KEWALOLU 11

1Kiladinŋolu nin lannayabaxo mennu be Yude maro xono, wolu x'a me xo siya tolu dulu sonta Ala la xumo ma. 2Piyere naninma Yerusaleme, Yahudiya lannayabaxolu mennu be ɲaxo kenin waajibo ti, wolu x'a sooso. 3I xo: «Í dunta siya ɲaxabalolu bata, í nin i xa domolo ke!» 4Wo to, fen fen keta, Piyere xa wo ɲa bee laxali i ɲen xo: 5«Xa nte tu Alamatara la Jope, Ala xa fenŋo do yita nte la. Wo fenŋo tun be í xo faanuba. A kun naano tun be tomutanin. Wo jigita xa bo sanŋo to, xa na jigi nte xoto. 6Nte x'a mafele bete. Ń xa duguxulo sinnaanimafenŋolu je, anin wulaxonosubolu nin fenŋo mennu b'e fuufula, anin xonolu, mennu b'e baxan sanna. 7Ń xa xumaxanŋo do me a fola ń ɲen xo: “Piyere, wuli í xa fen do faxa x'a domo.” 8Bari nte x'a jaabi xo: “Ayi Marigi! Bawo fen wo fen domo nte dagenin, walla fen wo fen be noxonin, nte bada man wolu si bula ń da folo.” 9Xumaxan in bota sanŋo to tugun xo: “Ala xa men senuya, í xana wo jaate fen noxonin ti.” 10Wo kuwo keta í xo sinɲa saba. Wo xo, wo fenŋolu bee lakoppata xa taxa sanŋo to. 11Wo waxato fan, nte be luwo men xono, xe saba nata i lo wo luda la. I tunnu kita nte ma xa bo Sesare gallo to. 12Ni Senunŋo xo nte ɲen xo ń nin i xa taxa, ń xana sikka. Ɲin badinxe innu moxo wooro nin nte taxata Sesare. N bee dunta Koroneyi la luwo ma. 13A x'a fo n ɲen a xa melekiyo je a la bunŋo la ɲa men, men xumata a ɲen xo: “Moxo ki Jope, a xa taxa Simon nofe, men be kilila du xo Piyere. 14Wo si xumolu fo í ɲen, mennu si kisilo di í nin í la dinbaya ma.” 15Nte xa xumo damuta i ɲen doron, Ni Senunŋo jigita i xan, í xo a jigita alan xan ɲa men folofolo. 16Wo xa nte hakilo lajigi Marigi la ɲin xuma in kun xo: “Yaya xa batiselo ke jiyo la, bari atelu kennu si batise Ni Senunŋo la.” 17Ala xa nilifenŋo men di ntelu ma, bawo n lata Marigi Isa Kirisita la, nin a xa wo nilifen kilinŋo di i dulu ma, nte mu jon ti, nin ń si ń ban Ala sago ma?» 18I xa wo xumolu me tumo men, bee x'e de xa Ala tantu xo: «Sikka nt'a to, Ala xa tuubilo sinŋo di siya to dulu ma, walasa i xa nilamaya soobe soto.» 19Eceni faxo xo, i xa lannayabaxolu tooro bete. Lannayabaxo mennu jenjenta wo tooro xanma, wolu dolu taxata fo Fenisi nin Sipere marolu to. Dolu taxata Antiyosi gallo to. Wolu man Ala la xumo fo moxo si xote ɲen, nin Yahudiyalu doronnu nte. 20Wo bee nin a ta, Sipere nin Sireni lannayabaxo dolu taxata Antiyosi, xa Marigi Isa la xibaru Dimanŋo fo Gereko dulu ɲen. 21Marigi la sintigiya tun b'e xan, fo moxo kiika xa lannaya ke, xa tuubi Marigi ɲen. 22Ala la jama men be Yerusaleme xa wo kuwolu xibaro me tumo men, i xa Baranabasi bula xa taxa Antiyosi. 23Baranabasi sita Antiyosi tumo men, xa Ala la neemo no je, a ɲaɲata. A x'e bee jusudun xo i xa tu notonin Marigi la, i jusukunŋo bee la. 24Baranabasi tun mu moxo ɲuma le ti; a be fanin Ni Senunŋo la, anin a la lannaya du xa bun. Jamaba sonta Marigi ma. 25Wo xo, Baranabasi taxata Tarasi, xa Soli ŋinin. 26A x'a je tumo men, a taxata a ti Antiyosi. I fulo bee xa san kilin dafaninŋo ke lannayabaxolu bata, xa moxo kiika laxaran. Xa lannayabaxolu kili xo “kerecenŋolu”, wo damutata Antiyosi le. 27Wo waxato, kila dolu bota Yerusaleme, xa na Antiyosi. 28Wolu to kilin, a toxo xo Agabusi, wo wulita x'a fo Ni Senunŋo barako to xo dondin, xonxoba si na ke duguxulo bee xan. Wo keta mansaxe Kulode tilo. 29Lannayabaxolu x'a latege, xa deemalo do ki Yude maro badinŋolu ma, x'a la i bee kilin kilin sinkuwo xan. 30I xa nilifenŋolu toben, x'e ki Yude lannayabaxolu la moxobalu ma, x'e dun Baranabasi nin Soli bulu.

will be added

X\