KEWALOLU 15

1Moxo dolu bota Yude maro la, xa na Antiyosi, x'e badin lannayabaxolu laxaran xo: «Nin alu man ɲaxa í xo Musa la sariya x'a fo ɲa men, alu me kisi no.» 2Poli nin Baranabasi man son wo xumo ma fewu. Wo kuwo keta soosoliba ti i nin wo moxolu te. A lategeta xo Poli nin Baranabasi anin moxo dantalu xa taxa Yerusaleme, walasa i nin kiladinŋolu nin moxobalu xa xuma wo kuwo xan. 3Wo to, Ala la jama x'e ki xa taxa. I taxato, i xa Fenisi jamano nin Samari jamano tokutun. Siya tolu tuubita ɲa men, i tunnu be wo ɲa foxan. Wo xa badin lannayabaxolu bee nitodiya bete. 4Poli nin Baranabasi sita Yerusaleme tumo men, Ala la jama nin kiladinŋolu anin moxobalu x'e mutakubete. Ala xa sinŋo di i ma xa fen wo fen ke, i xa wo bee ɲa fo i ɲen. 5Farisiya dolu, mennu xa lannaya ke, wolu wulita x'a fo xo: «Waajibo le mu, siya tolu moxolu mennu xa lannaya ke, xo wolu xa ɲaxa, anin i xa Musa la sariya labatu.» 6Kiladinŋolu nin moxobalu x'e ɲoxo tara, xa wo xumo segesege. 7Wo xumo keta ɲoxomasoosoba ti tumo men, Piyere wulita x'é lo. A xo: «Ń badinŋolu, alu x'a lon xo Ala xa nte sugandi alu to kabirin tuma jan, walasa nte xa xibaru Dimanŋo fo siya tolu ɲen, nin i si a me xa lannaya ke. 8Ala men xa moxolu bee jusukunna kuwolu lon, ate x'a yita xo a sonta siya tolu ma, a xa Ni Senunŋo di wolu ma tumo men, í xo a x'a di ntelu ma ɲa men. 9Ala man faranfansi si ke ntelu Yahudiyalu nin siya tolu te. A x'e jusukunŋolu senuya i la lannaya le koso. 10Mun na saasa, alu be Ala xotobola? N benbalu nin n fannu korita dono men xoto, mun na alu b'a fe xa wo dono la lannayabaxolu kun? 11Ń be saagila a ma tugun xo, n be lanin a la xo n kisita Marigi Isa la neemo le barako to, í xo itelu dulu.» 12Wo to, jama bee x'e de xa Baranabasi nin Poli lame. Ala xa sinŋo di i ma xa taagumanseedolu nin kawakuwolu mennu ke siya tolu to, i xa wolu bee fo. 13I x'e soto wo xumo la tumo men, Yaxuba xa xumo ta xo: «Ń badinŋolu, alu ń name. 14Ala hakilo tuta siya tolu kun ɲa men kabirin folofolo, xa moxo dolu sugandi i to, x'e ke a ta ti, Simon xa wo fo. 15Wo nin kilalu la xumolu benta i ɲoxo ma, bawo a be safenin Kitaabo xono xo: 16“Marigi xo: Wo xo, nte si ń koppa. Dawuda la bunŋo men boyita, nte si wo tolo. Dula mennu kutunta, ń si wolu lawuli, x'e latilin. 17Wo to, hadamadin tolu bee si Marigi ŋinin, nte xa siya mennu bee kili x'e ke ń talu ti. Marigi xo ten, ate men x'a tu wo kuwolu 18lonta kabirin waxati jan.” 19Yaxuba xo: Wo le x'a tu, nte hakilo la, siya tolu mennu x'e ɲadi Ala la, n man xan xa xoleya bula wolu sinŋo xoto. 20Bari, alan xa safe ki i ma x'a fo i ɲen xo i xana bolisosubu noxonin domo. I xa i fannu tanga jadoya ma. I xana jifo domo walla jelo. 21Sabula kabirin folofolo, waajulo be kexan Musa la sariya xan gallubalu bee to, a be xaranna Alabatusuwolu xono tofoɲolun wo tofoɲolun.» 