KEWALOLU 13

1Kilalu nin karanmoxolu tunnu be Ala la jama xono Antiyosi: Baranabasi, Simeyon men kilita xo Finmanŋo, Lusiyusi men be bola Sireni, anin Manayen men nin jamana kuntigi Herode labunɲata i ɲoxo fe, anin Soli. 2Lun do, x'e tu Marigi batulo nin sunŋo la, Ni Senunŋo xo i ɲen xo: «Nte xa Baranabasi nin Soli kili baaro men xanma, alu i bula i xa wo ke nte ɲen.» 3Wo keninma, i sunta, xa Ala matara, x'e bulolu la i xan. Wo xo, i x'e bula xa taxa. 4Ni Senunŋo xa Baranabasi nin Soli ki tumo men, i taxata Selusi. I x'e tu non, xa batonŋo ta xa taxa Sipere sutto to. 5I sininma Salamine, i xa Ala la xumo fo Yahudiyalu la Alabatusuwolu xono. Yaya men be kilila xo Maraka tun be i bata x'e deema. 6I xa wo sutto tokutun, fo xa si Pafosi. I xa doomaxe do je non, a toxo xo Bara Yesu. Yahudiya le mu. A tun b'a fan kenin kila ti. 7A tun be Goferenere Serejusi Polusi bata. Goferenere in tun mu moxo hakilima le ti. A xa kila bula Baranabasi nin Soli ma, bawo a tun b'a fe xa Ala la xumo lame. 8Bari doomaxe Elimasi, nin wo mu Bara Yesu toxo ti gerekixanŋo to, wo xa Baranabasi nin Soli sooso. A tun be ɲa ŋininna, xa goferenere bali xa lannaya ke. 9Wo tumo la, Soli men be kilila xo Poli, wo tun be fanin Ni Senunŋo la, a x'a ɲa lo doomaxe to, x'a fo a ɲen xo: 10«Nanbaramanso nin moxo jaxo, Sentanemoxo, ku beto bee jaxo! Í si fata Marigi la sila tilinninŋolu ladogila ba? 11Saasa Marigi s'a tego maxa í la. Í si fiyonɲa. Í si waxati ke í man tilo je.» Wo no bee to, Elimasi fiyonɲata. Dibo dunta a ɲa la. A x'a boxo bee moomo fo a si moxo je, men si a bulo muta. 12Goferenero xa wo kuwo je tumo men, a xa lannaya ke. A xa xaranŋo men me Marigi la kuwo to, wo x'a dabaro ban bete. 13Poli nin a toɲoxolu xa batonŋo ta Pafosi, xa taxa Pereje, men be Panfili jamano xan. Yaya Maraka nin i talata non. Ate x'é koppa xa taxa Yerusaleme. 14Poli nin Silasi bota Pereje, xa taxa Antiyosi men be Pisidi maro la. Tofoɲolunŋo, i dunta Alabatusuwo xono x'e sigi. 15Musa la sariya nin kilalu la kitaabolu xaranŋo xo, Alabatusuwo kuntigolu xa moxo bula a fola i ɲen xo: «N badinŋolu, nin xuma be alu kun x'a fo jama ɲen, x'a jusudun, waxato be alu bulu saasa.» 16Poli wulita, x'a bulo xotota jama ɲen xo: «Banisirayila moxolu, anin alu tolu mennu be silala Ala ɲa, alu i tulo lo. 17Banisirayila dinŋolu la Ala xa n mamaxelu sugandi. A x'e la siya labugi, x'e tu siginfelu ti Misira. Wo xo, a x'a la sintigiyaba yita, x'e labo Misira. 18A muɲata i xoto fuxo la, tan naani sanji xono. 19A xa siya woorowula halagi Kanan jamano to. Wo xo, a xa wolu la jamano di n mamaxelu ma, x'a ke i ta ti. 20Wo bee keta san keme naani nin bi luulu xono. «Wo xo, a xa kuntigolu lasigi i kunna, fo xa taxa si kila Samuyeli tilo ma. 21Wo xo, i xa mansaxe do ŋinin Ala la. A xa Kise dinxe Sawuli lasigi i kunna. Wo bota Bensamen bonsonŋo to. Wo sigita i kunna tan naani sanji xono. 22Ala xa Sawuli labo mansaya la tumo men, a xa Dawuda lasigi i kunna mansaxe ti. Ala xo Dawuda la kuwo to xo: “Ń xa Yese dinxe Dawuda soto. Nte sagolamoxo le mu. A si nte sago bee ke.” 23Ala xa Dawuda bonsonŋo do ke Banisirayila Kisibaxo ti, x'a la a la lahido xan. Wo mu Isa le ti. 24Jannin Isa tun xa na, Yaya tun be Banisirayila moxolu bee waajula, xo i x'e xodi i la junubolu la, xa batise. 