KEWALOLU 19

1Xa Apolosi tu Korente, Poli xa jamano kurumadulalu tofara, xa taxa si Efesi. A xa lannayabaxo dolu tara non. 2Poli xa wolu ŋininxa xo: «Alu xa lannaya ke waxato men, alu xa Ni Senunŋo soto ba?» I x'a jaabi xo: «Ntelu bada man Ni Senunŋo toxo me.» 3Poli xo: «Alu dunnu batiseta batiseliɲa joman ma?» I x'a jaabi xo: «Batiselila Yaya la ɲa.» 4Poli xo: «Yaya tun be batiselo men kela, wo b'a yitala xo moxolu nimisita i la junubolu la. A tun b'a fola xo men be nala ate xofe, nin wo mu Isa ti, xo Banisirayila moxolu xa la wo la.» 5I xa ɲin xuma innu me tumo men, i batiseta Marigi Isa toxo la. 6Poli x'a bulo la i xan tumo men, Ni Senunŋo jigita i xan. I xa xan xotelu fo, xa kilaya ke. 7Wolu moxo tun be taxala i lola tan nin fula ma. 8Poli tun be taxala Alabatusuwo xono xa xuma moxolu ɲen. A hakilo lasigininŋo xumata i ɲen Ala la Mansaya xan, xaru saba xono. A x'e balan x'a lamebaxolu lason. 9Bari dolu x'e tulo xoleya, i man son xa lannaya ke. I tunnu be xuma jaxolu fola, xa Marigi la silo toxosi jama ɲala. Wo tumo, Poli x'e tu je, a nin lannayabaxolu xa taxa i danna x'e laxaran lun wo lun Tiranusi la xarandula. 10A xa wo ke san fula xono, fo Asi maro moxolu bee, Yahudiyalu anin Gerekolu, xa Marigi la xumo me. 11Ala barako to, Poli tun be kawakubalu kexan, 12fo haali faano walla misooro men tunnu je maxa Poli balo la, moxolu tunnu si wolu ta xa taxa wolu la jangarutolu xan. Wolu tunnu si kendeya, jinnolu tunnu si bo jinnetolu to. 13Yahudiya dolu, men tunnu b'e yaalala xa jinnolu xoyi xa bo moxolu to, wo dulu x'a mafele xo i be jinnolu xoyila Marigi Isa toxo la. I xo jinnolu ɲen xo: «Poli be waajulo kela Isa men toxo la, ń b'a fola alu ɲen wo toxo la, alu bo ɲin moxo innu to!» 14Men tunnu be wo baaro kela, wolu mu Yahudiyalu la sadaxalasibaxa kuntigo do le dinxe woorowulo ti, men toxo xo Sewa. 15Bari jinno x'e jaabi xo: «Ń xa Isa lon, ń xa Poli du lon, bari atelu mu jonnu ti?» 16Wo jinneto x'é ke i xan. A kilin x'e bee mano. A x'e buwo bete fo i x'e bori xa bo a la luwo ma, i balamaxulunŋo nin i joogininŋo. 17Yahudiyalu nin Gerekolu men tunnu be siginin Efesi, wolu bee xa ɲin me. I bee silata, xa Marigi Isa toxo bunɲa. 18Mennu xa lannaya ke, wolu kiika nata i lo i la kujaxu keninŋolu la moxolu bee ɲala. 19Doomalu kiika nata i nin i la doomaya bukkolu, xa wolu jani moxolu bee ɲala. Wo bukkolu sonŋo jaate be bennin xaalisixoyo tan luulu wulu le ma. 20Wo ɲa ma, Marigi barako to, Ala la xumo jenjenta, xa sinŋo soto. 21Wo kuwolu keninŋo xo, Poli x'a latege xa tanbi Maseduwane nin Akayi jamanolu la, xa taxa Yerusaleme. A tun b'a foxan xo: «Nin ń taxata je tumo men, ń xa xan xa taxa Rome du.» 22A x'a deemabaxolu to moxo