1 Mankanŋo mafaxata tumo men, Poli xa lannayabaxolu kamari x'e jusudun. Wo xo, a x'é sara i la xa taxa Maseduwane. 2 Poli xa wo jamano tokutun, xa badin lannayabaxolu jusudun xuma kiika la. Wo xo, a taxata Geresi jamano xan, 3 xa xaru saba ke non. A tun b'a fe tumo men xa batonŋo ta, xa taxa Siri jamano xan, a x'a me xo Yahudiyalu xa janfo siti a ma. Wo to, a x'a latege xo a be í koppala Maseduwane fe. 4 A nin Sopatere taxata i ɲoxo fe, nin wo mu Pirusi dinŋo ti xa bo Bere, wo nin Arisitarake nin Sekundusi xa bo Tesalonike, anin Gayusi xa bo Derebe, wo nin Timote nin Tisike nin Torofime, wolu moxo fulo bota Asi maro la. 5 Wolu bulata n ɲa xa taxa n naxono Torowasi. 6 Ntelu kennu xa batonŋo ta Filipe, Buurufuunulantan sallo tanbo xo. A tili luulo, n x'e tara Torowasi, xa loxokun kilin ke non. 7 Tofoɲolunŋo, n tunnu be kamarinin Marigi la domolo xanma; Poli tun xa xan xa taxa wo lun do. Wo xanma, a xumata lannayabaxolu ɲen, xa me, fo dugutala. 8 N tunnu be kamarinin sankansuwo bunŋo men xono, lanpa kiika tun be non. 9 Xamarindinŋo do tun be siginin foloda la, a toxo xo Etikose. Ate sinnoxota bete; katugala Poli meta xumo la. Sinnoxo kujaxo bulu, a boyita dugo ma, xa bo wo sankansuwo sigi sabananŋo la. Moxolu nata a ta, bari i x'a tara a sata. 10 Poli jigita xa taxa í buti a kunna, x'a muta a bulu fulo to xo: «Alu xana sila, a be í nila.» 11 Wo xo, Poli yeleta tugun. A xa buuro tokutun, x'a domo. A xumata i ɲen xa me, fo xa saxo yele. Wo xo, a taxata. 12 I nin xamarindin in nilama taxata. Wo kuwo xa lannayabaxolu juso sumaya. 13 N bulata Poli ɲa, xa batonŋo ta xa taxa Asosi. N tunnu xa xan xa Poli ta wo gallo to. Ate tun b'a fe xa taxa non dugumasilo la, í xo a fan tun x'a latege ɲa men. 14 A xa n tara Asosi tumo men, n x'a ta xa taxa Mitilene. 15 N bota non xa taxa, xa si Kiyosi wo lun do. Wo tili fulananŋo, n sita Samosi. Wo lun do, n sita Mile. 16 Poli tun x'a latege xa tanbi Efesi gallo la x'a tara i man lo je, walasa a xana me Asi maro xan. A tun be keɲenin. A tun b'a fe nin a benta, Pantekoti lunŋo x'a tara Yerusaleme. 17 Poli x'é tu Mile, xa kila bula Efesi Ala la jama moxobalu ma, xo i x'a tara Mile. 18 I sita a bata tumo men, a xo i ɲen xo: «Ń badinŋolu, kabirin nte xa ń sinŋo bula Asi maro xono lun men, fo xa na a bula bi la, nte bosilo keta men ti alu ma, alu xa wo lon. 19 Nte xa baaro ke Marigi ɲen majigo to, xa tooro fo xa ɲajiyo bo. Yahudiyalu xa janfo siti nte ma tuma kiika, xa tooro kiika lasi nte ma. 20 Alu x'a lon xo ń man fusi tu dugunin alu ma, men si alu nafa. Nte x'alu waaju, x'alu laxaran jama to, anin alu la luwolu ma. 21 Ń x'a fo Yahudiyalu nin Gereko dulu ɲen xo i xa nimisi i la junubolu la, xa tuubi Ala ɲen, xa la n Marigi Isa la. 22 Saasa, nte be taxala Yerusaleme, katugala Ni Senunŋo xa wo waajibiya ń ma. Men be nala nte sotola je, ń man wo lon. 23 Ń x'a lon doron xo ń be tanbila gallu wo gallu la, Ni Senunŋo si ń nasobi xo kasoladunŋo nin toorolu be nte ɲa. 24 Bari nte nte ń fan na nilamaya jaatela. Ń be men jaatela, wo mu le xa ń na baaro lasi a danŋo ma. Marigi Isa xa baaro men xarifa ń ma xa wo ke x'a dafa. Wo baaro mu le, xa xibaru Dimanŋo fo, men be Ala la neemo yitala. 25 «Awa, x'a ta bi ma, ń xa Ala la Mansaya waajulo ke atelu fen wo fen bata, nte x'a lon xo atelu si ɲa me la nte xan tugun. 26 Wo le x'a tu, nte b'a fola alu ɲen bi x'a xoyiya xo: Nin men sankota, wo nte nte no ti. 27 Katugala nte xa Ala sago bee yita alu la, nte man fusi tu dugunin alu ma. 28 Al'alu fannu korosi, anin xa saaxagoore muume korosi, Ni Senunŋo x'alu lasigi men kunna. Alu i hakilo tu Ala la jama la, Ala xa men ke a ta ti, a fan Dinxe la saya fe. 29 Nte x'a lon, xo nte taxo xo, moxo jaxo dolu si dun alu to, í xo turuma be dunna saaxolu to ɲa men xa tiɲalo ke. 30 Alu fannu to jan, moxo dolu si wuli i nin faniya xumolu, xa lannayabaxolu lafili, x'e lalo i nofe. 31 Wo le x'a tu, al'alu fannu korosi. Al'alu hakilo tu a la xo san saba xono, nte ɲajiyo boto man alu kilin wo kilin tonbenno dabula. 32 «Awa saasa, nte be alu xarifala Ala ma, anin a la neemo xumo ma. Ate le si sin no x'alu barako bunɲa lannaya to, anin xa fen ɲumalu di alu ma, a xa mennu sigi a la moxo senuyaninŋolu bee ɲa. 33 Nte man ɲabo moxo si la xaalisi nin sanu nin faanu fe. 34 Alu fannu x'a lon xo nte xa baaro ke ń fan bulolu la, xa ń nin ń taxamaɲoxolu haajolu ɲiɲa. 35 Nte x'a yita alu la ɲa bee ma, xo n xa xan xa baaro ke ten walasa xa segebaxantunŋolu deema, xa n hakilo lajigi Marigi Isa fan na xumo la xo: “Heero be dilo le to, xa tanbi sotolo xan.” » 36 Wo xumolu foninŋo xo, Poli nin wolu bee x'e ɲongi xa Ala matara. 37 Lannayabaxolu bee xasita. I x'e sappi Poli ma, x'a baataya sixonton. 38 I la jusuxaso kunba tun mu men ti, wo mu le, bawo Poli tun x'a fo i ɲen xo i me a je bitugun. Wo xo, i taxata a bulasila fo batondanŋo la.
