu ti, x'e tooro keme naani san xono. 7Bari xo siya men b'e kela jonŋolu ti, Ala xo, a si kiito tege wo xan. Wo xo, xo i si bo je, xa na ate batu ɲin dula in. 8Wo xo, Ala xa Kafuxanŋo sigi a nin Burehima te, xa ɲaxo ke wo Kafuxanŋo taagumanseedo ti. Wo to, Burehima xa Nsiyaxa ɲaxa a wuluwo tili sago. Nsiyaxa xa Yaxuba bange, a x'a ɲaxa, Yaxuba xa n mamaxe tan nin fulo bange, a x'e ɲaxa. 9«N mamaxelu xa i badinxe Yusufu faxakilinjaxuya, x'a fiiri Misira taxalalu ma. Bari Ala tuta a senbo to, 10x'a bo toorokuwolu bee xono. Ala xa hakilitigiya di a ma, x'a kudiya Misira mansaxe Farawuna ɲen. Farawuna xa Yusufu lasigi Misira jamano nin a fan na luwo bee kunna. 11Wo to, xonxoba nata Misira jamano nin Kanan jamano bee to. Wo jaxuyata fo n mamaxelu tunnu nte fen sotola tugun x'a domo. 12Kabirin Yaxuba x'a me xo baluwo be Misira, a xa n mamaxelu ki xa taxa je sinɲa kilin folo. 13I la taxa fulananŋo to, Yusufu x'a fan yita a badinxelu la. Wo keninŋo, Farawuna xa Yusufu siya lon. 14Wo xo, Yusufu xa kila bula a fa Yaxuba nin a la dinbaya bee ma, xa na i ti a bata. Wolu tunnu mu moxo tan woorowula nin luulu le ti. 15Yaxuba nin a la dinbaya taxata Misira. Saya sita a nin n mamaxelu ma non. 16I furelu tata xa taxa Sikemu. Burehima tun xa xaburukedula men san xaalisi xoyimanŋo la, Hamore dinxelu ma, i lasita non. 17«Ala tun xa lahido men ta Burehima ɲen, wo dafawaxato sutiyaninma, Banisirayila moxolu siyata, xa jiidi Misira xono. 18I tuta siyaxan, xa jiidi, fo mansaxe kuto do nata sigi Misira kunna, men tun man Yusufu lon. 19Wo mansaxe xa sila jaxo taxama n na siya ma, xa n mamaxelu tooro, fo x'e diyakuwa x'e labo i la deenanolu la, walasa i xa sa. 20Wo waxato, Musa bangeta. A tun xa bete; a ku tun xa di Ala ɲen. A xa xaru saba ke a fa bata. 21Wo xo, bo keta Musa la. Wo keta tumo men, Farawuna dinmuso x'a ta, x'a labunɲa í xo a fan dinŋo. 22Musa xaranta Misirangolu la hakilitigiya bee ma. Barako tun be a la xumolu nin a la kebaarolu to. 23Musa xa tan naani sanji soto tumo men, a x'a latege xa taxa bo a badin Banisirayilangolu ma. 24A xa Misirango do je a badin Banisirayilango do tooɲola. A x'a badinŋo lafaasa, xa wo Misirango faxa. 25Musa la miiro tun na, xo a badinŋolu s'a faamu, xo Ala be i bola bulu to ate le sabaabo la. Bari i man a faamu. 26Wo lun do, Musa x'a badin fula je i ɲoxo la. A tun b'a fe x'e laben. A xo: “Mun na alu be i ɲoxo tooɲola, atelu mennu mu badin ti?” 27Bari men tun b'a badinŋo ma x'a tooɲo, wo xa Musa laɲori, x'a fo a ɲen xo: “Jon x'é ke n na kuntigo nin n na kiititegebaxo ti? 28Í xa Misirango faxa ɲa men, í b'a fe xa nte du faxa wo ɲa in ba?” 29Wo xumo xa Musa labori, xa taxa a ti Madiyan jamano xan. A xa dinxe fula soto non. 30«Tan naani sanji tanbita. Wo xo, melekiyo do x'é yita Musa la fuxo la, Turusinna kuro senbo to, fitaare mananinŋo to. 31Musa xa wo je tumo men, a dabaro banta. A xo tumo men xo a b'é sutiyala xa wo mafele, a xa Marigi xumaxanŋo me xo: 32“Nte mu í benbalu la Ala le ti, Burehima nin Nsiyaxa nin Yaxuba la Ala.” Musa jarajarato man fatiya x'a mafele. 33Marigi x'a fo a ɲen xo: “Í la samatolu bo í sinŋo to, bawo í be dula senumanŋo le. 34Nte la moxo mennu be Misira, nte xa wolu la tooro je, x'e ŋuntanxanŋo me. Nte jigita xa na i bo bulo to. Saasa ń b'é kila í xa taxa Misira.” 