1 Wo xofe, Poli bota Atene xa taxa Korente. 2 A xa Yahudiya do tara je, a toxo xo Akilasi. Wo be bola Pon maro la. A nanin kuto le tun mu xa bo Itali jamano xan, a nin a musu Pirisiye. Wo keta bawo mansaxe Kulode tun x'a fo xo Yahudiyalu bee xa bo Rome. Poli nin i kafuta. 3 A tuta i bata i xa baaro ke i ɲoxo fe, bawo i fulo bee tun be baara sifa kilin ne kexan. Tillisidarala le tunnu mu. 4 Poli tun be xumo tala Alabatusuwo xono, tofoɲolun wo tofoɲolun. A tun b'a ŋininna xa Yahudiyalu nin Gerekolu bee lason. 5 Kabirin Silasi nin Timote nata xa bo Maseduwane jamano xan, Poli x'a la waxato bee ke waajulo la, x'a yita Yahudiyalu la xo Isa le mu Kirisita ti. 6 Yahudiyalu xa Poli sooso, x'a nani. Wo to, a x'a la faanolu banxo gijigiji i xanma x'a fo i ɲen xo: «Nin alu man kisi, wo mu alu fannu no le ti. Jalagi nte nte ma. Kabirin saasa, nte be taxala siya tolu bata.» 7 Poli bota non xa taxa Ala batubaxo do bata xo Titiyusi Yusitusi. Wo tun na luwo be Alabatusuwo senbo to. 8 Alabatusuwo kuntigo Kirisipusi nin a la dinbaya bee lata Marigi la. Korentengo mennu dalita Poli la xumo lamela, wolu kiika xa lannaya ke xa batise. 9 Lun do suwo to, Marigi x'é yita Poli la, x'a fo a ɲen xo: «Í xana sila. Tu xumala haalibi, í xana í de, 10 bawo nte be í senbo to. Moxo si me kujaxu ke no í la, katugala nte la moxo xa sa ɲin gallu in to.» 11 Poli tuta Korente xa san kilin nin xaru wooro ke je. A tun be moxolu laxaranna Ala la xumo ma. 12 Galiyon tun mu Rome la goferenere ti tumo men, Akayi maro kunna, Yahudiyalu benta ku to Poli xanma. I x'a lasi kiititegedula. 13 I xo: «Ɲin xe in b'a ŋininna xa moxolu hakilo yelema, xo i xa Ala batu ɲa do ma, ɲa men be n na sariya soosola.» 14 Poli xo x'a be xumo tala tumo men, Galiyon xo Yahudiyalu ɲen xo: «Atelu Yahudiyalu, nin a tun fota xo ɲin xe in xa kujaxuba do le ke walla ku benbalo do, nte tun si alu lame bete. 15 Alu be i ɲoxo soosola xumolu nin toxolu nin alu fannu la sariya kuwo lelu to, wo xanma, wo ɲabo be alu fan nelu ma. Nte nte sonna xa wo kuwolu kiito tege.» 16 Wo to, Galiyon x'e xoyi xa bo kiititegedula. 17 Wo keninma, i bee xa Alabatusuwo kuntigo Sositene muta x'a buwo kiititegedula, bari Galiyon man wo jaate. 18 Poli tuta Korente xa waxati jan ke je. Wo xo, a bota badin lannayabaxolu bata. A nin Pirisiye nin Akilasi xa batonŋo ta xa taxa Siri jamano xan. Poli tun x'a kunŋo li Sankere, bawo a tun taguta kuwo do la Ala ɲen. 19 I sita Efesi gallo to. Poli nin a taxamaɲoxolu talata non. A taxata Alabatusuwo xono, a nin Yahudiyalu xa xuma. 20 Wolu x'a matara xo a xa waxati ke i bata, bari Poli man son. 21 A bota i bata, x'a fo i ɲen xo: «Ń si ń koppa alu bata ma, nin Ala sonta.» Wo xo, a dunta batonŋo xono Efesi xa taxa. 22 A jigita Sesare gallo to, xa taxa Yerusaleme, xa Ala la jama moxolu xonton non. Wo xo, a taxata Antiyosi. 23 Poli xa waxato do ke non, wo xo, a taxata. A xa Galasi maro bori, wo xo, a xa Firiji jamano bori, xa lannayabaxolu bee jusudun lannaya to. 24 Yahudiya do sita Efesi. A toxo xo Apolosi. A wuluta Alekisandiri gallo le to. A tun si sin xumo la bete. A tun xa Kitaabo xono xumolu lon bete. 25 Wo xe tun be xarannin Marigi la silo la. Juso tun b'a la xa Isa la kuwo fo, anin xa moxolu laxaran x'a xoyiya. Bari a tun xa Yaya la batiselo doron ne lon. 26 Apolosi xa waajulo damuta Alabatusuwo xono a hakilo lasigininŋo. Pirisiye nin Akilasi x'a la xumolu me tumo men, i nin a taxata i bata, x'a laxaran Ala la silo la, x'a toxoyiya bete a ɲen. 27 Wo xo, a diyata Apolosi ɲen xa taxa Akayi. A badin lannayabaxolu x'a jusudun, xa safe do ki non lannayabaxolu ma xo i x'a mutakubete. A sita non tumo men, a xa moxolu deema bete, men tunnu keta lannayabaxolu ti Ala la neemo barako to. 28 A la xumolu xa sinŋo soto Yahudiyalu la xumolu xan moxolu bee ɲala. A x'a yita Kitaabo xumaxanŋolu la, xo Isa le mu Kirisita ti.
