KEWALOLU 12

1Wo waxato, mansaxe Herode xa Ala la jama moxo dolu muta x'e tooro. 2A xa Yaya xotoxe Yaxuba faxa fanŋo la. 3A x'a je tumo men xo wo diyata Yahudiyalu ɲen, a x'a latege xa Piyere du muta. Wo keta Buurufuunulantan sallo to. 4Piyere mutaninŋo x'a bula kaso la, mansaxe Herode x'a dun sorodasi naani sigidulama naani bulu, xo i x'a korosi. Herode tun b'a fe x'a lalo jama ɲa xoto kiito xanma, Tanbinxansallo xofe. 5Xa Piyere tu kaso la, Ala la jama moxolu balanninŋo tuta Alamatara la a ɲen. 6Herode tun b'a fe xa Piyere lalo jama ɲa xoto kiito xanma lunŋo men, wo suwo, Piyere tun be sinnoxonin sorodasi fula te. A tun be sitinin negejoloxo fula la. Dakantabaxolu tunnu be lonin kasobunŋo da la. 7Wo ɲa in, Marigi la melekiyo do nata. Keneyaba keta kasobunŋo xono. Melekiyo xa Piyere konkon a toxo to, x'a lakuni. A xo a ɲen xo: «Wuli tariya!» Wo no bee to, joloxolu butunta xa bo a bulolu la. 8Wo xo, melekiyo xo Piyere ɲen xo: «Í te tositi, x'é la samatolu dun.» Piyere xa wo ke. Wo xo, melekiyo x'a fo a ɲen xo: «Í la dorokeba dun x'a lo ń nofe.» 9Piyere bota x'a lo melekiyo nofe. Melekiyo xa men ke, Piyere tun man la a la xo wo mu tonɲa ti. A tun ɲen xo a je siiboxan ne. 10A nin melekiyo tanbita dakantabaxa fololu nin fulananŋolu la, xa na si negeda ma, moxo be bola men fe xa si banto to, xa taxa gallo xono. Wo da yeleta a fan ma i ɲa. I bota xa taxa ɲa dondin bedo to. Nondin kilin to, melekiyo taxata xa Piyere tu non. 11Piyere xa hakili soto tumo men, a xo: «A xoyiyata nte ma saasa xo Marigi x'a la melekiyo ki xa na ń bo Herode la fango bulu, anin xa ń kisi Yahudiyalu la tooro ŋanneyaninŋolu bee ma.» 12A xa wo kuwolu faamu tumo men, a taxata Mariyama la luwo ma. Yaya men be kilila xo Maraka, wo na le mu Mariyama ti. Moxo kiika tun be kamarinin non xa Ala matara. 13Piyere xa luwo da konkon. Baaradinmuso do nata da la, walasa xa da konkonbaxo je. Wo baaradinmuso toxo xo Roda. 14Wo baaradinmuso xa Piyere xanŋo mategeninŋo lon tumo men, a ŋinata dayelo kun, ɲaɲo bulu. A x'é bori xa taxa luwo xono, x'a fo xo Piyere be lonin keno ma, da la. 15I xo a ɲen xo: «Fa le b'é to!» Bari a x'a lahenne i ma xo tonɲa le mu. I xo: «A la melekiyo le mu.» 16Wo bee to, Piyere tuta da konkonna. I xa da yele x'a je tumo men, i dabaro bee banta. 17A x'a bulo xotota i ɲen, xo i x'e de. Marigi x'a labo kaso la ɲa men, a xa wo ɲa fo i ɲen. A xo i ɲen du xo: «Alu xa ɲin xibaru in fo Yaxuba nin badin tolu ɲen.» Wo xo, a bota je, xa taxa dula xote. 18Saxo yeleninma, sorodasolu ja wulita, bawo i man Piyere keɲa lon. 19Herode xa Piyere ŋinin. A man a je tumo men, a xa dakantabaxolu tosegesege wo kuwo to, xa yanmaro di xo wolu xa faxa. Wo xo, Herode bota Yude maro la, xa taxa Sesare gallo to, xa waxati ke non. 20Herode tun be diminnin bete Tire nin Sidon moxolu xanma. Wolu benta a to xa taxa a bata. I nin mansaxe xotosigibaxo x'e ɲoxo faamu wo kuwo to. Wo toxo le xo Bulasitusi. Wo xo, i taxata benŋo ŋinin Herode la, bawo i la baluwo be bola mansaxe la jamano le to. 21Lunŋo men fota, Herode x'a la mansadoroko dun, x'é sigi a la mansasigilanŋo xan, xa xuma jama ɲen. 22Jama keta a ma xa feten xo: «Moxo xan nte ɲin ti, ala do le xan mu.» 23Bari wo no bee to, Marigi la melekiyo x'a tego maxa Herode la; bawo Ala nin bunɲa men xa xan, a xa wo la a fan xan. Tunbolu dunta a to, a sata. 24Wo bee nin a ta, Ala ken na xumo tun be taxala ɲa, a tun be jenjenna xa taxa a fe. 25Baranabasi nin Soli la baaro banninma Yerusaleme, i x'e koppa, i nin Yaya, men be kilila xo Maraka.

will be added

X\