KEWALOLU 22

1«Ń badinŋolu nin ń falu, alu ń name. Nte be nala xumala saasa xa ń fan naxoyiya.» 2I x'a me xo a be xumala i ɲen heburuxanŋo to tumo men, i xa do kafu i la de ma. Poli xo: 3«Nte mu Yahudiya le ti, xa wulu Tarasi men be Silisi. Bari ń bunɲata Yerusaleme jan fan ne. Gamaliyeli le xa ń naxaran n benbalu la sariya ma x'a xoyiya. Nte tun be tetositinin Ala kuwo to bete, í xo atelu bee be ɲa men bi. 4Moxo men tunnu be wo silo taxamaxan, nte tun be wolu tooroxan fo xa dolu faxa. Nte xa xelu nin musolu muta x'e bula kaso la. 5Sadaxalasibaxa kuntigiba nin moxobalu la kafo bee mu nte seedolu ti wo kuwolu to. Wolu xa safe dolu di nte ma xo ń x'e di n badin Yahudiyalu ma Damasi gallo xono. Ń tun taxata non xo ń be non lannayabaxolu mutala xa na i sitininŋo ti Yerusaleme jan, x'e tooro.» 6«Awa, xa nte tu silo to, fo ń sutiyata Damasi la, ɲakun kilin, tilinkunte waxato, keneyaba bota sanŋo to xa mana ń boxo bee. 7Ń boyita dugo ma, ń xa xumaxanŋo do me xo: “Soli, Soli, mun na í be nte toorola?” 8Nte x'a jaabi xo: “Í mu jon ti, Marigi?” A xo nte ɲen: “Nte mu Nasareti Isa le ti, í be men tooroxan.” 9Ń taxamaɲoxolu xa wo keneya je, bari men xumata ń ɲen, i man wo tigi xumaxanŋo me. 10Wo to, nte xa ŋininxalo ke xo: “Marigi, nte xa xan xa mun ke?” Marigi xo ń ɲen xo: “Wuli, í xa taxa Damasi gallo xono. Ala b'a fe í xa men ke, wo si fo í ɲen non.” 11Wo keneya ɲarakujaxo xa nte fiyonɲa. Wo xanma, nte taxamaɲoxolu xa ń bulo muta xa taxa ń ti Damasi. 12«Xe do tun be non, a toxo xo Ananiyasi, Alaɲasilanɲabaxo le tun mu. A tun be sariya silolu bee taxamala. Damasi Yahudiyalu bee tun be a toxo dimanŋo fola. 13A nata nte ma, x'é lo ń senbo to, x'a fo ń ɲen xo: “Ń badinxe Soli, í ɲalu xa yele tugun!” Wo no bee to, nte ɲalu yeleta, nte xa Ananiyasi je. 14A xo: “N benbalu la Ala x'é sugandi, walasa í x'a sago lon; anin men kilin be tilinnin, í xa wo je; anin x'a fan xumaxanŋo me. 15Katugala í xa kuwo mennu je, x'e me, í si ke a seedo ti wo kuwolu to, hadamadinŋolu bee ɲen. 16Í be mun naxonola tugun? Wuli xa batise, í la junubolu xa yaafa í ma, Marigi Isa toxo barako to.” » 17«Nte xa ń koppa Yerusaleme, xa nte tu taralo la Alabatusuba xono, Ala xa ku do yita ń na. 18Ń xa Marigi je, a xo ń ɲen xo: “Í tariya xa bo Yerusaleme, katugala je moxolu nte nala sonna í la seedeyalo ma nte la kuwo to.” 19Nte xo: “Marigi, i fannu x'a lon xo nte tun be dunna Alabatusuwolu xono xa lannayabaxolu muta x'e bula kaso la, x'e buwo. 20I x'é seede Eceni faxa tumo men, nte du tun be je. Nte tun sonta Eceni faxalo ma. Nte le keta a faxabaxolu la dorokolu lakorosibaxo ti.” 21Bari Marigi xo: “Taxa, katugala nte be nala í kila xa taxa dulajan, siya tolu bata!” » 22Jama tun be Poli la xumo lamela fo xa taxa si ɲin xuma in ma. Wo tumo, i fetenta x'a fo xo: «Ɲin moxo sifa in xa xan xa faxa xa bo duguxulo xan. A man xan xa tu í nila.» 23I kuleta x'e la dorokolu bo i xanna, x'e firifiri, xa buruxallo ko x'a sari sanŋo la. 24Sorodasi kuntigiba xa yanmaro di x'e xa Poli bula bunba xono, x'a buwo nin a si xuma, walasa a xa lon kunŋo men x'a tu jama be kulela a xanma ten. 25I xa Poli siti tumo men, xo i b'a buwola, sorodasi kuntigo do tun be je, Poli x'a fo wo ɲen xo: «Sariya be alu bulu ba xa Romenga yerewuluwo do buwo, x'a tara haali kiito man tege a xan?» 26Sorodasi kuntigo xa wo xumo me tumo men, a taxata a fo sorodasi kuntigiba ɲen xo: «Í be nala mun kela ten? Ɲin xe in mu Romenga yerewuluwo le ti de.» 27Sorodasi kuntigiba taxata Poli dula, x'a ŋininxa xo: «A fo ń ɲen, í mu Romenga yerewuluwo le ti ba?» Poli x'a jaabi xo: «Iyo.» 28Sorodasi kuntigiba xo: «Nte xa xaalisiba le sara, walasa ń xa ke Romengo ti.» Poli xo: «Nte mu a yerewuluwo le ti!» 29Wo no bee to, men tunnu xa xan xa Poli buwo, walasa a xa xuma, wolu x'e soobo a la. Sorodasi kuntigiba x'a lon tumo men xo Romengo le mu, a silata; bawo ate le xo xo i x'a siti. 30Yahudiya tunnu be Poli jalagila men to, sorodasi kuntigiba tun b'a fe xa wo jonjonŋo lon. Wo le x'a tu, wo lun do, a xa negejoloxo bo Poli la, xa sadaxalasibaxa kuntigolu nin Yahudiyalu la Kiititegekafo bee kamari. Wo xo, a nata Poli ti, x'a lalo i ɲa xoto.

will be added

X\