KEWALOLU 4

1Xa Piyere nin Yaya tu wo xumo la jama ɲen, sadaxalasibaxolu, nin Alabatusuba korosibaxolu la kuntigo, nin Sadusen diino moxolu nata i ma. 2Wolu tunnu diminnata bawo wo kiladinŋolu tunnu be jama laxaranna, xa Isa kuniyo fo i ɲen, x'a yita wo ɲa ma, xo furelu si kuni. 3I xa kiladinŋolu muta x'e bula kaso la, fo wo lun do, bawo suwo tun kuta xa ban. 4Wo bee nin a ta, mennu xa kiladinŋolu la waajulo lame, wolu kiika xa lannaya ke. Lannayabaxolu bee kafuninŋo tun si taxa wulu luulu xeba ɲoxon ma. 5Wo lun do, Yahudiyalu la kuntigolu nin moxobalu nin sariya karanmoxolu kamarita Yerusaleme. 6Sadaxalasibaxa kuntigiba Ane du tun be je, anin Kayife nin Yaya, nin Alekisandere anin sadaxalasibaxa kuntigiba badinŋolu bee. 7I nata Piyere nin Yaya ti i ɲa xoto, x'e ŋininxa xo: «Alu xa ɲin kendeyali in ke jon barako to, walla jon toxo la?» 8Wo to, xa Piyere tu fanin Ni Senunŋo la, a xo i ɲen xo: «Banisirayila ɲamoxolu nin a moxobalu, 9n kilita bi, bawo n xa ku beto do ke moxo jonbininŋo ɲen. N ŋininxata wo xe kendeyaɲa la. 10Alu bee, anin Banisirayila bee xa xan x'a lon xo ɲin xe in kendeyaninŋo fele lonin alu ɲa xoto Isa Kirisita Nasaretingo toxo le barako to. Alu xa ate le gengen yiro ma, nin Ala x'a lakuni. 11Kitaabo x'a fo Isa le la kuwo to xo: “Atelu kurubunlolalu x'e ban kuro men to, wo keta bunŋo jusigikuro ti.” 12Kisilo me soto do xote si barako to nin ate nte, bawo duniya muume to, Ala man kisibaxa xote di hadamadinŋolu ma ate xo.» 13Piyere nin Yaya man sila, xa yilanyilan i la xumolu xono. Wo xa Yahudiyalu la Kiititegekafo dabaro ban, bawo i x'a lon xo wolu tunnu mu moxo xaranbali gansanŋo lelu ti. I x'a lon xo Isa nofemoxo le du tunnu mu. 14I xa wo xe kendeyaninŋo je lonin Piyere nin Yaya senbo to tumo men, i man xuma soto x'e jaabi. 15Wo to, i xa yanmaro di xo Piyere nin Yaya xa labo kiititegedula. Wo xo, i x'a damuta x'e ɲoxo ŋininxa 16xo: «Alan si mun ke ɲin xe innu la? Bawo sikka nt'a to, Yerusaleme moxolu bee x'a lon, xo i xa ɲin kawaku in ke. Alan me soosoli ke no wo kuwo to. 17Bari, walasa moxo bee xana wo xibaro me xa taxa a fe, alan xa kankero la i ɲen, xo i xana xuma moxo si ɲen, ɲin toxo in na tugun.» 18Wo tumo la, i xa Piyere nin Yaya kili xa taxa i ti kiititegedula tugun, x'a xoleya i ma xo i xana xuma, walla xa moxo laxaran Isa toxo la tugun. 19Bari Piyere nin Yaya x'e jaabi xo: «Alu fannu x'a mafele nin don ne be tilinnin Ala ɲa xoto xa atelu sago ke, xa Ala ta tu je. 20Ntelu kennu xa kuwo mennu je, x'e me, n me tu no nin n man wolu fo.» 21Yahudiyalu la Kiititegekafo xa kankero la Piyere nin Yaya ɲen tugun, wo xo, x'e bula i xa taxa. I man ɲa si soto, xa Piyere nin Yaya ɲangi, bawo men keta, jama bee tun be Ala tantula wo xanma. 22Kawakuwo xa ɲin xe in men kendeya, a siyo tun tanbita tan naani san na. 23Piyere nin Yaya bulaninŋo, i taxata lannayabaxa tolu bata. Sadaxalasibaxa kuntigolu nin moxobalu xa fen fen fo, i xa wolu bee laxali i ɲen. 24Lannayabaxolu xa wo me tumo men, i xanbenninŋo xa Ala matara ten xo: «Marigi, ite le xa sanxulo nin duguxulo nin xooxojiyo nin i to fenŋolu bee da. 25Ite le xa n mamaxe, í la baaradin Dawuda bula a fola Ni Senunŋo barako to xo: “Mun xa siyalu ladimin? Mun na i xa janfo siti fu? 26Duguxulo mansaxelu x'e toben kelo xanma, kuntigolu benta Marigi Ala nin a la Kirisita xanma, a xa men sugandi.” 27Bawo a man dugu xo mansaxe Herode nin Ponsi Pilate nin Banisirayila moxolu nin siya tolu benta ɲin gallu in to jan, í la baaradin senumanŋo, Isa xanma, nin wo mu í la Sugandininŋo ti. 28Wo ɲa ma, ite Ala xa men natege, kabirin waxati jan, í la sintigiya nin í sago la, ɲin moxo innu xa wo ke. 29Saasa, Marigi, i xa kankero men la, wo jaate. A ke xo, ntelu mennu mu í la jonŋolu ti, n xa í la xumo fo x'a tara n man sila. 30Í la sintigiya di n ma, walasa n xa jangarutolu kendeya, xa taagumanseedolu nin kawakuwolu ke, í la baaradin senumanŋo, Isa toxo la.» 31I x'e soto Alamatara la tumo men, i kamarininŋo be dula men, non jarajarata. I bee fata Ni Senunŋo la, xa Ala la xumo fo, x'a tara i man sila. 32Lannayabaxolu jama bee tun be xan kilin ma, ŋanne nin miiro la. Moxo si kilin tun nte a fola i to xo a bulufenŋolu mu a kilin ne ta ti. I tunnu xa xan fenŋo bee to. 33Kiladinŋolu tunnu be Marigi Isa la kuniyo seedeyala sintigiyaba to. Ala la neemaba tun be lanin i bee xan. 34Bulutoxulun si tun nte i to, bawo duguxulolu nin luwolu be mennu kun, wolu tunnu be wolu fiirila, xa na i sonŋo ti, 35x'a dun kiladinŋolu bulu; walasa x'a tala tala, x'a ben bee la maakuwo ma. 36Awa, xe do keta je, a toxo xo Yusufu. Kiladinŋolu x'a toxola xo Baranabasi, wo xoto xo «tonbennibaxo». Lewikundango do le mu. A be bola Sipere. 37Duguxulo do tun be wo kun, a x'a fiiri xa na a xaaliso ti, x'a bula kiladinŋolu la bulo ma.

will be added

X\