2 TIMOTE 2

1Ń din, neemo men be n ɲen Isa Kirisita kafuɲoxoya to, í barako ŋinin wo neemo to. 2Í xa men me nte la seede kiika ɲala, wo xarifa lannayamoxo dolu ma, mennu fannu si sin no xa moxo xotelu laxaran wolu ma. 3Í nidula tooro ta, í xo Isa Kirisita la sorodasi ɲuma. 4Sorodasi nte hanmela duniya kuwolu la, nin a b'a fe a la kuwo xa diya a kuntigo ɲen. 5Moxo mennu be ɲoxodanboro kela, wolu xa xan xa i bori boro sariya la, nin wo nte, i me kunnawulijala soto. 6Senekela men be segela, wo folo le xa xan x'a niyo soto senefenŋo to. 7Nte be men fola í ɲen, í miiri bete wo ma. Ń x'a lon xo Marigi fan si hakilo di í ma xa wo bee faamu. 8Í hakilo xa tu Isa Kirisita kun, mansaxe Dawuda mamarinŋo. A kunita xa bo furelu to, í xo xibaru Dimanŋo x'a fo ɲa men. Nte be wo Xibaru Dimanŋo le foxan. 9Wo Xibaru Dimanŋo nofe, nte be tooronin, xa ń siti joloxo la, í xo nin ń mu kujaxukela le ti. Bari Ala la xumo nte sitinin de! 10Wo le x'a tu, nte be kuwo bee muɲala Ala la moxo sugandininŋolu koso, walasa i dulu xa kisi Isa Kirisita kafuɲoxoya xanma, xa nooro banbalo soto. 11Ɲin xuma in mu tonɲa le ti xo: «Nin n nin Kirisita sata i ɲoxo fe, n nin a si nilamaya i ɲoxo fe du. 12Nin n x'e timinadiya xa tu lannaya la fo a labanŋo, n nin a si sigi mansaya la i ɲoxo fe. Nin n x'e bo a la, a du si í bo n na. 13Nin ntelu man ke xantigi ti, ate si tu xantigo ti, bawo a me a fan sooso no.» 14Í xa moxolu hakilo lajigi wo kuwolu la, x'a fo x'a xoleya i ma Ala ɲala xo i xana soosoli ke xuma to. Wo nte fen ɲanna, fo x'e mebaxolu lafili doron. 15Í jija baaro la, fo í xa Ala la toxo dimanŋo soto. Í la baaro ke x'a ben; fe xana je a la, men si a tu í xa malu. Ala la tonɲa waajulo ke tilinninɲa to. 16Í fan tanga xumakuntanfo ma, mennu nin Alasilo me ben, bawo i fobaxolu b'e soobola le Ala la xa taxa a fe. 17I la xaranŋo be le í xo telo men be moxo subo ɲimila. Himene nin Filete mu wo moxo dolu ti. 18Wolu x'e jenge, x'e soobo tonɲa la. I xo, xo furekuniyo keta xa ban. I xa moxo dolu la lannaya tiɲa. 19Wo bee nin a ta, Ala fan xa jusigilanŋo mennu sigi, wolu si tu je. Ɲin xuma innu safeta wo kuwo to xo: «Marigi fan x'a talu lon», anin xo: «Moxo wo moxo be Marigi toxo kilila, wo x'é soobo tilinbaliyakuwolu la.» 20Bunba xono miranŋolu nte sano nin xaalisixoyo doron ti, dolu si tara je mennu be daranin yiro nin banxo du la. Miranŋo mennu da xa xole, wolu be je lunbalu xanma, tolu be je lun gansanŋolu xanma. 21Nin moxo do x'é senuya wo ku jaxolu bee ma, wo tigo si ke baara ɲumakemiranŋo ti; a keta Ala ta ti, xa senuya. A si ke maakuɲanmiranŋo ti a Marigi ɲen. A be tobennin baara ɲuma bee xanma. 22Í bori xamarindinɲa nege jaxolu ma. Mennu be Marigi tarala xa i jusukunŋo senumanŋo tu, í nin wolu xa tilinninɲa nin lannaya nin xanuya nin heero ŋinin i ɲoxo fe. 23Í ban hakilintanŋolu la soosoli fuwolu ma. Í x'a lon xo wolu be nala kelo le tila. 24Marigi la jonŋo dun man xan xa kele ke. A xa xan xa ke moxo ɲuma ti bee ma, a xa sin moxolaxaranŋo la, xa muɲa. 25Mennu b'a la xumo soosola, a xa xan xa wolu xaran sabaro to. Jon x'a lon fo Ala si tuubijuso dun wolu xono, walasa i xa tonɲa lon, 26xa hakili soto, xa bo Sentane la kalanŋo da, wo men tun xa i muta xa i bula a sago kela?

will be added

X\