KEWALOLU 28

1N kisininŋo xo, n x'a me xo wo sutto toxo xo Malite. 2Non moxolu xa n mutakubete. I xa taba lamana xa n bee kili xa na wo la, bawo sanjiyo tun be naxan, neno du tun b'a to. 3Poli xa loxo jaro kiika ta xo a b'a bulala ta to. Tafuntano koso, fofoono do bota x'é ɲelen a bulo la, x'a kin. 4Sutto to moxolu xa sa je tumo men a be ɲelennin Poli bulo la, i xo i ɲoxo ɲen xo: «Sikka nt'a to, ɲin xe in mu moxofaxala le ti; bawo a kisita xa bo xooxojiyo to, wo bee nin a ta, n na bolibatuta tilinninŋo man son a xa tu balunin.» 5Bari Poli xa sa gijigiji ta to. Fusi man ke a la. 6Wo moxo tunnu ɲala xo Poli bulo tun si fuunu, walla xo a si boyi xa sa wo no to. Bari i meta laxonolo la tumo men, x'a je xo fusi man ke Poli la, i la miiriyalu yelemata. I xo, xo Poli mu bolibatuta do le ti. 7Wo sutto ɲamoxoba men toxo xo Pubilusi, wo la dula tun xa sutu non na. A xa n mutakubete, xa n jigiya a la luwo xono tili saba xono. 8Pubilusi fa tun man kende. Xando nin xonotodiminŋo le tun b'a la. Poli taxata a bata xa Ala matara a ɲen x'a bulo la a xan, x'a lakendeya. 9Wo keninŋo, wo sutto moxo to mennu man kende, wo dulu bee nata Poli bata. I kendeyata. 10I bee xa n bunɲa bete. N be nala batonŋo tala tumo men, n maakuwo tun be fen wo fen na, i xa wo bee di n ma. 11Xaru saba tanbo xo, n xa Alekisandiri batonŋo do ta, xa taxa. Wo batonŋo be kilila xo: “Funelu”. Wo batonŋo tun xa neno waxato ke sutto batondanŋo do la. 12N sita Sirakusi gallo to, xa tili saba ke non. 13N boninŋo wo gallo to, n xa batonŋo bori dandanda la xa si Resiyo. Wo lun do, foɲo do tegeta xa bo banbugu mafanŋo. Tili fulananŋo, n sita Pusoli. 14N xa badin lannayabaxo dolu tara wo gallo to, mennu x'a ŋinin n fe, xo n xa loxokun kilin ke i bata. N sita Rome ɲin ɲa in ne ma. 15Badin lannayabaxolu mennu be Rome, wolu xa n xibaruya me tumo men, i nata n kunben fo Apiyusi Saxa to. Dolu nata n kunben dula do du, men toxo xo “Luntanjigidula Sabo.” Kabirin Poli x'e je, a xa barako bula Ala ɲen, do kafuta a juso ma. 16N sita Rome gallo xono tumo men, fankamalu sonta xa Poli bula dula do a danna, a nin sorodasi kilin, men b'a lakorosila. 17Tili saba tanbininŋo xo, Poli xa Rome Yahudiyalu la ɲamoxolu kili xa na a bata. I kamarita tumo men, a xo i ɲen xo: «Ń badinŋolu, haali x'a tara nte man fusi ke n na siya la, anin n benbalu la laada kuwolu la, i xa nte muta Yerusaleme xa ń dun Romengolu bulu. 18Wolu xa nte ŋininxa tumo men, i tunnu b'a fe xa ń bula, bawo i man fusi tara nte la kuwo to, men nin faxalo xa xan. 19Bari Yahudiyalu man son wo ma. A keta ń du ma waajibo ti x'a kuwo dun Rome mansaxe bulu. Bari wo nt'a yitala xo nte tun b'a fe xa ń na siya moxolu jalagi. 20Wo le x'a tu, nte x'alu kili walasa x'alu je, xa xuma alu ɲen; bawo Banisirayila moxolu gigo be men xan, nte be sitinin negejoloxo la wo le koso.» 21I xa Poli jaabi xo: «N man safe si soto xa bo Yude maro la í la kuwo to. Badin si du man bo je xa xibaru jaxu fo í la kuwo to. 22Bari n b'a fe x'é lame, í x'é hakililata fo, bawo n x'a lon xo í be kafo men to, moxolu wulita wo xanma dula bee.» 23I nin Poli benta lunŋo do to. Wo lunŋo, moxo kiikaba nata a tara a jatigila to. Poli xa kunnafirinŋo dolu di i ma, kabirin saxo ma, fo wura la. A xa Ala la Mansaya kuwo fo i ɲen. A tun b'a ŋininna x'e lason Isa la kuwo ma. Wo to, a tun be xumala Musa la sariya nin kilalu la kitaabolu xan i ɲen. 24Poli la xumolu xa dolu lason; bari dolu x'e ban xa lannaya ke. 25Wo moxolu man ben kilin to. Jannin i xa taxa, Poli xa ɲin xuma kilin in fo i ɲen xo: «Kila Esayi tun xa men fo alu benbalu ɲen, Ni Senunŋo barako to, wo tun mu tonɲa le ti. 26A tun x'a fo xo: “Taxa a fo ɲin siya in ɲen xo: Alu si melo ke ɲa wo ɲa, alu me faamuyali ke, alu si felelo ke ɲa wo ɲa, alu me jeli ke. 27Bawo ɲin siya in x'a jusukunŋo xoleya, i x'e tulolu sukki x'e ɲalu taxun walasa i ɲalu xana jeli ke, i tulolu xana meli ke, i xana faamuyali ke i jusukunŋolu la, i xana taxa i yelema nte Ala ma nin nte si i kendeya x'e kisi.” 28Wo to, Poli x'a fo i ɲen xo: “Alu xa xan x'a lon xo Ala la kisilo kita siya tolu ma. Wolu kennu s'a lame!” » [ 29Poli xa wo xumolu fo tumo men, Yahudiyalu taxata. I tunnu be i ɲoxo soosoxan bete.] 30Poli xa san fula dafaninŋo ke bunŋo do xono Rome, a tun be men sarala. Moxo men tunnu bee be taxala bola a ma, a tun be wolu lamutala. 31A tun be waajulo kela Ala la Mansaya xan, xa moxolu laxaran Marigi Isa Kirisita la kuwo to, x'a hakilo lasigininŋo tu, moxo si tun nte a balila xa wo ke.

will be added

X\