35«Wo Musa men nin Banisirayila dinŋolu x'e ban a to, x'a fo a ɲen xo: “Jon x'é ke n na kuntigo nin n na kiititegebaxo ti?”, Ala xa wo ki x'a ke kuntigo nin kunbobaxo ti, melekiyo la deemalo fe. Wo melekiyo le tun x'é yita a la, fitaaro to. 36Wo Musa le x'e labo Misira jamano xono, xa kawakuwolu nin taagumanseedolu ke non, anin Xooxoji Wulenŋo da la, anin fuxo la, tan naani sanji xono. 37Wo Musa le x'a fo Banisirayila dinŋolu ɲen xo: “Ala si nte ɲoxon kila labo alu la siya moxolu to.” 38Xa Banisirayila dinŋolu kamarininŋo tu fuxo la, ate Musa le tun be n mamaxelu nin melekiyo te, men tun be xumala a ɲen Turusinna kuro to. A xa wo xuma ɲalamalu soto Ala la, x'e di n ma. 39Bari n mamaxelu man son x'a lame. I x'e ban a to. I tunnu b'a fe x'e koppa Misira. 40I xo Haruna ɲen xo: “Bolibatuta dolu dara n ɲen, walasa wolu xa bula n ɲa, bawo ɲin Musa in men xa n nabo Misira, n man a keɲa lon.” 41Wo lunŋolu, i xa sano dara ɲinsirindinŋo ti, x'a ke bolibatuta ti, xa sadaxo bo wo bolo ɲen, xa ɲaxali i buluno la. 42Bari Ala x'é xodi i la, x'e bula i xa sanxulo loololu batu, í xo a be safenin kilalu la kitaabo to ɲa men xo: “Banisirayila dinŋolu, alu xa marafen sadaxolu nin sadaxa xotelu bo tan naani sanji xono, fuxo la, alu xa wo ke nte le ɲen ba? 43Ayi! Bari alu xa bolibatuta Moloku la batusu tillisima ta, xa alu la loolo batuta Ranfan taagumanseedo ta, xa taxa i ti, alu xa wo mennu dara x'e batu. Wo xanma, ń si taxa alu ti fo Babilone gallo jefen.” 44«Xa n mamaxelu tu fuxo la, Alabatusuba tillisima do tun be i bulu, men b'a yitala xo Ala b'e bata. Ala xumata Musa ɲen, xo a xa wo faanusuwo dara x'a ke í xo men yitata a la be ɲa men. 45Wo xo, n mamaxelu xa wo faanusuwo di i dinŋolu ma. Yosuwe le keta i ɲamoxo ti, xa taxa i ti siya dolu la jamano xan. Ala tun xa siya dolu xoyi xa bo non. Wo faanusuwo tuta je fo Dawuda tilo. 46Dawuda la kuwo tun xa di Ala ɲen, a xa Ala matara xo a xa bunŋo lo Yaxuba la Ala ɲen. 47Bari Sulemani le xa wo bunŋo lo Ala ɲen. 48Wo bee nin a ta, Ala Xototaninba nte sigila moxo la bun lonin xono, í xo kila do x'a fo ɲa men xo: 49“Sanxulo le mu nte la mansasigilanŋo ti. Ń Marigi xo ten. Duguxulo mu ń sinxoto korondome ti. Atelu si mun bun lo no nte ɲen? Nte lafiyadula si ke minto ti? 50Nte bulo le man wo bee ke ba?” 51«Moxo murutininŋolu nin moxo jusukun xolenŋolu nin tulu xolenŋolu! Alu be Ni Senunŋo soosola tuma bee, alu nin alu mamaxelu bee. 52Kila joman nata nin alu mamaxelu man men tooro? Mennu xa Ala la moxo Tilinninŋo la nalo fo x'a tara a man si, i xa wolu faxa. Saasa atelu keta wo janfabaxo ti, x'a faxa. 53Atelu mennu xa Ala la sariya soto melekiyolu la, alu man wo sariya labatu!» 54Kiititegelalu xa wo me tumo men, wo x'e juso labo, i x'e dafato kin Eceni xanma. 55Xa Eceni faninŋo tu Ni Senunŋo la, a xa sanxulo mafele. A xa Ala nooro je, xa Isa loninŋo je Ala kininŋo xoto. 56A xo: «A fele, ń ɲa be sanxulo dayeleninŋo la, Moxo Dinxe be lonin Ala kininŋo xoto.» 57I xuurebeteta, x'e tulolu sukki, i bee kafuninŋo gidita a xan. 58I x'a xoyi, xa taxa a ti gallo xo ma, x'a bun kurolu la. Wo kebaxolu x'e la faanolu la xamarindinŋo do senbo to xo Soli. 59X'e tu a bunna, Eceni xa Marigi matara ten xo: «Marigi Isa, ń xa ń niyo tu í bulu.» 60Wo xo, a x'é ɲongi xa xuure xo: «Marigi, í xana i la ɲin junube in jaate i ɲen.» Wo xumolu xo, a sata.

will be added

X\