KEWALOLU 26

1Agiripa xo Poli ɲen xo: «Í si sin no xa xuma í la kuwo xan.» Wo to, Poli x'a bulo xotota xa xuma, x'a fan naxoyiya ten xo: 2«Mansaxe Agiripa, a diyata nte ɲen xa ń fan tara ite ɲa xoto bi, x'a yita í la xo Yahudiyalu be ń jalagila kuwo mennu bee to, xo wolu si nte tonɲa ti. 3Bawo ite fan xa Yahudiyalu la laada kuwolu nin i la soosoli kuwolu bee lon. Wo le x'a tu, ń b'é matarala í xa muɲa xa ń name. 4«Kabirin nte dindinŋo, nte bosilolu keta men ti, ń na siya to anin Yerusaleme, Yahudiyalu bee xa wo lon. 5I xa nte lon kabirin tuma jan. I si sin no xa nte seedeya nin a xa di i ɲen, xo nte tun be n na diino sila xolemanŋo le taxamala, nin wo mu Farisiyalu la silo ti. 6Ala xa lahido men ta n benbalu ɲen, nte gigo be wo xan, wo le x'a tu, kiito be tegela nte xan saasa. 7N na xabiile tan nin fulo bee gigo b'a xan xo wo lahido si latimme. Wo le x'a tu, i b'e balannin xa Ala batu, suwo nin tilo. Mansaxe Agiripa, wo gigo le x'a tu Yahudiyalu be nte jalagila. 8Mun na atelu Yahudiyalu b'a miirila xo Ala me sin no, xa furelu lakuni? 9Nte fan tun x'a miiri xo nte tun xa xan xa kuwo bee ke xa Nasareti Isa toxo kele. 10Ń xa wo le ke Yerusaleme. Sadaxalasibaxa kuntigolu xa fango di nte ma tumo men, ń xa lannayabaxo kiika bula kaso la. Nin i jalago tun keta faxalo ti, wo tun be diyaxan nte ɲen. 11Tuma kiika, nte tun si taxa Alabatusu nin Alabatusu, x'e tooro, x'e diyakuwa, xo i xa Isa toxo tiɲa. Ń diminkujaxo i xoto, nte tun be taxala fo gallu xotelu to, xa taxa i tooro.» 12«Wo ɲa ma, sadaxalasibaxa kuntigolu xa fango di ń ma, xa ń ki xa taxa Damasi. 13Mansaxe Agiripa, xa ń tu silo to, tilinkunte ma, ń xa keneya je xa bo sanŋo to. Wo keneya tun be ɲaranin tilo ta ti. A manata xa nte nin ń taxamaɲoxolu laminin. 14N bee boyita dugo ma. Nte xa xumaxanŋo do me, men x'a fo ń ɲen heburuxanŋo to xo: “Soli, Soli, mun na í be nte toorola? Í la xoleya nte fen ɲanna, í xo nin sarituura murutita xo a be senekela la guma tanna, wo nte fen ɲanna tuura ɲen ɲa men.” 15Ń xa ŋininxalo ke xo: “Ite mu jon ti, Marigi?” Marigi xa ń jaabi xo: “Nte mu Isa le ti, í be men tooroxan. 16Bari wuli í x'é lo. Nte xa ń yita í la, walasa í xa ke ń na baaradinŋo ti. Í si ke ń seedo ti, x'a fo moxo xotelu ɲen í xa ń je ɲa men bi. Ń be nala men yitala í la tugun, í si ke wo laxalibaxo ti. 17Ń s'í lakanta Yahudiyalu nin siya tolu ma, ń be í kila wo mennu ma. 18Ń be í kila walasa í xa i ɲa yele, x'e bo dibo to, x'e bula keneya la, x'e labo Sentane la fango xoto, x'e bula Ala la fango xoto. Nin i lata nte la, i si junubeyaafo soto, xa sigidula soto Ala la moxo senuyaninŋolu to.” » 19Poli x'é soto wo xumolu la tumo men, a xo mansaxe ɲen xo: «Wo le x'a tu, Agiripa, kuwo men yitata nte la xa bo sanŋo to, nte man ń ban wo ma. 20Bari ń xa Damasi nin Yerusaleme moxo lelu waaju folo; wo xo, Yude maro bee, anin siya tolu. Ń xo i ɲen xo i xa nimisi i la junubolu la x'e koppa Ala ma, xa kewale ɲumalu ke, mennu s'a yita xo i nimisita tigi tigi. 21Wo le x'a tu, Yahudiyalu xa nte muta Alabatusuba xono, i tunnu b'a ŋininna xa nte faxa. 22Bari Ala xa ń nakanta fo xa si bi ma. Ń be jan haalibi, xa ń na seedeya ke moxolu bee ɲen, moxondin nin moxoba. Kilalu nin Musa xo, xo kuwo mennu be nala kela, ń man xuma xote fo nin wolu nte. 23Wolu tunnu x'a fo xo Kirisita si tooro, xo a si ke folo ti xa kuni xa bo furelu to, anin xo a si kisilo xoyiya ń na siya nin siya tolu ɲen.» 24Xa Poli tu a fan naxoyiyala ten, Fesitusi fetenbeteta xo: «Poli, fa le be í to! Í xaranta fo í janxa fatoya!» 25Poli x'a jaabi xo: «Fa nte ń to, Fesitusiba. Nte be tonɲa xumo nin hakilitigiya xumo lelu fola. 26Mansaxe Agiripa be ɲin ku innu bee xalama; wo koso nte si sin no xa xuma hakililasigo to a ɲala. Nte be lanin a la xo ate xa wo kuwo bee lon, bawo a man ke dugu to. 27Mansaxe Agiripa, kilalu xa men fo, í be lanin wo la ba? Nte x'a lon xo í be lanin a la.» 28Agiripa xo Poli ɲen xo: «Í hakilo la x'é si nte ke no kerecenŋo ti ɲin waxatindin in xono?» 29Poli x'a jaabi xo: «A keta saasa ti wo, a keta lun xote ti wo, ń be Ala matarala a xana dan ite kilin doron ma, bari ate mennu bee be nte lamenin bi, x'alu dulu xa ke í xo nte be ɲa men, bari alu xana siti ɲin negejoloxo innu la, í xo nte.» 30Wo tumo, mansaxe anin goferenere, nin Berenise, anin moxo fen wo fen tun be i bata je, wolu bee wulita. 31I bota tumo men, i xo i ɲoxo ɲen xo: «Ɲin xe in man kujaxu si ke men nin faxalo xa xan, walla kasolabulo.» 32Agiripa xo Fesitusi ɲen xo: «Ɲin xe in tun si sin no xa bula nin a tun man a la kuwo dun Rome mansaxe bulu.»

will be added

X\