25Yaya tun b'a fola a la baaro bantumo xo: “Alu ɲen, nte mu jon ti? Alu be men naxononin, nte nte wo ti. Bari a si na nte xofe. Haali xa ke a la samatajulufirinna ti, nte nin wo man xan.” 26«Ń badinŋolu, ate mennu bota Burehima to, anin alu tolu men dulu be silala Ala ɲa, ɲin kisili xuma innu kita n bee le ma. 27Yerusaleme moxolu nin i la kuntigolu kennu man a lon Isa mu men ti. Kilalu la xumolu men dulu be xaranna tofoɲolunŋolu, i man wo dulu faamu, bari i xa wo xumolu dafa, i xa kiito tege Isa xan tumo men. 28Haali x'a tara i man faxalikun je Isa la, i x'a ŋinin Pilate la xo a x'a faxa. 29Mennu safeta Kitaabo xono a la kuwo to, i xa wo bee ke tumo men, i x'a lajigi xa bo gengenyiro xan, x'a bula xaburo xono. 30Bari Ala x'a lakuni xa bo furelu to. 31Men tunnu nin Isa bota Galile, xa taxa Yerusaleme, a x'é yita wolu la tili kiika xono. Saasa, wolu mu a seedolu ti, xa xuma Banisirayila moxolu ɲen a la kuwo to. 32Ntelu be ɲin xibaru Diman in fola alu ɲen, xo Ala tun xa lahido men ta n mamaxelu ɲen, 33a xa wo latimme n ɲen bi, alan ntelu mennu keta i bonsonŋolu ti. A xa Isa lakuni í xo a be safenin Jaburu fulananŋo xono ɲa men xo: “Ite le mu ń Dinxe ti; kabirin bi, nte keta í Fa ti.” 34Ala tun x'a fo xo a si a lakuni xa bo furelu to, xo a me sa tugun, a me toli. A tun x'a fo ten xo: “Nte xa lahidu senumanŋo mennu ta Dawuda ɲen, sikka si nt'a to, nte si wolu ke alu ɲen.” 35Wo le x'a tu, a xo dula xote du xo: “Í me son, í la senumanŋo xa toli xaburo xono.” 36Dawuda ken xa Ala la kulategeninŋolu dafa a la waxato, wo xo, a sata. A lasita a mamaxelu senbo to, a tolita. 37Bari Ala xa men nakuni xa bo furelu to, wo man toli. 38Ń badinŋolu, alu a lon xo alu si junubeyaafo soto xa jaate moxo tilinninŋo ti Isa le barako to. Alu man sin xa jaate moxo tilinninŋo ti Musa la sariya la. 39Isa le barako to, moxo wo moxo xa lannaya ke, wo si jaate moxo tilinninŋo ti. 40Wo xanma, alu i korosi, walasa kilalu xa xumo mennu fo, wolu xana alu lasoto. Kilalu xo: 41“Alu a mafele, atelu mennu be Ala la kuwolu mafeyaxan, alu dabaro xa ban, xa halagi. Bawo nte be nala kuwo do kela alu la waxato, nin moxo x'a laxali alu ɲen, alu me la a la.” » 42Poli nin Baranabasi boto Alabatusuwo xono, moxolu x'e matara xo i xa xuma wo kuwolu xan tugun tofoɲolun nata. 43Jama jenjenŋo xo, Yahudiyalu anin moxo mennu tuubita xa dun Yahudiyalu la diino to, wolu kiika x'a lo Poli nin Baranabasi nofe. I xa wo moxolu tonben, xo i xa Ala la neemo mutasoobe. 44Wo tofoɲolunŋo ɲoxon kun, gallo tala bee kamarita x'e be Marigi la xumo lamela. 45Yahudiyalu xa wo jama je tumo men, i kiiliyata. I xa Poli sooso, x'a nani. 46Poli nin Baranabasi hakilo lasigininŋo xumata i ɲen xo: «Waajibo le tun mu Ala la xumo xa fo alu fololu ɲen. Bari alu x'e ban a to, xa kiito tege alu fannu xan, x'a yita xo alu nin nilamaya banbalo man xan. Wo le x'a tu saasa, n si i ɲatilin siya tolu la. 47Bawo Marigi xa kuwo men waajibiya n ma, wo fele xo: “Ń x'é lasigi xo í xa ke keneya ti siyalu ɲen, walasa í xa kisilo lasi duniya bee ma.” » 48Siya tolu xa wo xumolu me tumo men, i ɲaɲata, xa Marigi la xumo bunɲa. Ala xa i fen wo fen sugandi nilamaya banbalo xanma, wolu bee xa lannaya ke. 49Marigi la xumo jenjenta wo jamano dula bee to. 50Bari Yahudiyalu xa gallo musu toxoma Alabatubaxolu nin gallo moxobalu xonotosoli Poli nin Baranabasi xanma; i x'e tooro, x'e xoyi x'e labo i la jamano to. 51Poli nin Baranabasi x'e sinnabanxo konkon x'a bo i sinŋolu la i xanma, wo xo, i taxata Ikone gallo to. 52Antiyosi lannayabaxolu kennu ɲaɲabeteta, xa fa Ni Senunŋo la.

will be added

X\