KEWALOLU 10

1Xe do tun be Sesare gallo to, a toxo xo Koroneyi. Rome sorodasi jalatigiba do le mu. A tun be siginin sorodasi jama men kunna, wo tun be kilila xo Itali sorodasi jama. 2Wo xe tun mu Alaɲasilanɲabaxo le ti, a nin a la lumamoxolu bee tunnu be Ala batula i ɲoxo fe. A tun be fen kiika dila Yahudiya segebaxantunŋolu ma, xa Ala matara tuma bee. 3Lun do wura la, Ala la melekiyo do x'é yita a la, keno xan. A dunta a bata x'a fo a ɲen xo: «Koroneyi!» 4Koroneyi silaninŋo x'a ɲa lo melekiyo to x'a fo a ɲen xo: «Marigi, mun keta?» Melekiyo x'a jaabi xo: «Í xa taralo mennu ke, anin í xa deema mennu ke segebaxantunŋolu ɲen, Ala xa wolu muta, anin a hakilo be í kun. 5Saasa, moxolu bula xa taxa Jope, xa taxa Simon toxo do nofe je, men be kilila du xo Piyere. 6A be jiginin gulubaarala Simon bata, wo la luwo be xooxojida la.» 7Melekiyo x'é soto xumo la a ɲen tumo men xa taxa, Koroneyi x'a la kuɲabobaxa fula kili, anin a la xotosigi sorodaso do. Wo tun mu Alaɲasilanɲabaxo le ti. 8Men keta, a xa wo ɲa bee laxali i ɲen. Wo xo, a x'e ki xa taxa Jope. 9Wo lun do, xa wolu tu taxanin, fo i nata sutiya Jope la, Piyere yeleta bilo kun, tilinkunte waxato, xa taxa Ala matara. 10Xonxo x'a muta. A tun b'a fe xa domolo ke. X'a la domolo tu daraxan, Ala xa fen do yita a la. 11A xa sanxulo je dayelenin, xa fen do jigito je bola sanŋo to, a be í xo faanuba. A kun naano be tomutanin, a jigito be nanin duguxulo xan. 12Piyere x'a je xo sinnaanimafen sifa bee nin fenŋo mennu b'e fuufula duguxulo xan, nin xonolu sifa bee, mennu b'e baxan sanna, wolu tunnu be wo faano xono. 13A xa xumaxanŋo do me a fola a ɲen xo: «Piyere, wuli í xa fen do faxa x'a domo.» 14Bari Piyere xo: «Ayi, Marigi! Bawo fen wo fen domo nte dagenin, walla fen wo fen be noxonin, nte bada man wolu si domo.» 15Wo xumaxanŋo xo a ɲen tugun xo: «Ala xa men senuya, í xana wo jaate fen noxonin ti.» 16Wo kuwo keta í xo sinɲa saba. Wo no bee to, fen in nakoppata xa taxa sanŋo to. 17Piyere hakilo ɲaxamininŋo tun b'a fan ŋininxala Ala la wo yitalifenŋo xoto si ke men ti. Wo xono, Koroneyi la kiladinŋolu xa Simon na luwo maŋininxa. I tunnu sita da la xa ban. 18I xa kililo ke, xa ŋininxalo ke xo: «Simon men be kilila xo Piyere, wo be jiginin jan ne ba?» 19Xa Piyere tu í miirila wo yitalifenŋo xoto ma, Ni Senunŋo xo a ɲen xo: «Moxo saba fele í ŋininna. 20Wuli í nin i xa taxa, í xana sikka, bawo nte le x'e ki í ma.» 21Wo to, Piyere jigita xa na wo moxolu bata, x'a fo i ɲen xo: «Alu be men ŋininna, nte le mu. Alu nata mun na?» 22I xo: «Sorodasi jalatigiba men toxo xo Koroneyi le xa n ki. Moxo tilinninŋo le mu; a be silala Ala ɲa du. Yahudiyalu bee b'a toxoɲuma fola. Ala la meleke senumanŋo do x'é yita a la, x'a fo a ɲen xo a xa kila bula í ma, xo í xa taxa a bata, xo xumo do b'é bulu x'a fo a ɲen.» 23Piyere x'e jigiya, x'e lasi. Wo lun do, a nin i taxata. Jope lannayabaxo dolu kafuta i ma, xa taxa. 24Wo lun do, i sita Sesare gallo to. Koroneyi tun b'e laxononin. A tun x'a badinŋolu nin a xanuntelu kili. 25Piyere dunto luwo xono, Koroneyi nata í buti a xoto x'a batu. 26Piyere x'a lawuli, x'a fo a ɲen xo: «Wuli, nte du mu í ɲoxon hadamadin gansan ne ti.» 27X'e tu xumo la i ɲoxo fe, i dunta luwo xono, xa moxo kiika kamarininŋo tara je. 28Piyere xo i ɲen xo: «Alu x'a lon xo ntelu Yahudiyalu la sariya la, a nte dagenin n nin siya xote xa kafu, walla xa dun a la luwo xono. Bari Ala x'a yita nte la, xo ń xana moxo si jaate xo a man senu, walla xo a be noxonin. 