KEWALOLU 14

1Poli nin Baranabasi sininŋo Ikone, i dunta Yahudiyalu la Alabatusuwo xono non du. I xumata fo Yahudiyalu nin Gerekolu moxo kiika xa lannaya ke. 2Bari Yahudiyalu mennu man son lannaya ma, wolu xa siya tolu moxolu xonotosoli badin lannayabaxolu xanma. 3Wo bee nin a ta, Poli nin Baranabasi meta Ikone. I ja sigininŋo tun be xumala je, x'e gigo tu Marigi xan. Marigi xa barako di i ma, xa taagumanseedolu nin kawakuwolu ke, mennu s'a yita xo i be men waajula Ala la neemo barako to, xo wo mu tonɲa le ti. 4Gallo moxolu talata xan ma. Dolu nin Yahudiyalu keta boxo, dolu nin kiladinŋolu keta boxo. 5Yahudiyalu nin siya tolu nin i la kuntigolu benta a to, xa ku jaxo ke Poli nin Baranabasi la, x'e bun kuro la x'e faxa. 6Wolu xa wo me tumo men, i x'e bori xa taxa Likawoni maro la, xa taxa Lisitere nin Derebe gallolu to. 7I xa xibaru Dimanŋo fo non dulu. 8Xe do tun be Lisitere, a tun be siginin tuma bee, bawo a namatama le wuluta. A bada man í taxama. 9A tun be Poli la xumo lamexan. Poli x'a mafele, a x'a je xo lannaya b'a la xa kendeya. 10A xo a ɲen barako to xo: «Wuli í x'é latilin í sinŋolu da!» Xe x'é ba x'é lo a sin fulo da, x'é taxama. 11Jama xa Poli la kebaaro je tumo men, i fetenta x'a fo Likawonixanŋo to xo: «N na bolibatutalu x'e ke moxolu ti, xa jigi n xan.» 12I xa Baranabasi kili xo i la bolibatuta Susi, xa Poli kili xo i la bolibatuta Heremesi, bawo ate le tun mu xumala ti. 13Bolibatuta Susi batusuwo do tun be gallo dunda la. A la sadaxalasibaxo nata tuura dolu ti wo dula. Wolu tunnu be masitinin yirifirolu la. A tun nin jama keta a fe xa sadaxo bo Baranabasi nin Poli ɲen. 14Bari kiladin fula in, Baranabasi nin Poli xa wo lon tumo men, i x'e la dorokolu tofara, x'e bori taxanin jama ma, xa feten xo: 15«He! Mun na alu be ɲin kela? Ń xo, ntelu dulu mu alu ɲoxon hadamadin nelu ti! N nata Isa la xibaru Dimanŋo fo alu ɲen, walasa alu xa ɲin bolibatuta fu innu bula, x'e ɲadi Ala nilama la, wo men xa sanxulo nin duguxulo nin xooxojiyo nin i to fenŋolu bee da. 16Waxato mennu tanbita, a xa siyalu bee tu je, i xa taxa i fannu la silolu fe. 17Haali wo, a x'é yita tumo bee a la ɲumayalu la. A be sanjiyo dila alu ma xa bo sanŋo to, xa senefenŋolu di i waxato. A be baluwo dila alu ma, x'alu laɲaɲa.» 18Haali kiladinŋolu xumata ten, i tunnu si kori jama balila tuura sadaxala i ɲen. 19Yahudiya dolu nata xa bo Antiyosi nin Ikone. Wolu xa jama hakilo yelema fo i xa Poli bun kurolu la xo i b'a faxala. Wo xo, i x'a saba x'a labo gallo xono. I tunnu ɲen xo a sata le. 20Bari lannayabaxolu nata a laminin tumo men, a wulita, xa dun gallo xono. Wo lun do, a nin Baranabasi taxata Derebe. 21Poli nin Baranabasi xa xibaru Dimanŋo fo Derebe gallo moxo ɲen. I xa lannayabaxa kiika soto. Wo xo, i x'e koppa xa na Lisitere, xa bo non xa taxa Ikone, wo xo xa na Antiyosi. 22I tunnu be lannayabaxolu sinsinna, x'e jusudun, xo i xa tu lannaya to. I tunnu b'a fola i ɲen du xo: «Waajibo le mu tooro kiika xa n soto jannin n be dunna Ala la Mansaya xono.» 23I xa moxobalu lasigi Ala la jamalu kilin wo kilin kunna. I sunta, xa Ala matara. Wo xo, i x'e xarifa Marigi ma, i lata wo men na. 24Wo xo, Baranabasi nin Poli xa Pisidi jamano tokutun, xa si Panfili jamano to. 25I xa Ala la xumo fo Pereje. Wo xo, i taxata Atali. 26I xa batonŋo ta non, xa taxa Antiyosi, i tunnu xarifata Ala la neemo ma dula men. Wo keta baaro men xanma, i xa wo ke x'a dafa. 27I sininma Antiyosi, i xa Ala la jama kamari. Ala xa sinŋo di i ma xa fen wo fen ke, i xa wo bee dantege i ɲen. Ala xa da yele siya to dulu ɲen ɲa men, walasa i xa lannaya ke, i xa wo ɲa du laxali i ɲen. 28Poli nin Baranabasi tuta lannayabaxolu bata non waxati jan xono.

will be added

X\