KEWALOLU 27

1A lategeta tumo men xo n xa dun batonŋo xono xa taxa Itali, Poli nin kasolamoxo do xotelu dunta sorodasi kuntigo do bulu xo Yulusi. Wo tun mu Rome mansaxe la sorodasi jama kuntigo le ti. 2Batonŋo do tun be nala bola Adaramite, xa taxa Asi baton danxanŋolu la. N dunta wo xono xa taxa. Arisitarake tun be n to, Tesalonikengo le mu xa bo Maseduwane jamano xan. 3Wo lun do, n sita Sidon. Yulusi tun be Poli mutakubetela. A sonta xo Poli xa taxa bo a xanuntelu ma, walasa a maakuwolu xa ɲiɲa. 4N bota non tumo men, n tanbita Sipere sutto senbo fe, katugala foɲo tun be n kunbenna. 5N xa xooxojiyo tege xa tanbi Silisi nin Panfili senbo to, xa si Mira, Lisi jamano xan. 6Sorodasi kuntigo xa batonŋo do tara non. Wo batonŋo bota Alekisandiri, a be taxanin Itali jamano xan. A xa n nadun wo xono. 7N xa tili kiika ke jiyo xan, batonŋo tun be taxala dondin dondin. N segeta bete jannin n xa si Kinidi gallo xoto. Foɲo tun be n balila xa taxa ɲafe; wo xanma, n tanbita Salamoni mafanŋo la, xa taxa Kereti sutto senbo la, foɲoba nte sila jan men. 8N xa xoleyaba soto xa tanbi wo sutto senbo fe. Wo xo, n sita dula do xo “Batondan Ɲumalu”. Wolu nin Lase gallo te man jan. 9N tunnu xa waxati jan ke taxamo la xa ban. Jixantaxamo tun keta faaratu kuwo ti, bawo neno tun sita. Yahudiyalu tunnu be sunna waxato men, wo tun tanbita xa ban. Wo le x'a tu, Poli x'e lasobi xo: 10«Ń xanuntelu, nte ɲa b'a la xo ɲin jixantaxama in mu faaratu kuwo le ti: A me laban nin tiɲalo man bo a to. A me dan batonŋo nin donolu doronnu ma, bari n fannu si sin no xa tu a to.» 11Bari sorodasi kuntigo tun be lanin batonnaborila nin batontigo la xumolu la xa tanbi Poli la xumolu xan. 12Wo batondanŋo tun man ɲin neno latanbo xanma. Wo le x'a tu, i kiika x'a latege xo i be bola je xa taxa Fenikisi, nin wo si ke no, Kereti jamano batondanŋo la, walasa xa neno latanbi non. Wo dula be ɲatilinnin banbugu tiliboyo nin saheli tiliboyo ma. 13Foɲo dondin tegeta xa bo banbugu mafanŋo tumo men, i tunnu hakilo la xo i xa men natege xo wo si sin xa ke. I wulita xa tanbi Kereti senbo fe. 14Bari a man me wo xo, foɲoba do wulita xa bo sutto to, nin wo be kilila xo “saheli kotonŋo foɲo”, wo nata ke i xan. 15Wo foɲoba xa batonŋo ta. N tunnu me fusi ta no foɲo kun. N xa n fannu tu a bulu. 16N tanbita suttendinŋo do banbugu mafanŋo la, wo toxo xo Koda. Wo dula xa n kisi foɲo ma. Xulunŋo men be n bulu lakisilo xanma, n sinta xa wo bo jiyo to, bari a man diya. 17I xa xulunŋo layele, x'a bula batonba xono tumo men, i xa batonba siti julo la. I tunnu be silala foɲo xana taxa batonba lasigi keɲo xan Libi jamano mafan. Wo to, faano mennu be batonŋo lataxala, i xa wolu lajigi, x'e fannu tu foɲo bulu. 18Bari foɲoba tun be n na batonŋo lamaxaxan bete haalisa fo wo lun do, i xa batonxonodono dolu fili jiyo to. 19A tili sabananŋo, i fannu bulolu xa batonmiranŋolu ta xa wolu fili xooxojiyo to. 20Tili kiika keta, tili wo, loolo wo, a si man bo. Foɲoba men ɲoxon man sa, wo tuta jaxuyanin. Kisilo gigo bee bota n na xa ban pewu. 21Batonxonomoxolu tunnu man domoli ke kabirin waxati jan. Wo to, Poli wulita x'é lo i temo to x'a fo i ɲen xo: «Ń xanuntelu, ate tunnu xa xan xa nte la xumo lame xa tu Kereti. Wo to, n tunnu si kisi ɲin tooro in nin ɲin tiɲali in ma. 22Bari saasa, nte b'a fola alu ɲen xo alu x'e ja sigi. Alu si niyo me tu a to, batonŋo doron ne be tula a to. 23Ala men ta mu nte ti, nin ń be baaro kela a ɲen, wo la melekiyo do x'é yita nte la, ɲin su in to. 24A xo ń ɲen xo: “Poli, í xana sila. Waajibo le mu í xa lalo Rome mansaxe ɲa xoto. Wo le koso, í nin moxo wo moxo be batonŋo xono, Ala be nala í nin wolu bee kisila a la ɲumaya koso ite la kuwo xanma.” 