KEWALOLU 5

1Awa, xe do du tun be je, a toxo xo Ananiyasi. A nin a musu Safira xa duguxulo do fiiri. 2A xa do bo wo sonŋo la. A musu tun be wo xalama. Wo xo, a taxata a to dun kiladinŋolu bulu. 3Piyere xo a ɲen xo: «Ananiyasi, mun x'a tu Sentane xa í xonotosuruxu x'é bula do bola ɲin duguxulu in sonŋo la, x'a mara, xa faniya fo Ni Senunŋo ɲen? 4Jannin í xa duguxulu in fiiri, í ta le nte ba? A fiiro xo, í ta le nte a xaaliso ti ba? Mun na í xa ɲin miiriya jaxu in ta? Í man faniya fo moxolu ɲen, í x'a fo Ala le ɲen.» 5Ananiyasi xa wo xumo me tumo men, a boyita, a sata. Mennu xa wo kuwo xibaro me, wolu bee silabeteta. 6Xamarindinŋolu wulita x'a kasanke, xa taxa a lasi. 7Leere saba ɲoxon tanbininŋo xo, Ananiyasi musu nata. Kuwo men tun keta, a tun nte wo xalama folo. 8Piyere x'a ŋininxa xo: «Alu x'alu la duguxulo fiiri ɲin sonŋo in ne la ba?» Muso x'a jaabi xo: «Iyo, n x'a fiiri wo le la.» 9Piyere xo a ɲen xo: «Mun na alu benta a to ten xa Marigi Niyo xotobo? Awa, moxo mennu xa í xe lasi, i fele innu ti da la; i je taxa le í du ti.» 10Wo no bee to, muso boyita Piyere xoto, xa sa. Xamarindinŋolu dunta x'a saninŋo tara. I taxata a lasi a xe senbo to. 11Ala la jama moxolu, anin moxo mennu xa wo me, wolu bee silata fo xa danmatanbi. 12Kiladinŋolu xa taagumanseedo nin kawakuwo kiika ke jama temo to. Lannayabaxolu bee kamarininŋo tun be mansaxe Sulemani la biire xoto. 13Moxo tolu korita fatiyala xa dun i to. Wo bee nin a ta, moxolu tunnu be i bunɲala bete. 14Xelu nin musolu jamaba tun b'a ma xa la Marigi la xa taxa a fe, xa kafu lannayabaxolu la jama ma. 15Moxolu tunnu be taxala i la jangarutolu tila xaraxolu nin laranŋolu xan, x'e bula bedolu to, walasa Piyere tanbito niiniyo xa la i dolu xan, x'e kendeya. 16Jama tun be bola Yerusaleme senbefegallo dulu to, xa na i la jangarutolu nin i la jinnetolu ti. I bee tun be kendeyaxan. 17Wo to, sadaxalasibaxa kuntigiba nin a nofemoxolu bee, nin wo mu Sadusen diino moxolu ti, wolu diminbeteta kiladinŋolu xanma. 18I wulita xa kiladinŋolu muta, xa taxa i bula kasobunba xono. 19Bari suwo to, Marigi la melekiyo do nata kasobunŋo dalu yele, xa kiladinŋolu labo x'a fo i ɲen xo: 20«Alu taxa Alabatusuba xono, xa nilamaya kuto kuwolu bee fo moxolu ɲen.» 21I xa wo xumo me tumo men, i sorita xa taxa Alabatusuba xono, xa moxolu laxaran. Sadaxalasibaxa kuntigiba nin a nofemoxolu xa Yahudiyalu la Kiititegekafo, anin Banisirayila moxobalu bee kamari dula kilin. I xa garado dolu ki kasobunŋo la, xo i xa na kiladinŋolu ti. 22Garadolu sininŋo kasobunŋo xono, i x'a tara kiladinŋolu nte je. I x'e koppa xa taxa wo xibaro fo Yahudiyalu la Kiititegekafo ɲen. 23I xo: «N xa kasobunŋo da tara soxonin a ɲa ma. Dakantabaxolu be lonin da la. Bari n xa da yele tumo men, n man moxo si tara a xono.» 24Alabatusuba korosibaxolu la kuntigo nin sadaxalasibaxa kuntigolu xa wo xumo me tumo men, wo x'e xonotolafili. I x'e ɲoxo ŋininxa xo mun si tara kela. 25Wo to, moxo do nata a fo i ɲen xo: «Alu xa xe mennu bula kaso la, i fele innu ti lonin Alabatusuba xono, xa moxolu laxaran.» 