KEWALOLU 17

1Poli nin Silasi tanbita Anfipolisi nin Apoloni la, xa taxa si gallo do to xo Tesalonike. Yahudiyalu la Alabatusuwo do tun be non. 2Poli dunta wo xono í xo a dalita a kela ɲa men. A xa moxo mennu tara je, a xa tofoɲolun saba ke a be xumala wolu ɲen x'a la Kitaabo xumaxanŋo xan. 3Poli tun b'a yitala x'a laxoyiya i ma xo waajibo le tun mu Kirisita xa tooro, xa sa; wo xo, a xa kuni xa bo furelu to. A tun b'a fola xo: «Nte be Isa men na xumo fola alu ɲen, wo le mu Kirisita ti.» 4Yahudiya dolu, nin Gereki Ala batubaxo kiika anin musu toxobonin kiika lata Isa la, xa kafu Poli nin Silasi ma. 5Bari wo kuwo xa Yahudiyalu lakiiliya. I xa gallo moxo kuntanŋo dolu kamari men tunnu be bedolu fe, x'e bula sonxo kela, xa gallo ɲaxami. I taxata Jason na luwo ma, xa Poli nin Silasi ŋinin, xo i be taxala i tila jama ɲa xoto. 6I man wolu tara non tumo men, i xa Jason nin lannayabaxo dolu muta xa taxa wolu ti gallo fankamalu bata. I tunnu be fetenna xo: «Ɲin xe in mennu xa duniya bee ɲaxami, i fele innu ti jan saasa. 7Jason x'e jigiya a bata. I bee be Rome mansaxe la sariya soosola x'a fo xo mansaxe xote be je, nin wo mu Isa ti.» 8Galluxonomoxolu nin fankamalu xa wo xumolu me tumo men, i hakilo ɲaxamita. 9Jason nin a toɲoxolu tunnu xa xan xa xaalisi jaate do sara fankamalu ma, walasa i xa bula. 10Suwo kuta doron, badin lannayabaxolu xa Poli nin Silasi bula xa taxa Bere. I sita gallo xono tumo men, i taxata Yahudiyalu la Alabatusuwo xono. 11Bere Yahudiya tunnu xa ɲin Tesalonike Yahudiyalu ti. I xa Ala la xumo lame nitodiya to. I tunnu be Kitaabo xaranna lun wo lun, x'a mafele nin Poli la xumolu mu tonɲa le ti. 12I kiika xa lannaya ke. Gerekolu to, faamamusolu nin xebalu dulu kiika xa lannaya ke. 13Bari Tesalonike Yahudiyalu x'a lon tumo men xo Poli be Ala la xumo foxan Bere du, i nata non du xa jama ɲaxami, x'a xonotosoli. 14Wo no bee to, badin lannayabaxolu taxata Poli ti xooxojiyo mafan, bari Timote nin Silasi tuta Bere. 15Poli bulasilabaxolu taxata a ti fo Atene. Wo xo, i x'e koppa Bere. Poli x'e ki Silasi nin Timote ma, xo i xa i tariya xa na a tara Atene. 16Xa Poli tu Silasi nin Timote laxononin Atene, a x'a je xo gallo be fanin bolibatutalu la. Wo kuwo x'a tooro bete. 17Wo xanma, a tun be xumala Alabatusuwo xono, Yahudiyalu nin siya xotelu ɲen, mennu be Ala batula. Lun wo lun, a tun be taxala dakeno la, xa xuma non taxabaxolu bee ɲen. 18Moxo hakilitigolu mennu be kilila xo Epikure la xarandinŋolu nin Sitoyisenŋolu, wolu dolu tunnu nin Poli be xumaxan. Dolu b'a fola: «Ɲin xuma fufola in b'a fe xa mun fo?» Do xotelu xo: «I s'a fo xo: A be bolibatuta xote lelu la xumo fola.» Poli ken tun be xumala Isa nin furekuniyo le xan. 19I xa Poli kili i nin a xa taxa gallo Ayeropasi la, nin wo mu hakilitigolu nin kiititegelalu la dula ti. I xo a ɲen xo: «Í be xaran kuto men fola, ntelu si do me no wo xan ba? 20Bawo í be xumo mennu fola, ntelu man wolu ɲoxon me abada, n b'a fe xa wolu faamu.» 21Atenengolu bee, anin siginfelu mennu b'e bata, wolu tunnu be i la waxato tala bee kela xibaruya kutolu tofolo nin i lamelo le la. 22Poli wulita x'é lo jama tema, Ayeropasi la, x'a fo xo: «Atenengolu, nte x'a korosi xo alu be tetositinin Alaŋininŋo to ɲa bee do ma. 23Bawo nte yaalayaalato alu la gallo xono, ń xa alu la batulidulalu kiika je. N x'alu la sadaxajanidula do je, a be safenin wo xan xo: “Ala men nte lonnin, wo la sadaxajanidula.” Awa, alu be men batula x'a tara alu man a lon, nte be nala wo le la kuwo fola alu ɲen. 24Ala men xa duniya nin a xono fenŋo bee da, sanxulo nin duguxulo Marigi, wo sigidula nte moxolu la batusu loninŋolu ti. 25Ala maaku nte a la du xo moxo x'a la baaro ke, a be í xo nin a haajo le tun be fen do ma; katugala ate fan ne be nilamaya nin nilakiliyo nin fen bee dila moxo bee ma. 26A xa siyalu bee da x'e labo moxo kilin to, x'e lasigi duguxulo dula bee. A xa danŋo sigi i la waxatolu nin i sigidulalu ma. 27A xa wo ke walasa i xa Ala ŋinin x'a je moomolo la, nin wo tun si ke no. Tonɲa la, Ala man jan n si la. 28Bawo: “Ate le barako to, n be i nila, n be i lamaxala anin n be je.” Alu la ŋaara do dulu x'a fo xo: “N mu Ala dinŋolu ti.” 29N mu Ala dinŋolu ti, wo xanma, n man xan x'a miiri xo Ala be le í xo sano walla xaalisixoyo walla kuro, moxo xa men dara a fan na hakilitigiya nin a sinkuwo bee la. 30Bari Ala nte wo waxato lonbaliya kuwolu jaatela tugun, bari saasa a be moxolu bee kilila dula bee xo i x'e xodi i la junubolu la. 31A xa lunŋo do latege a si kiiti tilinninŋo tege duniya xan lun men. Wo kiito tegebaxo si ke moxo do ti, Ala fan xa men sugandi. A xa taagumanseede lankenemaninŋo di moxo bee ma wo la kuwo to; bawo a xa wo lakuni xa bo furelu to.» 32I xa furekuniyo me Poli la tumo men, dolu jeleta a ma, dolu xo: «N si í lame wo kuwo to sinɲa xote.» 33Wo to, Poli bota i bata xa taxa. 34Bari haali wo, dolu nin Poli tuta. Wolu xa lannaya ke. Mennu xa lannaya ke, Denisi be wolu to, ate mu Ayeropasi moxo do ti, anin muso do, xo Damarisi, anin do xotelu.

will be added

X\