KEWALOLU 25

1Fesitusi sininŋo wo maro xono, wo tili sabananŋo, a bota Sesare gallo to xa taxa Yerusaleme. 2Sadaxalasibaxa kuntigolu nin Yahudiyalu la ɲamoxo dolu xa Poli sindun a ɲen. I xa Fesitusi matara, 3xo a xa Poli lana Yerusaleme. I xa wo fo, bawo i tunnu xa janfo siti a ma xo i b'a faxala silo to. 4Fesitusi x'e jaabi xo Poli be kaso la Sesare le, xo dondin ate fan be í koppala je. 5A xo: «Alu la kuntigo dolu xa taxa ń dandan Sesare. Nin i sita je, i xa ɲin xe in jalagi nin a x'a tara a xa ku jaxo do le ke.» 6Fesitusi man tanbi tili sagi, walla tili tan xan Yerusaleme, wo xo, a x'é koppa Sesare. Wo lun do, a x'é sigi kiititegedula, xa kila bula xo xa na Poli ti. 7Poli sininma, Yahudiya mennu bota Yerusaleme, wolu xa Poli laminin, xa kujaxuba kiika fo a ma, i me a yita no xo mennu mu tonɲa ti. 8Poli x'a da la a fan xan. A xo: «Nte man dun fen gasi to, Yahudiyalu la sariya wo, Alabatusuba wo, Rome mansaxe wo, ń man dun i fen si gasi to.» 9Fesitusi tun b'a fe x'a fan maadiya Yahudiyalu ma. Wo xanma, a xa Poli ŋininxa xo: «Í b'a fe ba xa taxa Yerusaleme, walasa í la kiito xa tege nte ɲa xoto ɲin ku in to?» 10Poli x'a jaabi xo: «Nte be lonin Rome mansaxe la kiititegedula, nte la kiito xa xan xa tege jan ne. Ń man kujaxu si ke Yahudiyalu la, ite fan xa wo lon pere. 11Nin jalago tun be nte ma, nin nte tun xa ku jaxo do le ke, men nin faxalo xa xan, nte me ń ban faxalo ma. Bari i be ń jalagila kunŋo men na, nin tonɲa si nte wo to, moxo si man xan xa nte dun i bulu. Nte b'a fe Rome mansaxe le xa ń na kiito tege.» 12Fesitusi nin a tonbenbaxolu xumata wo kuwo la tumo men, a xa Poli jaabi xo: «Í xa Rome mansaxe bata taxo le fo. Awa, í si taxa mansaxe bata.» 13Tili dantalu tanbininŋo xo, mansaxe Agiripa nin a mamusuwo Berenise nata Sesare gallo to. I taxata Fesitusi xonton. 14I xa tili kiika ke Sesare. Lun do, Fesitusi xa Poli la kuwo ɲafo mansaxe ɲen. A xo: «Felikisi xa xe do tu kaso la jan. 15Nte taxata Yerusaleme tumo men, sadaxalasibaxa kuntigolu nin Yahudiyalu la moxobalu xa wo xe sindun, x'a ŋinin nte kun xo nte xa kiito tege a xan, x'a yita xo a nin faxalo xa xan. 16Nte x'e jaabi xo Romengolu man xan xa moxo dun bulo to, jannin wo tigo nin a jalagibaxolu x'e ɲoxo je ɲa nin ɲa, xa wolu jaabi. 17Wo moxolu nin nte nata i ɲoxo fe jan. Nte man wo kuwo bula a xa me. Wo lun do, nte xa ń sigi kiititegedula xa kila bula xo i xa na wo xe ti. 18A jalagibaxolu wulita xa xuma. Bari nte tun x'a miiri xo i be nala a jalagila ku jaxo mennu to, a man tara wolu si ti. 19I tunnu nin Poli be i ɲoxo soosola i la diino kuwo le to, anin xe do la kuwo to xo Isa. Wo tun sata, bari Poli xo, xo a nilama le mu saasa. 20Nte tun man a lon ń si a ɲalabo ɲa men, wo le x'a tu, nte xa Poli ŋininxa nin a si son xa taxa Yerusaleme, a la kuwo kiito xa tege non. 21Bari Poli x'a ŋinin xo a la kuwo ɲabo xa tu Rome mansaxe fan ma. Wo tumo, nte xa yanmaro di, xo i x'a tu kaso la, fo nte x'a bula tumo men xa taxa Rome mansaxe bata.» 22Agiripa xo Fesitusi ɲen xo: «Nte fan b'a fe xa ɲin xe in name.» Fesitusi x'a jaabi xo: «Sinin, í s'a lame.» 23Wo lun do, Agiripa nin Berenise nata faamaya to. I nin sorodasi kuntigibalu nin gallo ɲamoxolu dunta i ɲoxo fe bunŋo xono. Wo xo, i nata Poli ti x'a la Fesitusi la yanmaro xan. 24Fesitusi xa xumo ta xo: «Mansaxe Agiripa, anin alu mennu bee fele jan, alu ɲa be ɲin xe in na, Yahudiyalu bee x'e la diminŋo yita ń na ate la kuwo to Yerusaleme, anin jan du, xa feten xo a xa xan xa faxa le. 25Nte ken bulu, a man kujaxu si ke, men s'a tu a si faxa. Bari ate fan xo x'a la kuɲa xa tu Rome mansaxe bulu. Wo le x'a tu, nte x'a latege x'a bula xa taxa je. 26Nte man xuma xoyiman si soto x'a safe, x'a ki marigi ma a la kuwo to. Wo le x'a tu, nte nata a ti alu ɲa xoto, sakuta ite fan mansaxe Agiripa ɲa xoto, walasa a ŋininxalo xo, nte xa fen soto ń si men safe. 27Bawo xa kasolamoxo do bula xa taxa Rome, a jalagikunŋo man fo x'a xoyiya, wo nte bennin.»

will be added

X\