2 TIMOTE 1

1Nte Poli le xa ɲin safe in ke. Ń keta Isa Kirisita la kiladinŋo ti, x'a la Ala sago xan. Ala xa ń bula xumala nilamaya xan, nilamaya men be sotola Isa Kirisita la kafuɲoxoya xono. A tun xa wo lahido ta n ɲen. 2Timote, ń dinxe xanuninŋo, nte le be ɲin safe in kila í ma. Fa Ala anin n Marigi Isa Kirisita xa neemo nin hinno nin heero di í ma. 3Ń be barako bulala Ala ɲen, ń jusukunŋo senuyaninŋo be baaro la men ɲen, í xo n mamaxelu x'a ke ɲa men. Su nin tili, ń nte ŋinala í kun ń na Alamataralu to. 4Ń hakilo be í la ɲajiyolu kun. A xa di ń ɲen bete x'é je tugun, walasa ń xa ɲaɲa bete. 5Nte hakilo be í la lannaya soobe la. Wo lannaya ɲoxon tun b'é mamamuso Loyise anin í na Unise la, jannin ite xa lannaya ke. Ń be lanin a la xo wolu la lannaya ɲoxon be í du la. 6Wo xanma, ń be í hakilo lajigila a la xo Ala x'a la solifenŋo men di í ma, ń xa ń bulolu la í xan tumo men, xa Ala matara í ɲen, xana a tu wo xa sa. 7Bawo Ala xa Niyo men di n ma, wo nte silanɲa bulala n xono, bari a be barako nin xanuya nin fanmuto le dila n ma. 8Í xana maluya xa n Marigi la kuwo fo moxolu ɲen. Í xana maluya du xo nte be kaso la a la kuwo to. Bari son í nin nte xa tooro xibaru Dimanŋo nofe, Ala barako la. 9Ate Ala fan ne xa n kisi, xa n kili xa n ke a ta ti. Wo man ke n na kewalolu xanma; a keta a fan na ku lategeninŋo nin a la neemo le xanma. Wo neemo dita n ma Isa Kirisita barako to, jannin duniya xa da. 10N Kisibaxa Isa Kirisita la na xa wo yita saasa. Isa Kirisita xa saya barako ban, xa nilamaya nin sabaliya yita Xibaru Dimanŋo la. 11Wo Xibaru Dimanŋo le xanma, nin nte keta waajulikela nin kiladinŋo nin karanmoxoba ti. 12Wo le x'a tu, nte be ɲin tooro innu muɲala. Nte nte maluyala; bawo nte be lanin men na, nte xa wo tigo lon. Nte be lanin a la, xo a xa men xarifa nte ma, a sinŋo b'a ɲen xa wo mara fo labanŋo lunŋo. 13Nte x'é laxaran xuma senumanŋo mennu la, wolu mara í xono, lannaya nin xanuya to, mennu be sotola Isa Kirisita la kafuɲoxoya to, x'é taxamasinŋo ben wolu ma. 14Xaran ɲuma men xarifata í ma, wo mara Ni Senunŋo barako to, Ni Senunŋo men be siginin n to. 15Í fan x'a lon xo Asi maro lannayabaxolu bee xa nte bula. Fijeli nin Heremojene be wolu xono. 16Ala mu a la hinno kela Onesifore la dinbaya ɲen, bawo a xa ń hakilo lasigi kiika ti. Nte la kasolabulo man a maluya, 17bari kabirin a sita Rome, nin a x'é jija xa ń ŋinin, fo a xa ń je. 18Marigi mu a kela a xa Ala la ɲumaya soto kiito lunŋo. A xa nte maaku kiika men ɲan xa ń tu Efesi, ite fan xa wolu bee lon.

will be added

X\