22Wo to, kiladinŋolu nin moxobalu anin Ala la jama bee benta a to xa moxo dantalu sugandi i fannu to. I xa wolu la Poli nin Baranabasi xan, x'e ki Antiyosi. I xa Yudasi nin Silasi sugandi. Yudasi be kilila du xo Barasabasi. Lannayabaxolu la bunɲa tun be lanin wolu xan. 23Safe men dunta i bulu, wo xono xumolu fele: «N badin lannayabaxo mennu bota siya tolu to, alu mennu be siginin Antiyosi gallo xono, anin Siri jamano to, anin Silisi jamano to: Kiladinŋolu nin moxobalu anin alu badinŋolu be alu xontonna. 24N x'a me xo moxo dolu bota n bata jan, xa taxa alu bata, xa xumo dolu fo alu ɲen, mennu x'alu hakilo ɲaxami, x'alu xonotolafili. Moxo man i bula wo la. 25Wo le x'a tu, n benta a to xa moxo dolu sugandi, x'e ki alu ma, x'a kafu n badin xanuninŋolu ma, nin wo mu Poli nin Baranabasi ti, 26wo mennu bota i niyo la, n Marigi Isa Kirisita la baaro xanma. 27N fele Yudasi nin Silasi kila alu ma, n xa xumo men fo safe xono, i si wo fo alu ɲen. 28Ni Senunŋo nin ntelu fannu x'a latege, xo n xana doni xote la alu kun fo ɲinnu, mennu be waajibiyanin. 29Alu xana bolisosubu domo, walla jelo, walla jifo. Al'alu fannu tanga jadoya ma. Nin alu si alu fannu korosi no wo kuwolu ma, wo le xa ɲin. X'alan n ben!» 30Wo kilalu labulaninŋo xo, i taxata Antiyosi xa Ala la jama kamari xa wo safe d'i ma. 31Wolu xa wo xaran tumo men, i ɲaɲata, bawo jusudunni xumo kiika tun b'a to. 32Yuda nin Silasi fan tunnu mu kila lelu ti. Wolu xa lannayabaxolu jusudun i la xuma kiika fe, x'e la lannaya sinsin. 33I tuta i bata waxati la. Wo xo, lannayabaxolu x'e labula walasa i x'e koppa i kilabaxolu ma. I duwata i ɲen xo i ɲuma xa si. [ 34Bari Silasi x'a latege xa tu Antiyosi.] 35Poli nin Baranabasi tuta Antiyosi. I nin moxo kiika xotelu tunnu be moxolu laxaranna, xa Marigi la xibaru Dimanŋo fo i ɲen. 36Waxati tanbita, wo xo, Poli xo Baranabasi ɲen xo: «N tunnu taxata gallo mennu to, xa Marigi la xumo fo, n x'e koppa xa taxa bo n badinŋolu ma wo dulalu, x'a mafele i be ɲa men lannaya to.» 37Baranabasi tun b'a fe i nin Yaya xa taxa, ate men be kilila du xo Maraka. 38Bari Poli xo, xo a man xan xa taxa i nofe. Bawo a x'e fata i ma Panfili jamano xan, a man son a nin i xa baarolu laban i ɲoxo fe. 39Mankanba dunta Poli nin Baranabasi te fo i talata. Baranabasi xa Yaya Maraka ta. I dunta batonŋo do xono xa taxa Sipere. 40Poli ken xa Silasi le sugandi, i taxata i ɲoxo la. Lannayabaxolu x'e xarifa Marigi Ala la neemo ma. 41A xa Siri nin Silisi jamano bee yaala, xa Ala la jamalu sinsin lannaya to.

will be added

X\