2 TIMOTE 3

1Í hakilo xa tu a la xo duniya laban tumo, waxati xolenŋolu si ke. 2Moxolu s'i fannu kilin na nafa ŋinin, xa ke xaalisi kunte nin wasubaxantelu nin fanbunɲalalu ti. I si Ala toxo tiɲa, xa muruti i wulubaxolu ma. I si ke fisiriwalo ti, xa Alakuwo bee toxosi. 3I si ke moxo sondonme xolenŋolu nin hinnabalolu ti, anin moxo toxotiɲalalu nin fanmutabalolu nin masiibemoxolu. I nte ɲuma si fe. 4I si ke janfantelu nin jusu tarinŋolu nin fankekutolu ti. I diyanɲekuwolu si diya i ɲen Ala ti. 5I s'i fannu ke Alaɲasilanɲabaxolu ti moxolu ɲala, x'a tara i nte a ti i jusukunŋo la. Í soobo wo moxo sifalu la. 6I dolu si dun luwolu xono, xa musu hakilidoxonŋo dolu bula i la jala xono, junubo kiika be mennu la, anin nege sifa bee be mennu la. 7Wo musolu be lonŋo ŋininna tuma bee, bari i nte tonɲa jela. 8Janesi nin Janbere xa kila Musa sooso ɲa men, ɲin moxo in dulu si tonɲa sooso ten. Moxo hakili tiɲaninŋo lelu mu. I la lannaya mu fuwo le ti. 9Bari i me taxa dulajan, bawo moxo bee s'i la hakilintanɲa je, í xo Janesi nin Janbere. 10Bari ite ken tuta ń xo, xa ń na xaranŋo muta, xa ń bosilo ta, x'a lo ń miiriyalu nofe, xa ń na lannaya ɲoxon ke, xa ń na sabaro nin ń na xanuya nin ń na timinadiya ɲoxon ke. 11Í tuta ń nofe ń na toorolu nin ń na segelu dulu xono, fen fen xa ń soto Antiyosi nin Ikone nin Lisitere. Tooro joman be je nin a man la ń xan? Bari Marigi xa ń bo a bee xono. 12Moxo wo moxo fan b'a fe xa í taxama Ala sago ma, Isa Kirisita kafuɲoxoya xono, wolu bee si tooro soto. 13Bari moxo jaxolu nin nanbarantelu si taxa ɲa jaxuya to. I si moxo dolu lafili. I fannu be filo xono xa ban. 14Ite ken xaranta kuwo mennu la, nin í x'e muta lannaya to, í jija wolu xana í soto í la. Mennu x'é laxaran wo kuwolu la, í fan xa wo tigolu lon. 15Kabirin í dindinma, í xa Kitaabo xuma senumanŋolu lon, i si sin no xa hakilitigiya di í ma nin í si kisi, bawo í xa lannaya ke Isa Kirisita la. 16Ala le xa Kitaabo xonoxumolu bee fo a safebaxolu ɲen. Nafa be wo xumolu la, xa moxolu laxaran, x'e lason, x'e latilin, x'e xulu tilinninɲa silo xan, 17walasa Ala la moxo xa ke moxo dafaninŋo ti, xa toben kewale ɲuma bee ko xanma.

will be added

X\