25Wo le x'a tu, ń xanuntelu, alu i ja sigi, bawo nte be lanin Ala la. A fota nte ɲen ɲa men, a si ke wo ɲa ma. 26Bari waajibo le mu, n xa taxa fili sutto do to.» 27Wo suwo tun mu n su tan nin naaninanŋo le ti jiyo xan. Foɲo tun be n nataxaxan xooxojiyo do xan xo Adiriyatike. Dugutala waxato, a keta batonnaborilalu ɲala xo n sutiyata xooxojidanŋo la. 28I xa sumannilanŋo bula jiyo to. I x'a tara xo a dinoya mu metere tan saba nin woorowula le ti. I xa sumannilanŋo fili jiyo to ɲafe dondin tugun, i x'a tara xo dinoya mu metere muxan nin sagi le ti. 29I tunnu be silala batonŋo xana taxa xosi kuro dolu la. Wo le x'a tu, negeba men be batonŋo lalola jiyo xan, i xa wo naani bula jiyo to, batonŋo xofe. I keɲeninŋo tun be saxuyelo laxononin. 30Batonnaborilalu tunnu b'a fe x'e bori xa bo batonŋo xono. I xa baton doxomandinŋo lajigi. Negeba mennu be batonŋo lalola jiyo xan, i x'a ke í xo nin i be taxala wo lelu bulala jiyo to, batonŋo ɲafe. 31Bari Poli xo sorodasi kuntigo nin sorodasi tolu ɲen xo: «Nin ɲin xe innu man tu batonba xono, alu me kisi no.» 32Wo to, sorodasolu xa baton doxomandinŋo julolu tege, x'a bula xa taxa. 33Saxuyelo sutiyaninŋo, Poli x'e bee kili domolo ma. A xo i ɲen xo: «Bi mu a tili tan nin naano le ti, alu hakilo man sigi, alu man domoli ke. 34Wo le x'a tu, nte be alu tarala x'alu xa domolo ke, bawo alu maakuwo be wo la, walasa alu xa kisi. Haali alu si kunsina kilin me sanko.» 35Wo xumo foninŋo xo, Poli xa buuro ta xa barako bula Ala ɲen i bee ɲala, wo xo, a x'a kutun kutun, xa domolo damuta. 36Wo to, i bee ja sigita, i dulu xa domolo ke. 37N moxo keme fula nin tan woorowula nin wooro le tun be batonŋo xono. 38I xa domolo ke tumo men x'e fa, i xa alixaamo fili xooxojiyo to, walasa batonŋo xa feya. 39Saxo yeleninma, batonnaborilalu tunnu man a lon i be dula men. I xa xooxojiyo bulo do je, keɲo tun be wo dula. I xo xo i nin batonŋo be taxala wo dula nin a si ke no. 40Wo to, negeba mennu be batonŋo lalola jiyo xan, i xa wolu firin x'e bo a la, x'e tu jiyo to, xa batonnaborilanŋolu julo firin. Wo xo, i xa batonŋo ɲafela faano lawuli, walasa foɲo xa tege. I x'e ɲatilin keɲo ma xa taxa. 41Bari batonŋo taxata sigi keɲo to, jiwoyo fula temo to. Batonŋo ɲafela tun dunta keɲo to, a korita bola a no to. Wo x'a tara fanfebalu be ma x'a xofela xosi, fo x'a tiɲa. 42Sorodasolu tunnu b'a fe xa kasolamoxolu bee faxa, walasa i xana i newu x'e bori xa taxa. 43Bari sorodasi kuntigo tun b'a fe xa Poli kisi. Wo le x'a tu, sorodaso tunnu b'a fe xa men ke, a x'e bali wo kela. A xa yanmaro di moxolu ma, mennu xa newulo ɲa lon, xo i fololu x'e bula jiyo to xa taxa xooxojixanŋo la. 44Tolu tunnu xa xan x'a lo i nofe xa yele yirikutunŋolu xan, walla batonŋo yiro dolu xan, xa taxa. Wo ɲa ma, i bee ɲuma sita xooxojixanŋo la.

will be added

X\