KEWALOLU 21

1N nin lannayabaxolu fatata tumo men, n xa batonŋo ta x'e tilin xa taxa Kosi. Wo lun do, n sita Rode. N bota non xa taxa Patara. 2N xa batonŋo do tara non men be taxala Fenisi. N dunta wo xono xa taxa. 3N sutiyata Sipere sutto la. N xa wo sutto tu n numanŋo xoto, xa taxa Siri jamano mafan. Batonŋo lota Tire danxanŋo la, katugala batonxonodono xa xan xa lajigi non. 4N xa lannayabaxo dolu tara non. N xa loxokun kilin ke wolu bata. Ni Senunŋo la lasobilo fe, wolu xo Poli ɲen xo a xana taxa Yerusaleme. 5Bari loxokunŋo dafata tumo men, n bulata n na taxamasilo xan tugun. Lannayabaxolu nin i musulu nin i dinŋolu bee taxata n bulasila fo gallo xo ma. N x'e ɲongi xooxojida la xa Ala matara. 6N xa i ɲoxo sixonton tumo men, n dunta batonŋo xono. Wolu x'e koppa xa taxa i bata. 7N bota Tire xa taxa Potolemayisi. Wo le keta n na xooxojixantaxamo danŋo ti. N xa badin lannayabaxolu xonton non, xa tili kilin ke i bata. 8Wo lun do, n bota non xa taxa Sesare gallo to. N dunta xibaru Dimanfola Filipe la luwo ma, xa jigi non. Moxo woorowulo men tunnu sugandita Yerusaleme, ate tun mu wolu to kilin ne ti. 9Dinxarafa naani tun be Filipe kun, wolu tunnu be kilaya kela. 10N xa tili kiika ke non. Wo xo, Ala la kila do nata xa bo Yude maro xono, a toxo xo Agabusi. 11Wo nata n ma. A xa Poli la tetositilanŋo ta x'a fan bulo nin a sinŋolu siti wo la. A xo: «Ni Senunŋo xa men fo wo fele xo: “Ɲin tetositilan in mu moxo men ta ti, Yahudiyalu si wo tigi muta Yerusaleme x'a siti ten, x'a dun Alalonbalolu bulu.” » 12N xa wo xumo me tumo men, n nin non badin lannayabaxolu xa Poli matara xo a xana taxa Yerusaleme. 13Wo to, Poli xa n jaabi xo: «Mun na alu be xasila, xa nte juso xasi? Nte tobenninŋo le mu xa siti. Wo doron nte, ń tobenninŋo le mu du xa sa Yerusaleme, Marigi Isa toxo nofe.» 14Ntelu korita taxo bola Poli juso ma tumo men, n x'a tu je. N xo: «Men mu Marigi sago ti, wo xa ke.» 15Tili dantalu tanbo xo, n x'e toben xa taxa Yerusaleme. 16Sesare lannayabaxo dolu xa n dandan xa taxa n ti Siperenga Manason na luwo ma, n xa xan xa jigi jan men. Ate tun xa lannaya ke kabirin waxati jan. 17N sita Yerusaleme tumo men, badin lannayabaxolu xa n jigiya ɲaɲo to. 18Wo lun do, Poli nin n taxata Yaxuba la luwo ma. Ala la jama moxobalu tunnu bee du kamarita non. 19Poli x'e xonton. Wo xo, a xa xumo ta, Ala xa kuwo fen wo fendin ke siya tolu to, ate la baaro fe, a xa wo bee kilin kilin ɲafo i ɲen. 20I xa wo me tumo men, i xa Ala tantu. Wo xo, i x'a fo Poli ɲen xo: «N badinxe, í ɲa b'a la xo Yahudiyalu moxo wulu kiika le xa lannaya ke. Wolu bee mu sariya batubaxa soobe lelu ti. 21A nata fo wolu ɲen xo Yahudiya mennu be siya tolu to, í be wolu ma x'e laxaran xo i xa Musa la sariya bula. Í x'a fo i ɲen xo i xana i dinŋolu ɲaxa, xo i xana Yahudiyalu la laadolu labatu. 