KEWALOLU 2

1Pantekoti sallo lunŋo sininma, lannayabaxolu bee tun be kamarinin dula kilin. 2Ɲakun kilin, sonxo do bota sanŋo to. Wo sonxo be í xo foɲoba sonxoxanŋo. Lannayabaxolu sigininŋo be bunŋo men xono, sonxo xa wo bee suulu. 3I xa fen dolu tamanama je, mennu be í xo nenŋolu. I talatalata. Do jigita lannayabaxolu bee kilin wo kilin xan. 4Ni Senunŋo xa i bee jusukunŋo lafa. I keta a ma xa xan xotelu fo, Ni Senunŋo la yanmaro xono. 5Wo x'a tara Yahudiyalu Alaɲasilanɲabaxolu kiika tunnu be siginin Yerusaleme, mennu bota duniya siyalu bee to xa na. 6Wo mankanba bota tumo men, jama kamarita. Bee xonotofilita, bawo bee xa lannayabaxolu xanme xumala i fannu la xanŋolu to. 7I dabaro banta. I xonotofilininŋo x'e ɲoxo ŋininxa xo: «Ɲin mennu je xumala, i bee nte Galilengolu ti ba? 8Alan dunnu kilin wo kilin be n bata xanŋolu mela i da ɲa di? 9Paratengolu, nin Medengolu nin Elamitingolu anin mennu be siginin Mesopotami nin Yude nin Kapadosi anin Pon nin mennu be Asi maro to, 10nin Firiji nin Panfili nin Misira nin Libi maro men be Sireni senbo to anin mennu nata xa bo Rome, 11Yahudiyalu anin mennu x'e ke Yahudiyalu ti, Keretingolu nin Arabolu, n bee tulo x'e me Ala la kubalu laxalila n na xanŋolu to.» 12I bee dabaro banta. I hakilo ɲaxamininŋo tuta i ɲoxo ŋininxala xo: «Ɲin xoto mu mun ti?» 13Dolu jeleta lannayabaxolu ma; wolu xo: «I be fanin dolo dimanŋo le la.» 14Wo to, Piyere nin kiladin tan nin kilin tolu wulita x'e lo. A x'a xanŋo xotota x'a fo jama ɲen xo: «Alu Yahudiyalu anin alu moxo fen wo fen be siginin Yerusaleme, alu i tulo lo ń na xumolu la, xa ɲin faamu. 15Alu miiro la xo ɲin moxo innu be sunin ne; i sunin nte, bawo tilo wololafa le mu folo. 16Bari kila Yoweli xa men fo, wo le dafata saasa: 17“Ala xo: Labanŋo lunŋolu, nte si ń Niyo lajigi hadamadinŋolu bee xan Alu dinxelu nin alu dinmusolu si kilaya ke. Fenŋo dolu si yita alu la xamarindinŋolu la. Alu la xexotobalu si siibolu ke. 18Wo lunŋolu, sikka nt'a to, nte si ń Niyo lajigi ń na jonxelu nin ń na jonmusolu xan xa siya, i si ke kilalu ti. 19Ń si kawakuwolu yita sanŋo to, xa taagumanseedolu ke duguxulo xan: Jelo nin ta nin xaba siisima. 20Tilo si dibi, xaro si wule í xo jelo, jannin Marigi la lunŋo be nala, wo lunba nooroma. 21Wo tumo la, moxo wo moxo je Marigi toxo kili, wo si kisi.” 22«Banisirayila moxolu, alu i tulo lo ɲin xuma innu la. Nasareti Isa keta moxo ti, Ala xa men na kiladinɲa seedeya, kawaku sifa nin kubalu nin taagumanseedolu la, alu to. Alu fannu xa wo lon. 23Ɲin xe in dunta alu bulu x'a la a xan, Ala fan tun xa wo latege kabirin waxati jan. Alu xa Alalonbalolu bula a gengenna yiro ma, x'a faxa. 24Bari Ala x'a lakuni x'a bo saya tooro bulu, bawo sin tun nte saya ɲen x'a lamara. 25Mansaxe Dawuda tun xumata ate la kuwo to xo: “Ń ɲa be Marigi la ń ɲa xoto waxato bee, a be ń senbo to, walasa ń xana jarajara. 