3 YAYA 1

1Nte Moxoba le xa ɲin safe in ke x'a ki ń xanunte Gayusi ma, ń be men xanula tonɲa la. 2Ń xanunte, ń b'a fe í la kuwo bee xa ben, í kendeyaninŋo xa tu balasubo la, í xo í be ɲa men lannaya silo la. 3Badinŋo dolu nata jan; í mu xantigo ti ɲa men tonɲa to, anin í be í taxamala wo silo xan ɲa men, i xa wo fo ń ɲen. Wo xumo diyata nte ɲen kujaxu. 4X'a me xo ń dinŋolu be tonɲa silo taxamala, fusi man di nte ɲen xa wo bo. 5Ń xanunte, í be fen wo fen kela badinŋolu ɲen, haali badin luntanŋolu, í be wo bee kexan xantigiya le to. 6Wolu xa í la xanuya seedeya Ala la jama ɲen jan. I be nala taxamo men kela, nin í x'e deema wo kuwo to x'a ben Ala sago ma, wo si ben bete. 7Bawo i be taxamo men na, i be wo la Kirisita le toxo ɲen, i man son lannayabalolu la deemalo ma. 8Wo to, ntelu xanta xa wo ɲoxon moxolu deema, walasa n dulu xa lodula ta tonɲa fo to. 9Ń xa xuma dantalu safe x'e ki Ala la jama ma. Bari Diyoterefu men be ɲamoxoya ŋininna, wo nte sonna xa n jigiya. 10Wo le x'a tu, nin nte sita je, a be ku jaxo mennu kela, xa xuma jaxolu fo n ma, xa faniya tege x'a la n na, nte si a lalon wolu la: Bari wo doron nte, badinŋo mennu be nala, a nte sonna wolu xa jigi a bata, anin mennu b'a fe x'e jigiya, a si wo dulu bali, anin x'e xoyi x'e labo Ala la jama xono. 11Ń xanunte, í xana jaxumankelalu ladigi, bari kubetekelalu ladigi. Moxo men be ku ɲuma kela, wo mu Ala la moxo le ti, bari moxo wo moxo be tula ku jaxo kela, wo man Ala lon. 12Moxo bee be Demetiriyusi toxo dimanŋo fola. A bosilo men be tonɲa xan du be a seedeyala. Nte dulu be a toxo dimanŋo fola, í x'a lon xo wo seedeya mu tonɲa le ti. 13Xuma kiika be ń ma x'a fo í ɲen, bari ń nte a fe xa wolu safe. 14Nte hakilo b'a ma xo dondin ń s'í je. Wo to, ń fan nin alu si xuma da nin da. 15Heero xa ke í fe. Í xanuntelu be í xontonna. N xanuntelu kilin wo kilin xonton.

will be added

X\