KEWALOLU 16

1Poli taxata Derebe, wo xo, a taxata Lisitere. Lannayabaxo do tun be non, men toxo xo Timote. A na tun mu Yahudiya le ti, men xa lannaya ke. Bari a fa tun mu Gereko le ti. 2Lisitere nin Ikone lannayabaxolu tunnu be Timote toxoɲuma fola. 3Poli tun b'a fe a xa ke a taxamaɲoxo ti. A xa Timote ɲaxa wo jamano Yahudiyalu koso, bawo i bee tun x'a lon xo a fa mu Gereko le ti. 4Poli nin a taxamaɲoxo taxata galluba wo galluba to, kiladinŋolu nin moxobalu xa kuwo mennu latege Yerusaleme, i xa wolu fo lannayabaxolu ɲen anin x'a fo i ɲen xo i xa wo silo taxama. 5Ala la jamalu tunnu be sinsinxan lannaya to. Lun wo lun, do tun be kafuxan lannayabaxolu ma. 6Poli nin a taxamaɲoxolu xa Firiji nin Galasi marolu tofara, bawo Ni Senunŋo tun x'e bali xa Ala la xumo fo Asi maro xono. 7I sita Misi jamano dunda la tumo men, i x'a mafele xa taxa Bitini, bari Isa Ni Senunŋo x'e bali xa taxa non. 8Wo keta tumo men, i xa Misi jamano tofara xa taxa Torowasi. 9Wo suwo to, Ala xa kuwo do yita Poli la. A xa Maseduwane xe do je lonin, wo x'a matara xo: «Na Maseduwane jamano to, xa n deema!» 10Poli xa wo je doron, n x'a ŋinin xa taxa Maseduwane jamano xan, bawo n x'a lon xo Ala xa n kili xa taxa xibaru Dimanŋo fo wo jamano moxolu ɲen. 11N xa batonŋo ta Torowasi, x'e tilin xa taxa Samotarasi. Wo lun do, n taxata Neyapolisi. 12N bota non xa taxa Filipe, nin wo mu Maseduwane jamano galluba do ti. Non be Romengolu la maro xono. N xa tili kiika ke wo galluba to. 13Tofoɲolunŋo, n bota gallo xono, xa taxa xoda la, n tunnu hakilo la xo n si Alamataradula tara non. N x'e sigi wo dula. N xa xumo dolu fo musolu ɲen, men tunnu kamarita je. 14Muso do tun be i to xo Lidi, Tiyatirengo le mu. A tun be faanu wulen bete fiiro le la. Ala batubaxo le tun mu. A tun be n namela. Marigi x'a jusukunŋo dayele walasa a xa Poli la xumolu lame bete. 15Lidi nin a la luxonomoxolu batiseta tumo men, a xa n matara xo: «Nin alu b'a jaatenin xo nte be lanin Marigi la, alu na jigi nte bata.» A x'a ke n bulu waajibo ti n xa son. 16Lun do, n taxato Alamataradula, n nin jonmuso do benta: Jinno le b'a to, a tun be felelo kela wo le barako la. A tun be xaalisi kiika lasixan a marigilu ma wo felelo to. 17Wo musu jinneto x'a lo ntelu nin Poli nofe xa feten xo: «Ɲin xe innu mu Ala Xototaninba la jonŋo lelu ti. I be kisilo silo le ɲafoxan alu ɲen.» 18Jidinmuso xa wo ke tili kiika xono. Labanŋo la, Poli diminta, a x'é koppa x'a fo jidinmuso la jinno ɲen xo: «Isa Kirisita toxo barako to, bo muso to.» Jinno bota wo no bee to. 19Wo jonmuso marigilu x'a lon tumo men xo i la xaalisisotoda tiɲata, i xa Poli nin Silasi muta xa taxa i ti kiititegelalu bata, gallo dakeno la. 20I sita non tumo men, jonmuso marigilu x'a fo Rome kiititegelalu ɲen xo: «Ɲin moxo innu be n na gallo ɲaxamila; Yahudiya lelu mu. 21I be laado dolu fola a nte dagenin ntelu Romengolu xa son mennu ma, walla x'e ke.» 22Jama du wulita Poli nin Silasi xanma. Kiititegelalu xa yanmaro di, xo Poli nin Silasi la dorokolu xa bo i xanna, x'e gaɲa. 23I buwobeteta tumo men, i x'e bula kaso la, x'a xoleya garado ma xo a x'e lakorosi bete. 24A xa wo yanmaro soto tumo men, garado xa Poli nin Silasi bula kasobunŋo jooxe to, x'e sinŋolu dun kutunŋo la. 25Dugutala ma, Poli nin Silasi tun be Ala matarala, xa Ala tantu donkilolu la. Kasolamoxo tolu tunnu be i lamela. 26Wo dulandin kilinŋo, duguxulu jarajaraba keta. Kasobunŋo jusigilanŋolu jarajarata. Kasobunŋo dalu bee yeleta. Kasolamoxolu bee la joloxolu firinta. 27Garado kunita. A xa kasobunŋo dalu je yelenin tumo men, a x'a la fanŋo boosi xo a be a fan faxala. A tun hakilo la xo kasolamoxolu bee x'e bori. 28Bari Poli fetenbeteta xo: «Í xana fusi ke í fan na, n bee be jan.» 29Wo tumo, garado xo x'e xa na lanpo ti. A x'é tariya xa dun kasobunŋo xono. Silanɲa kujaxo bulu, a jarajarato taxata í boyi Poli nin Silasi xoto. 30Wo xo, a x'e labo keno ma, x'e ŋininxa xo: «Ń batufalu, nte xa xan xa mun ke walasa ń xa kisi?» 31I x'a jaabi xo: «La Marigi Isa la, í si kisi, í nin í la dinbaya.» 32I xa Marigi la xumo fo a nin a la dinbaya bee ɲen. 33Wo suwo waxati kilinŋo fan, garado xa Poli nin Silasi la joogilidalu ku. Wo xo, a nin a la luxonomoxolu bee batiseta. 34Wo bee xo, a taxata Poli nin Silasi ti a la luwo ma, xa domolo di i ma. Wo xe nin a la dinbaya bee ɲaɲata bete; bawo i lata Ala la. 35Saxo yeleninma, kiititegelalu xa moxo dolu ki garado ma xo a xa wo xe innu bula. 36Garado nata x'a fo Poli ɲen xo: «Kiititegelalu xa kila bula xo x'alu bula. Awa, alu bo xa taxa heero to.» 37Bari Poli x'a fo kiladinŋolu ɲen xo: «Ntelu mennu mu Romenga yerewuluwolu ti, i xa n buwo moxolu bee ɲala x'a tara kiito man tege, wo xo, i xa n bula kaso la. Saasa, i b'a fe ba xa n mundin bula? Ayi. I fannu xa na n nabo.» 38Kiladinŋolu taxata wo xumolu fo kiititegelalu ɲen. Wolu x'a lon tumo men xo Romengo lelu mu, i silata. 39I nata yaafo ŋinin Poli nin Silasi fe, wo xo, x'e labo, x'e matara xo i xa bo wo gallo to. 40Poli nin Silasi bota kaso la tumo men, i taxata Lidi la luwo ma. I xa badin lannayabaxolu je, x'e jusudun. Wo xo, i taxata.

will be added

X\