26Wo le x'a tu, ń jusukunŋo be fanin ɲaxalo la, ń be xumolu tala ɲaɲo to; haali nte sa xofe, nte gigo b'a xan xo nte balasubo si tu heero to, 27bawo, Marigi, í me í xodi nte la lahara; í me son í la moxo senunŋo xa toli xaburo xono. 28Í xa nilamaya banbalo silolu yita ń na, í si ń na ɲaxali bete, bawo í be nte senbo to.” 29«Ń badinŋolu, alu a tu ń xa ɲin ku in pereperelatege alu ɲen n mamaxe Dawuda la kuwo to. A sata, xa lasi. A xaburo be alan bata haalibi. 30Bari Dawuda fan tun mu kila le ti, a x'a lon xo Ala x'é xali a ɲen xo a si a bonsonŋo do ke mansaxe ti a no to. 31Men tun xa xan xa ke, Dawuda xa wo je wo lunŋo ɲa. A xo tumo men xo: “Xodiyo man ke a la lahara, a balasubo man toli xaburo xono.” A xa Kirisita la kuniyo le fo wo xumolu xono. 32Ń je men na xumo ma x'a fo ten, nin wo mu Isa ti, Ala x'a lakuni xa bo furelu to. N bee mu wo kuwo seedo ti. 33Wo le x'a tu a xototata tumo men, xa taxa Ala kininŋo xoto, a xa Ni Senunŋo soto, a Fa tun xa men lahido ta, a xa wo lajigi n xan. Alu ɲa be wo le la, alu tulo be wo le la. 34Dawuda fan man yele xa taxa sanŋo to, bari a x'a fo xo: “Marigi xo nte Marigi ɲen xo: Í sigi nte kininŋo xoto, 35fo nte x'é jaxolu mano, xa na i ti í sinŋo xoto.” 36Wo le x'a tu, Banisirayila bonsonŋo bee xa xan x'a lon tigi tigi, xo alu xa ɲin Isa in men gengen yiro ma, x'a faxa, Ala xa ate le ke Marigi nin Kirisita ti.» 37Jama xa wo xumolu lame tumo men, xuma innu dunbeteta i la. I woman innu xo Piyere nin kiladin tolu ɲen xo: «N badinŋolu, ntelu xa xan xa mun ke?» 38Piyere xo: «Alu tuubi, alu kilin wo kilin xa batise Isa Kirisita toxo la, nin alu la junubolu si yaafa alu ma. Wo to, alu si Ni Senunŋo soto. 39Bawo lahido tata alu nin alu dinŋolu bee le ɲen, anin dulajan moxolu, anin Marigi n na Ala be nala fen wo fen kilila.» 40Piyere xa xuma kiika xotelu fo, men s'i lason, x'e jusudun. A tun b'a fola i ɲen xo: «Alu i soobo ɲin tili in moxo jaxolu la.» 41Mennu sonta a la xumo ma, wolu batiseta. Moxo wulu saba ɲoxon kafuta lannayabaxolu la jama ma wo lunŋo. 42Tumo bee, i tunnu si taxa kiladinŋolu la xaranŋolu la, x'e lame, xa tu lannayabaxolu la kafo xono, xa buuro tokutun i ɲoxo te, xa Ala matara i ɲoxo fe. 43Alaɲasilanɲa tun be i bee la, bawo kiladinŋolu tunnu be kawakuwolu nin taagumanseedolu kiika kela. 44Lannayabaxolu bee tun b'e ɲoxo fe. I tunnu b'e bulufenŋolu bee talaxan i ɲoxo te. 45I tunnu b'e la duguxulolu nin i bulufenŋolu fiirila, x'e tala i ɲoxo te, x'a ben bee maakuwo ma. 46I tunnu xanbenninŋo si taxa Alabatusuba xono lun wo lun, xa domolo ke i ɲoxo fe i la luwolu xono, ɲaxalo nin fanmajigo xono. 47I tunnu si tu xa Ala tantu. I ku diyata moxo bee ɲen. Marigi tun si moxo dolu kisi lun wo lun, x'e kafu lannayabaxolu la jama ma.

will be added

X\