26Wo tumo la, Alabatusuba korosibaxolu la kuntigo nin garadolu taxata xa na kiladinŋolu ti. I man wo ke barako la, bawo i silata moxolu xana i fannu bun kurolu la. 27I nata kiladinŋolu ti tumo men, x'e lalo Yahudiyalu la Kiititegekafo ɲa xoto. Sadaxalasibaxa kuntigiba xo i ɲen xo: 28«N man alu kaba ba, xa moxolu laxaran Isa toxo la tugun? Bari a fele in ti, alu xa Yerusaleme bee daben alu la xaranŋo la. Atelu kennu b'a fe xa ɲin xe in faxo haxxo den ntelu la.» 29Piyere nin kiladin tolu x'a jaabi xo: «Jannin í be moxolu sago kela, Ala le sago ke. 30Alu xa Isa men gengen yiro ma, x'a faxa, n mamaxelu la Ala xa wo lakuni. 31Ala x'a xotota, xa taxa a lasigi a kininbulo xoto, x'a ke Mansaxe nin Kisibaxo ti, walasa Banisirayila moxolu xa tuubi, xa junubeyaafo soto ate barako to. 32Ntelu keta wo kuwolu seedolu ti, ntelu nin Ni Senunŋo. Ala xa wo Ni Senunŋo di a foxanŋolu labatubaxolu bee ma.» 33Yahudiyalu la Kiititegekafo moxolu xa wo xumolu me tumo men, i juso bota. I tunnu b'a fe xa kiladinŋolu faxa. 34Bari Farisiya do tun be i to, a toxo xo Gamaliyeli, sariya karanmoxo do le mu. Jama bee tun be wo bunɲanin. Wo wulita x'é lo Yahudiyalu la Kiititegekafo temo to. A xa yanmaro di, xo xa kiladinŋolu labo je waxatindin xono. 35Wo xo, a x'a fo i ɲen xo: «Banisirayila moxolu, alu b'a fe xa men ke ɲin xe innu la, alu i korosi wo kuwo to de! 36A man me folo, Tudasi wulita, x'a fan ke moxoba ti. Xe keme naani x'a lo a nofe. Bari a faxata. Moxo mennu x'a lo a nofe, wolu jenjenta. Wo kuwo banta. 37Ate tanbo xo, Galile Yudasi du wulita, toxosafe waxato. A xa moxo kiika kili x'a lo a nofe. Ate du faxata. A nofemoxolu bee jenjenta. 38Wo to, saasa nte b'a fola alu ɲen xo alu xana alu fannu sege ɲin xe innu la kuwolu nofe tugun. Alu i bula i xa taxa, bawo nin i miiriya nin i la baaro wulita moxo lelu la, a si tiɲa. 39Bari nin a wulita Ala le la, alu me a tiɲa no. Alu i korosi alu xana ke Ala kelebaxolu ti.» Yahudiyalu la Kiititegekafo sonta Gamaliyeli la fo ma. 40I xa kiladinŋolu kili, x'e gaɲa. I x'a xoleya i ma xo i xana Isa toxo fo moxo ɲen tugun. Wo xo, i x'e bula xa taxa. 41Kiladinŋolu bota kiititegedula xa taxa. I ɲaxalita, bawo xa doxoya Isa toxo nofe, wo mu itelu bulu kunnawulo le ti. 42Lun wo lun, i tunnu b'a ma xa moxolu laxaran Alabatusuba nin moxolu la luwolu xono, xa xibaru Dimanŋo fo moxolu ɲen, xo Isa le mu Kirisita ti.

will be added

X\