22Awa, n si mun ke? A keta ɲa wo ɲa, i s'a lon xo í nata. 23Wo le x'a tu, n be nala men fola í ɲen, wo ke. Awa, xeba naani be n bata jan, mennu taguta Ala ɲen. 24Í nin wolu xa taxa x'alu senuya i ɲoxo fe. Í xa xaaliso bo walasa i kunŋo xa li. Wo ɲa in, moxolu bee si a lon xo i xa xumo mennu me í la kuwo to, xo wolu si nte tonɲa ti, bari xo ite fan be sariya silo taxamala. 25Awa, siya tolu mennu lata Isa la, n xa safe ki wolu ma xo i xana bolisosubu domo, walla jelo, walla jifo. I xa xan xa i fannu tanga jadoya ma.» 26Poli taxata wo xe naano ti. Wo lun do, a nin i x'e senuya i ɲoxo fe. Wo xo, a taxata Alabatusuba xono xa senuyalilunŋolu dafawaxato fo, wo xoto, i bee kilin kilin na sadaxo xa xan xa bo lun men. 27Tili woorowulo tun be ŋinin xa dafa tumo men, Asi maro Yahudiyalu xa Poli je Alabatusuba xono. I xa jama bee xonotosoli xa Poli muta. 28I fetenta xo: «Banisirayila dinŋolu, alu na n deema! Xe men be moxolu bee laxaranna dula bee, Banisirayila moxolu nin Musa la sariya, anin Alabatusuba xanma, wo fele. X'a kafu wo ma, a nata Gereko dolu ti Alabatusuba xono xa ɲin dula senuman in noxo.» 29I tunnu be wo fola, bawo Torofime men be bola Efesi, i xa wo nin Poli je i ɲoxo fe gallo xono. A keta i ɲala xo Poli x'a ladun Alabatusuba xono. 30Gallo bee ɲaxamita. Moxolu gidita xa bo dula bee xa taxa je. I xa Poli muta x'a saba x'a labo Alabatusuba xono, xa dalu taxun wo no bee to. 31I tunnu b'a fe xa Poli faxa tumo men, a taxata fo sorodasi kuntigiba ɲen xo Yerusaleme gallo bee be ɲaxaminin. 32Wo no bee to, a nin sorodasi kuntigo dolu nin sorodaso dolu x'e bori xa taxa jama mafan. Jama xa sorodasi kuntigiba nin sorodasolu je tumo men, i xa Poli buwolo dabula. 33Sorodasi kuntigiba x'é sodun Poli la x'a muta, xa yanmaruya di x'a siti negejoloxo fula la. Wo xo, a xa Poli ŋininxa xo: «Ite mu jon ti? Í xa mun ke?» 34Dolu tunnu be kulela xa xumo do fo, do xote tunnu be xuma xote fola. Sorodasi kuntigiba man fusi faamu i la wo xuma ɲaxamininŋolu to tumo men, a xa yanmaro di x'e xa taxa Poli ti sorodasolu la bunba xono. 35I sita yelelanŋo ma tumo men, sorodasolu xa Poli ta jama la fatiya koso, 36katugala jama bee tun b'a nofe, i tunnu be kulexan xo: «A xa faxa!» 37Sorodaso tunnu be Poli ladunna bunba xono tumo men, a xo sorodasi kuntigiba ɲen xo: «Nte si sin no xa xumo do fo í ɲen ba?» Sorodasi kuntigiba xo: «Jaxa í be gerekixanŋo mela. 38Wo tuma, Misirango men murutita laban in na, xa taxa moxofaxala wulu naani ti wulo xono, ite nte wo ti de?» 39Poli x'a jaabi xo: «Nte mu Yahudiya le ti. Tarasi men be Silisi jamano xono, ń wuluta non ne. Non mu gallu toxoma le ti. Ń b'é tarala í x'a tu ń xa xuma jama ɲen.» 40Sorodasi kuntigiba sonta. Xa Poli loninŋo tu yelelanŋo xan, a x'a bulo xotota moxolu ɲen. I bee x'e de. Poli xumata i ɲen heburuxanŋo to xo:

will be added

X\