KEWALOLU 3

1Lun do wura la, Alamatara waxato, Piyere nin Yaya tunnu be taxanin i ɲoxo la Alabatusuba xono. 2Moxolu nata xe do ti. Wo namatama le wuluta. I tunnu b'a tala lun wo lun, x'a bula Alabatusuba da do la, men toxo xo Da Beto, nin a si sadaxo tara non dunbaxolu la. 3Wo xe xa Piyere nin Yaya dunto je Alabatusuba xono tumo men, a xa sadaxo tara i la. 4Piyere nin Yaya x'e ɲalu lo a to. Piyere xo a ɲen xo: «N mafele!» 5Xe xa i mafele bete, bawo a tun ɲen xo i je a so fen do le la. 6Wo to, Piyere xo a ɲen xo: «Sanu nte ń bulu, xaalisi nte ń bulu, bari men be ń bulu, ń si wo di í ma. Isa Kirisita, Nasaretingo toxo barako to, wuli í x'é taxama.» 7Piyere x'a muta a kininbulo ma, x'a lawuli. Wo no bee to, a sinŋolu tofirinta. 8A x'é ba, xa wuli x'é taxama. A nin i dunta Alabatusuba xono i ɲoxo la. A tun b'a ma x'é taxama taxama, x'é ba ba, xa Ala tantu. 9Moxo bee x'a taxamato je, anin x'a je Ala tantula. 10Moxolu x'a lon xo xe men tun be siginin sadaxatara la Alabatusuba Da Beto la, xo ate le mu. Kuwo men keta xe ɲen, wo xa i bee dabaro ban x'e xonotolafili. 11Xe ken korita a tala Piyere nin Yaya nofe. Jama bee dabaro banta, x'e bori taxanin i ma Alabatusuba biire do xoto, men kilita xo «Mansaxe Sulemani la biire.» 12Piyere xa wo je tumo men, a xumata jama ɲen ten xo: «Banisirayila dinŋolu, mun na ɲin kendeyali in be alu dabaro bannin? Mun na alu be ntelu mafelela í xo nin ntelu xa ɲin xe in nataxama n fannu barako le la, walla n na Alaɲasilanɲa le xanma? 13Burehima la Ala, Nsiyaxa la Ala, Yaxuba la Ala, anin n benbalu la Ala le x'a la baaradin Isa bunɲa. Atelu kennu x'a dun fankamalu bulu, xo i x'a faxa, x'e ban a to Pilate ɲala, wo men tun x'a latege xo a xa bula. 14Alu x'e ban moxo Senunŋo nin moxo Tilinninŋo to, x'a ŋinin moxofaxala le xa bula alu ɲen. 15Alu xa nilamaya banbalo tigo faxa. Bari Ala x'a lakuni xa bo furelu to. Ntelu mu wo seedolu ti. 16Ntelu lata Isa la. Wo xanma, a toxo le barako x'a tu, nin ɲin xe in kendeyata; alu ɲa je xe in men na, nin alu x'a lon. Xa lannaya ke Isa la, wo le xa kendeya muume di a ma, í xo alu ɲa b'a la ɲa men. 17«Bari ń badinŋolu, ń x'a lon xo lonbaliya le x'alu nin alu la kuntigolu bula ku kela Isa la. 18Bari wo ɲa ma, Ala tun xa men fo a la kilalu bee da la kabirin folofolo, wo dafata. A tun x'a fo xo a la Kirisita tun xa xan xa tooro. 19Wo to, alu tuubi, x'e ɲadi Ala la, walasa a x'alu la junubolu bo je. 20Nin wo keta, Marigi si laxafiya di alu ma, xa Isa ki alu ma, nin wo mu Kirisita ti. Ala xa ate le sugandi alu xanma, kabirin waxati jan. 21Bari Isa Kirisita xa xan xa tu sanŋo to folo, fo fenŋo bee xa tokutaya, í xo Ala tun x'a fo a la kila senunŋolu da la ɲa men, kabirin waxati jan. 22A folo, kila Musa x'a fo xo: “Marigi, alu la Ala, si nte ɲoxon kila do ki alu ma, men si bo alu badinŋolu to. Wo je fen fen fo alu ɲen, alu wo lame. 23Moxo wo moxo man wo kila lame, wo tigo si halagi xa bo Ala la jama xono.” 24Kila mennu xumata, x'a damuta kila Samuyeli ma, wolu dulu bee kilin kilin xumata, xa bi kuwolu yita. 25Ala xa kuwo mennu bee yita kilalu la, wolu bee fota alelu ɲen. Ala xa Kafuxanŋo men sigi ate nin alu mamaxelu te, alu nidula be wo to, bawo Ala xo Burehima ɲen xo: “Duguxulo dinbayalu bee si ń na duwawo soto í bonsonŋo fe.” 26Ala x'a la baaradinŋo lawuli alelu xanma folo, xa duwawo lasi alu ma, x'alu bee kilin kilin bula í xodila í la kewale jaxolu la.»

will be added

X\