KEWALOLU 24

1Tili luulu tanbininŋo xo, sadaxalasibaxa kuntigiba Ananiyasi nata Sesare, a nin moxoba dolu anin woka do xo Teretulusi. Kuwo mennu dunta i nin Poli te, i nata wo ɲafo Goferenere Felikisi ɲen. 2I taxata Poli kili xa na. I tunnu b'a jalagila kuwo men to, Teretulusi dunta a ɲa to x'a fo goferenere ɲen. A xo: «Goferenereba, n be heeraba men to bi, ite le barako to n xa wo soto. Í la hakilitigiya du x'a tu yelema kiika keta jamana in xono. 3N be í waleɲumalonna wo kuwolu bee la, waxato bee anin dula bee. 4Bari nte nt'a fe x'e lasigi xa me. Wo le x'a tu, ń be í tarala í xa beteya nte ma, xa n name ɲin waxatindin in xono. 5N x'a je xo ɲin xe in be moxolu toorola kujaxu. A be Yahudiyalu bee lamurutila duniya fanŋo bee. Ate le mu Nasaretingolu la diina kuntigo ti. 6A tun b'a fe xa haali Alabatusuba noxo. Wo le x'a tu, n x'a muta. [N tunnu b'a fe x'a la kiito tege x'a ben n na sariya ma. 7Bari sorodasi kuntigiba Lisiyasi nata a muta n na, barako la. 8Wo xo, Lisiyasi x'a fo Poli jalagibaxolu ɲen, xo i xa na ite Goferenere bata.] Nin í fan xa ɲin xe in ŋininxa, n b'a jalagila kuwo mennu to, í s'a lon xo wolu mu tonɲa le ti.» 9Yahudiyalu xa wo xumolu seedeya, x'a fo xo wo kuwolu keta ten ne. 10Wo to, goferenere xa taagumanseedo ke Poli ɲen xo xumo b'a bulu. Poli xa xumo ta xo: «Nte x'a lon xo í mu n na siya la kiititegela ti kabirin san kiika. Wo le x'a tu, nte nte silala xa ń fan naxoyiya í ɲa xoto. 11Í fan si sin no x'a lon, xo nte la nalo Yerusaleme xa Ala batu, wo man tanbi tili tan nin fula la folo. 12Moxo man ń tara soosoli la Alabatusuba xono, walla xa ń tara jama lamurutila Alabatusuwolu xono, walla gallo dula xote. 13Ɲin moxo innu me fusi fo no, men si a yita xo i be nte jalagila kuwo mennu to, xo wolu mu tonɲa le ti. 14Awa, nte ken be ń lola men na í ɲa xoto, wo mu le xo: Nte be baaro kela n benbalu la Ala le ɲen silo do xan, wolu xa silo men ke faniya ti. Kuwo mennu safeta Musa la sariya nin kilalu la kitaabolu to, nte lata wolu bee la. 15Nte gigo be lanin Ala xan, í xo i dulu gigo b'a xan ɲa men, xo furelu si kuni, moxo tilinninŋolu anin moxo tilinbalolu bee. 16Wo le x'a tu, nte be ń balanna tuma bee, ń jusukunŋo xa senuya Ala anin moxolu ɲa xoto. 17«Awa, san kiika tanbininŋo xo, nte nata Yerusaleme, xa ń na siya moxolu deema xaaliso la, anin xa sadaxo bo x'a di Ala ma. 18I nata nte tara wo kuɲa lelu la Alabatusuba xono. Nte tun be senuyanin. Jama tun nte ń nofe je, je tun nte ɲaxaminin du. 19Bari Asi Yahudiya do tunnu be je. Wo lelu tunnu xa xan xa ke í ɲa xoto jan xa nte jalagi, nin a x'a tara xo nte tun xa ku jaxo do ke wolu la. 20Nin wo nte, nte la kiito tegeta tumo men Yahudiyalu la Kiititegekafo fe, nin nte xa ku jaxo do le ke, moxo mennu be jan, i si wo fo í ɲen. 21Xa nte loninŋo tu i ɲafe, nte xumata barako to xa ɲin xuma kilin in ne fo xo: “Nte be lanin furekuniyo la, wo le x'a tu nte la kiito be tegela alu ɲa xoto bi!” » 22Awa, Felikisi tun xa lannaya kuwo lon bete, wo to, a xa kiito bula waxati xote ma. A xo: «Nin sorodasi kuntigiba Lisiyasi nata, nte si alu la kuwo kiito tege.» 23Wo xo, a xa yanmaro di sorodasi kuntigo do ma, xo a xa Poli tu kaso la je, x'a korosi, xo a xana a degu, xo nin a xanunte dolu b'a fe xa na bo a ma, xa fen do di a ma, a xa son wo ma. 24Tili dantalu tanbininŋo xo, Felikisi nin a musu Durusile nata. Wo muso tun mu Yahudiya le ti. Felikisi xa kila bula xa taxa Poli kili xa na. Poli tun be xumo mennu fola lannaya kuwo to, Isa Kirisita xan, a xa wolu lame. 25Bari Ala be moxo jaatela moxo tilinninŋo ti ɲa men, anin moxo xa xan x'é fan muta junubo ma ɲa men, anin kiiti labanŋo kuwo, Poli tun be xumala wo kuwolu xan tumo men, Felikisi silata. A xo Poli ɲen xo a xa taxa folo; xo nin a xa waxati xote soto, a si na a kili tugun. 26A tun hakilo la du, xo Poli be nala xaaliso le dila a ma. Wo le x'a tu, a tun be Poli kilila tuma kiika i xa xiidefata. 27San fula tanbininŋo xo, Porosiyusi Fesitusi sigita Felikisi no to. Felikisi tun b'a fe x'a fan maadiya Yahudiyalu ma, wo le x'a tu, a xa Poli tu kaso la.

will be added

X\