fula, Timote nin Erasite ki xa taxa Maseduwane. Bari a fan tuta Asi folo xa waxati ke je. 23Wo waxato, murutiliba do wulita Marigi la silo koso. 24Siyaxo do tun be je xo Demetiriyusi. Efesingolu la bolibatuta musuma men tun be je xo Aratemisi, ate tun be wo la batusuwo ɲoxon nelu darala xaalisixoyo la. Wo tun be nafaba lasila wo baaro kebaxolu ma. 25Lun do, Demetiriyusi xa wolu nin i siyaxeɲoxolu kamari x'a fo i ɲen xo: «Awa, alu x'a lon xo ntelu be nafaba sotola ɲin baara in ne to. 26Bari kuwo men b'é son, nin alu ɲa nte a la, alu tulo b'a la. Ɲin Poli toxo in b'a foxan xo moxolu la bolibatuta daraninŋolu nte fusi ti. A xa moxo kiika lason Efesi jan. Jan kilin nte, a be ŋinin xa Asi maro bee lason. 27Ɲin kuwo si son xa n na baaro tiɲa. X'a kafu wo ma, n na bolibatutaba musuma Aratemisi la batusuwo si mafele fuwo ti. Asi maro bee, anin duniya moxolu bee be wo bolibatuta musuma in men batula, tango si bo wo xan.» 28Wo moxolu xa wo xumo me tumo men, i diminbeteta xa ke a ma xa feten xo: «Efesingolu la Aratemisi le mu fenba ti!» 29Wo mankanŋo xa gallo bee ɲaxami. Poli taxamaɲoxo fula tun be je. I toxo xo Gayusi nin Arisitarake, wolu tunnu mu Maseduwanengo lelu ti. I gidita wolu xan, x'e muta, i nin i xa taxa jama kamaridula. 30Poli tun b'a fe xa taxa wo dula, bari lannayabaxolu x'a bali xa taxa je. 31Asi maro kuntigiba dolu tunnu mu Poli xanunte lelu ti. Wolu xa kila bula Poli ma x'a matara xo a xana taxa jama kamaridula. 32Wo waxato, jama tun be ɲaxamo xono. Si nin si la xumo nte kilin ti. Bee be kulela x'e ta fo. I tala si tun man haali i ɲoxotara kunŋo lon. 33Moxo dolu xa wo kuwo ɲafo xe do ɲen xo Alekisandere. Yahudiyalu xa ate bula i ɲa. A x'a bulo xotota xo a b'a fe xa xuma jama ɲen. 34Bari jama x'a lon tumo men xo Yahudiya le mu, i xa leere fula ɲoxon ke i bee be fetenna xo: «Efesingolu la Aratemisi le mu fenba ti!» 35Gallo safelila sinta xa jama lade, a xo: «Efesingolu, bee x'a lon xo Efesi gallo le mu Aratemisiba la batusuwo korosibaxo ti anin a nataliye men butunta xa bo sanŋo to. 36Soosoli nte wo kuwo to. Wo le x'a tu, alu i mafaxa, alu xana fusi ke alu kunfe. 37Alu bagata ɲin xe fula innu ma, xa na i ti x'a tara i man fusi suuɲa batusuwo xono, i man xuma jaxu du fo n na bolibatuta musuma ma. 38Awa nin ku benbalo do dunta Demetiriyusi nin a baarakeɲoxolu nin moxo do te, kiititege bunŋolu be je, kiititegela dulu be je i si wo ɲa fo mennu ɲen. 39Nin ku xote be alu ma, wo si ɲabo sariya la kiititegekafo fe. 40Murutilo men keta bi, n si sin no xa jalagi wo to. Kun si tun nte n na ɲoxotaro la. N me sin no xa kun jonjon soto x'a fo n na ɲin ɲoxotara in na.» 41Gallo safelila xa wo fo, wo xo, a xa jama labula.

will be added

X\