KEWALOLU 1

1Ń badinxe Tewofili, Isa xa kuwo mennu ke, anin a xa laxaranno mennu ke, kabirin a la kuwolu damuto, 2fo a yeleta lunŋo men xa taxa sanŋo to, ń tun xa wolu ɲa fo ń na bukke folo xono. Jannin a xa yele xa taxa sanŋo to, a la kiladin sugandininŋolu xa xan xa baaro mennu ke, a x'e laxaran wolu la, Ni Senunŋo barako to. 3Isa la tooro nin a la saya xofe, a nilama x'é yita a la kiladinŋolu la. A x'a yita i la taagumanseede xoyi kiika la, xo a b'é nila. Tan naani tili xono, a x'é yita i la, x'e xaran Ala la Mansaya kuwolu ma. 4Lun do, x'e tu domolo la, a x'a fo x'a xoleya i ma xo: «Alu xana i soobo Yerusaleme la, bari ń Fa Ala xa men lahido ta, ń xumata alu ɲen nilifenŋo men na kuwo la, alu si sigi xa wo laxono. 5Yaya xa batiselo ke jiyo la, bari atelu kennu, tili dantalu bi xo, alu si batise Ni Senunŋo la.» 6Awa xa kiladinŋolu kamarininŋo tu Isa ma, i x'a ŋininxa xo: «Marigi, wo waxato le mu ba, nin í be Banisirayila mansaya sigila tugun?» 7A x'e jaabi xo: «Ń Fa Ala xa waxato nin tumo mennu latege a fan na mansaya xono, atelu man xan xa wolu lon. 8Bari nte b'a fola alu ɲen xo, nin Ni Senunŋo jigita alu xan tumo men, alu si barako soto. Alu si ke nte seedolu ti Yerusaleme, Yude maro bee xono, anin Samari jamano xono, fo xa taxa a bula duguxulo danŋo la.» 9Wo xumolu foninŋo xo, Isa yeleta xa taxa sanŋo to, x'e tu a mafelenin. Wo to, xabo x'a sanko i ma. 10Kiladinŋolu ɲa tun be sanŋo to, Isa yeleta jan men. Wo ɲa in, xe faanuxoyitigi fula nata i ma. 11Wolu xo i ɲen xo: «Galilengolu, mun na alu b'e lola xa sanxulo mafele? Isa men bota alu to xa yele sanŋo to, alu x'a taxato je ɲa men de, alu si a nato du je wo ɲa in.» 12Wo to, i x'e koppa xa taxa Yerusaleme, xa bo Oliwe kuro dula. Wo kuro nin Yerusaleme man jan; kilometere kilin jaate le mu. 13I sininma Yerusaleme, i dalita xa ke sankansuwo men xono, i dunta non. I moxo men tunnu mu, wolu fele: Piyere, Yaya, Yaxuba, Andere, Filipe, Tomasi, Baratelemi, Macu, Alife dinxe Yaxuba, Seloti Simon anin Yaxuba dinxe Yudasi. 14I bee xanbenninŋo tun s'i ɲoxo tara tuma wo tuma, xa Ala matara, i nin muso dolu, i nin Isa na Mariyama, anin Isa badinxelu. 15Wo lunŋolu, lannayabaxolu moxo keme nin muxan ɲoxon tun be kamarinin. Piyere wulita x'é lo i temo to, x'a fo i ɲen xo: 16«Ń badinŋolu, Ni Senunŋo tun xa men fo Kitaabo to, waajibo le tun mu wo xa ke. Ni Senunŋo tun xumata mansaxe Dawuda da la, xa Yudasi la kuwo fo, jannin a xa si. Ate le keta Isa mutabaxolu ɲalo ti. 17Yudasi tun mu n do le ti, a x'a nidula soto n na baaro to. 18A xa fuuto do san a la ku jaxo sara to. Wo xo, a lota a kunŋo da, a xono farata, x'a nuxolu bee sari. 19Yerusaleme moxolu bee xa wo lon. I xa wo fuuto toxola i fannu la xanŋo to xo “Hakelidama”. Wo xoto xo: “Jelu fuuto”. 20A be safenin Jaburu kitaabo xono xo: “A la luwo xa ke tunbunŋo ti. Moxo si xana sigi je tugun.” Anin xo: “Moxo xote xa bula a no to wo baaro to.” 21Wo le x'a tu, moxo do xa xan xa kafu ntelu ma, men keta Marigi Isa kuniyo seedo ti. A xa xan xa ke moxo ti, men xa n nin Marigi Isa dandan tumo bee, x'a tu n tema, kabirin Yaya x'a batise lunŋo men, fo a bota n bata lunŋo men xa taxa sanŋo to.» 23Wo to, lannayabaxolu xa xe fula sugandi: Yusufu men kilita xo Barasabasi walla Yusitusi, a nin Macasi. 24Wo xo, jama xa ɲin tarali in ke xo: «Marigi, ite men xa sondonmekunŋo bee lon, ite fan xa men sugandi ɲinnu fulo to, wo yita n na, 25walasa a xa ke kiladinŋo ti Yudasi no to, wo men bota kiladinɲa la, xa taxa dula, a nin dula men xa xan.» 26Wo to, i xa dokkolo ke, dokkolo xa Macasi yita. Wo woman in kafuta kiladin tan nin kilinŋo ma.

will be added

X\