KEWALOLU 6

1Wo waxato, lannayabaxolu tunnu be siyaxan. Yahudiya mennu be gerekixanŋo fola, wolu tunnu be Yahudiya heburuxan folalu maxumala bawo i la musujaxelu tunnu nte jaatela lun wo lun domoli tala to. 2Kiladin tan nin fulo xa lannayabaxolu jama kamari x'a fo i ɲen xo: «A man xan, n xa Ala la xumo folo dabula domoliɲabo xanma. 3Wo xanma, n badinŋolu, alu xe woorowula sugandi alu to, mennu toxoɲuma be fola, mennu be fanin Ni Senunŋo la, anin nin hakilitigiya be i fe. N si wolu bula ɲin baara in na. 4Ntelu kennu si tu Alamatara nin Ala la xumo waajulo la.» 5Jama bee sonta wo fo ma. I woman innu xa Eceni sugandi, ate la lannaya tun xa bun, a tun be fanin Ni Senunŋo la; anin Filipe nin Porokore nin Nikanore; nin Timon; nin Paramenasi; anin Antiyosingo do xo Nikola, ate men tun dunta Yahudiyalu la diino to. 6I xa wolu yita kiladinŋolu la. Kiladinŋolu xa Ala matara, xa i bulolu la i xan. 7Ala la xumo tun be jenjenna xa taxa a fe. Lannayabaxolu tunnu be siyabetela Yerusaleme. Sadaxalasibaxolu kiikaba tun be sonna xa lannaya ke. 8Ala la neemaba nin a la sintigiyaba tun be Eceni xan. A tun be kawakuwolu nin taagumanseedebalu kela jama tema. 9Moxo dolu bota Alabatusuwo do la, men toxo xo «Hooroyaninŋolu la Alabatusuwo». Sireningolu nin Alekisandiringo lelu mu, anin Silisi nin Asi maro moxo dolu. Wolu wulita xa Eceni sooso. 10Bari i korita Eceni la xumolu xoxatila, bawo a tun be xumala hakilitigiya la, Ni Senunŋo barako to. 11Wo to, i xa moxo dolu xonotosoli xo wolu x'a fo xo: «A be xumala xa Musa nin Ala toxo tiɲa. N fannu xa wo me a da la.» 12Wo ɲa ma, i xa jama nin moxobalu nin sariya karanmoxolu juso lawuli Eceni xanma. Wolu nata Eceni ma, x'a muta x'a lasi Yahudiyalu la Kiititegekafo ma. 13I nata seede fano dolu ti. Wolu xo: «Ɲin xe in ken b'a ma le doron xa xuma jaxo fo n na Alabatusuba senunŋo nin Musa la sariya ma. 14N x'a me a da la xo Isa Nasaretinga in si Alabatusuba te, Musa xa laadolu mennu di n ma, a si wolu yelema.» 15Moxo fen fen tun be siginin kiititegedula, wolu bee tun ɲa be bennin Eceni ma. I x'a je xo a ɲada tun be í xo melekiyo ɲada.

will be added

X\