29Wo le x'a tu, alu xa nte kili tumo men, nte man soosoli dun a to, ń nata. Awa, alu xa nte kili kunŋo men na, ń b'a fe xa wo lon.» 30Koroneyi x'a jaabi xo: «Bi mu a tili naano le ti, nte tun be Alamatara la ń na bunŋo xono, wuralataralo waxato. Ɲakun kilin, xe do nata í lo nte ɲa xoto, a la faanolu be manala. 31A xo ń ɲen xo: “Koroneyi, Ala x'é la taralolu jaabi. Í xa segebaxantunŋolu deema ɲa men, Ala hakilo tuta wo la. 32Moxo dolu ki i xa taxa Jope, xa taxa Simon kili a xa na, wo men be kilila du xo Piyere. A be siginin gulubaarala Simon bata, xooxojida la.” 33Wo no bee to, nte xa moxo dolu bula i xa taxa í nofe. Í la na benta. Saasa, Ala xa kuwo mennu bee yita í la xo í x'e fo n ɲen, n bee kamarininŋo fele in ti Marigi ɲa xoto, xa wolu lame.» 34Piyere xa xumo ta xo: «Tonɲa la, nte x'a faamu saasa xo Ala nte moxo bola moxo to: 35Bari siya wo siya to, nin men je sila a ɲa, xa ku tilinninŋo ke, wo le la kuwo xa di a ɲen. 36Ala x'a la xumo bula Banisirayila moxolu ma, nin wo mu xibaru Dimanŋo ti, men be heero dila moxolu ma, Isa Kirisita barako to. Ate le mu moxolu bee Marigi ti. 37Kuwo men keta Yude maro bee xono, alu be wo xalama. A damutata Galile, Yaya la waajulo nin a la batiselo xofe. 38Alu x'a lon Ala xa Nasareti Isa fa Ni Senunŋo la ɲa men, xa sintigiya di a ma. Alu x'a lon du xo Isa xa jamano yaala, xa ku ɲuma ke, xa moxolu bee kendeya, men tunnu be Sentane la fango bulu; bawo a tun nin Ala be i ɲoxo fe. 39A xa ku wo ku ke Yahudiyalu la jamano xan, anin Yerusaleme dugo xono, ntelu mu wolu bee seedolu ti. I x'a gengen yiro ma, x'a faxa. 40Bari Ala x'a lakuni a sa tili sabo. Ala x'a tu a x'é yita moxolu la. 41Bari moxolu bee la nte, fo ntelu, Ala xa ntelu mennu sugandi wo xanma kabirin waxati jan. Ntelu nin a xa domolo ke anin x'e min, a kuniyo xofe xa bo furelu to. 42Isa x'a xoleya n ma xo n xa moxolu waaju, x'a yita i la x'a laxoyiya i ma, xo Ala xa men nasigi x'a ke kendolu nin furelu la kiito tegebaxo ti, wo mu ate le ti. 43Kilalu bee xumata a la kuwo to. I xo, xo moxo wo moxo je la a la, wo si junubeyaafo soto a toxo barako to.» 44Xa Piyere tu wo xumo la, Ni Senunŋo jigita a lamebaxolu bee xan. 45Yahudiya lannayabaxolu mennu xa Piyere dandan, wolu dabaro banta, xo Ala xa Ni Senunŋo lajigi siya tolu dulu xan. 46Bawo i x'a je xo moxolu tunnu be xan xotelu ma x'e fo, xa Ala bunɲa. Wo tumo la, Piyere xo: 47«N si ɲin moxo innu bali no tugun i xa batise jiyo la ba; bawo i xa Ni Senunŋo soto í xo ntelu x'a soto ɲa men?» 48Wo to, Piyere xa yanmaro di x'e xa batise Isa Kirisita toxo la. Wo xo, i xa Piyere matara xo a xa tili dantalu ke i bata.

will be added

X\