KEWALOLU 23

1Poli x'a ɲa lo Yahudiyalu la Kiititegekafo moxolu to x'a fo xo: «Ń badinŋolu, nte jusukunŋo senumanŋo le xa Alasilo taxama fo xa na si bi ma.» 2Sadaxalasibaxa kuntigiba Ananiyasi xa yanmaro di Poli senbetomoxolu ma xo i x'a te a da to. 3Wo to, Poli xo a ɲen xo: «Ala s'í du buwo, ite men be í xo tato men naxuuruta! Í be siginin jan xa kiito tege nte xan, x'a ben sariya le ma. Bari í xa sariya sooso, xa moxolu bula nte buwola.» 4Poli senbetomoxolu xo a ɲen xo: «Í be Ala la sadaxalasibaxa kuntigiba le nanila ten!» 5Poli x'a jaabi xo: «Ń badinŋolu, nte tun man a lon xo sadaxalasibaxa kuntigiba le mu. Bawo, a be safenin Kitaabo to xo: “Í xana xuma jaxu fo í la jamana dinŋolu la kuntigo ma.” » 6Poli tun x'a lon xo Yahudiyalu la Kiititegekafo tala kilinŋo tun mu Sadusenŋo lelu ti, tala do tun mu Farisiyalu ti. Wo le x'a tu, a fetenta Yahudiyalu la Kiititegekafo to xo: «Ń badinŋolu, nte mu Farisiya le ti. Ń na nin ń fa dulu mu Farisiya lelu ti. Nte gigo be furekuniyo le xan, wo le x'a tu, kiito be tegela nte xan.» 7A xa wo xumolu fo tumo men, Sadusenŋolu nin Farisiyalu sonxota fo jama talata. 8Katugala Sadusenŋolu b'a fola, xo furekuni nte kela, xo meleke nte je, xo ni xote du nte je; x'a tara Farisiyalu be lanin wo kuwolu bee la. 9Mankanŋo tun be bunɲala bete, Farisiyalu to, sariya karanmoxo dolu xa xumo ta barako to xo: «N man kujaxu si soto ɲin xe in na. Í s'a tara niyo do walla melekiyo do le xumata a ɲen.» 10Sonxo bunɲata kujaxu fo sorodasi kuntigiba silata, i xana taxa Poli joroxi. Wo le x'a tu, a x'a la sorodaso dolu bula xa jigi xa taxa Poli muta i la, xa taxa a ti sorodasolu la bunba xono. 11Wo suwo to, Marigi x'é yita Poli la x'a fo a ɲen xo: «Í timinadiya, í xa ń seedeya Yerusaleme ɲa men, waajibo le mu í xa wo seedeyalo ɲoxon ke Rome du.» 12Wo lun do saxo ma, Yahudiya dolu xa janfo siti Poli ma. I x'e xali xo i me domoli ke, walla x'e min, jannin i xa Poli faxa. 13Wo janfasitibaxo tunnu xa sa tan naani moxo ti. 14I taxata sadaxalasibaxa kuntigolu nin moxobalu bata x'a fo i ɲen xo: «N x'e xali xo n me fusi domo, jannin n xa Poli faxa. 15Wo to, alu nin Yahudiyalu la Kiititegekafo bee xa ben a to x'a ŋinin sorodasi kuntigiba fe saasa, a xa Poli lasi alu ma, x'a ke í xo nin alu b'a fe x'a la kuɲa le lon x'a xoyiya. Ntelu kennu be tobennin x'a faxa jannin a xa si jan.» 16Bari Poli mamusuwo dinxe xa i la janfo xumo me. Ate taxata sorodasolu la bunba xono xa wo fo Poli ɲen. 17Wo to, Poli xa sorodasi kuntigo do kili x'a fo a ɲen xo: «Taxa ɲin xamarindin in ti sorodasi kuntigiba bata, xumo do b'a bulu x'a fo a ɲen.» 18Sorodasi kuntigo nin xamarindin in taxata sorodasi kuntigiba bata, x'a fo a ɲen xo: «Poli men be kaso la xa nte kili xa ń matara xo nte xa na ɲin xamarindin in ti í bata, xo xumo do b'a bulu x'a fo í ɲen.» 19Sorodasi kuntigiba xa xamarindinŋo bulo muta xa taxa a ti senbo to, x'a ŋininxa xo: «Í b'a fe xa mun fo nte ɲen?» 20A x'a jaabi xo: «Yahudiyalu benta a to xo i b'a ŋininna í la, í xa taxa Poli ti i la Kiititegekafo ɲa xoto sinin, x'a ke í xo nin i b'a fe x'a la kuɲa le lon x'a xoyiya. 21Bari í lason, bawo i moxo men be nala i lala a ɲa, wo xa sa tan naani moxo ti. I x'e xali xo i me domoli ke, walla x'e min nin i man Poli faxa. Saasa, i be tobennin, i nte fusi laxononin nin í la jaabo nte.» 22Sorodasi kuntigiba x'a fo wo xamarindinŋo ɲen x'a xoleya xo: «Í xana a fo moxo si ɲen xo í xa ɲin janfa in fo nte ɲen.» Wo xo, sorodasi kuntigiba x'a bula xa taxa. 23Wo xo, sorodasi kuntigiba xa sorodasi kuntigi fula kili x'a fo i ɲen xo: «Alu sorodasi keme fula, nin sutigi tan woorowula, anin tanbatigi keme fula kamari. Alu bee x'e toben xa taxa Sesare gallo to, suwo leere xonontonanŋo. 24Alu suwo dolu toben walasa Poli xa taxa, a ɲuma xa si Goferenere Felikisi bata.» 25Wo xo, a xa safe do ke xo: 26«Nte Kulode Lisiyasi be Goferenereba Felikisi xontonna. 27Yahudiyalu tunnu xa ɲin xe in muta. I tunnu b'a fe x'a faxa. Nte x'a me tumo men xo Romengo le mu, nte nin ń na sorodasolu wulita, x'a bo bulo to. 28A tun xa kuwo men ke nin Yahudiyalu b'a jalagila, nte tun b'a fe xa wo lon. Wo le x'a tu, ń taxata a ti i la Yahudiyalu la Kiititegekafo ɲa xoto. 29Nte x'a tara xo i b'a jalagila kuwo men to, wo mu i fannu la sariya kuwo le ti. Bari a tun man fusi ke men s'a tu a si faxa walla x'a bula kaso la. 30A fota nte ɲen tumo men xo i dolu xa janfo siti Poli ma, wo no bee to, nte x'a latege x'a bula xa taxa í bata. Ń x'a fo a janfabaxolu ɲen xo i xa taxa a jalagikunŋo fo í fan ɲen.» 31Sorodasolu taxata Poli ti suwo to, fo Antipatirisi, í xo a fota i ɲen ɲa men. 32Wo lun do, sorodaso men tunnu be i sinŋo la, wolu x'e koppa bunba ma. Men tunnu be suwo xan, wolu nin Poli taxata. 33Sutigolu sita Sesare tumo men, i xa safe di goferenere ma xa Poli la kuwo dun a bulu. 34Goferenere xa wo safe xaran tumo men, a xa Poli ŋininxa xo a be bola mara joman xan? A x'a lon tumo men xo a be bola Silisi le, 35a xo Poli ɲen xo: «Nin í jalagibaxolu sita jan tumo men, nte si í lame.» A xo x'e xa Poli bula mansaxe Herode la xube xono, x'a korosi.

will be added

X\