1 N badinŋolu, jannin n xa xumo dafaxa, n b'a ŋininna alu fe, alu xa Ala matara n ɲen, walasa Marigi la xumo xa jenjen, anin xa bunɲa soto, í xo a xa bunɲa soto atelu bata ɲa men. 2 Alu Ala matara n ɲen, walasa n xa kisi moxo jaxolu masiibo ma, bawo moxo bee nte sonna lannaya ma. 3 Marigi mu xantigo le ti. A si alu sinsin, x'alu kisi Sentane ma. 4 Marigi b'a la xoyiyanin n ma, xo n xa men xoleya alu ma, alu be wo kela, xo alu si taxa ɲa xa wo ke. 5 Marigi x'alu jusukunŋo tilin Ala ma, xo alu x'a xanu anin xa muɲa í xo Kirisita. 6 N badinŋolu, n b'a xoleyala alu ma, Marigi Isa Kirisita toxo la, xo alu x'e soobo n badin salabaxantunŋolu bee la, nin i nte sonna ntelu la folu ma. 7 Alu xa xan xa n nadigi ɲa men, alu fannu xa wo ɲa lon. N man ke salabaxantun ti xa n tu alu bata. 8 N man domolo ke moxo si bata fu; bari n xa baaro ke xa sege, suwo nin tilo, walasa n xana ke alu si ma doni ti. 9 Nin n xa wo ke, a xoto nte don ti xo n tunnu nin domoli man xan alu bata. N xa wo ke le, nin alu si ke n nadigibaxo ti. 10 N be alu bata tumo men, n tunnu xa ɲin yanmaru in di alu ma xo: Nin moxo men nte a fe xa baara ke, wo xana domoli du ke. 11 N be wo fola alu ɲen, bawo n x'a me xo dolu be alu to mennu xa sala. I me son baara ma, fo x'e da dun ŋandi kuwolu to. 12 N b'a fola wo tigolu ɲen, x'a xoleya i ma Marigi Isa Kirisita toxo la, xo i xa baaro ke a ɲa ma, xa balu i fannu la. 13 Bari atelu kennu n badinŋolu, alu xana sege kuɲumako la. 14 N xa men fo safe in xono, nin moxo men man son xa wo ke, alu hakilo xa tu wo tigo la. Alu a sin bo alu la kuwolu to, walasa a xa malu. 15 Bari alu xana a muta alu jaxu ti, bari alu s'a tonben; bawo alu badinŋo le mu. 16 Heeratigi Marigi fan xa heero di alu ma tuma bee, anin ɲa bee ma. Marigi xa ke alu bee fe. 17 Nte Poli fan bulo le xa ɲin xontonni in safe. Ń buluno le je ń na safelu bee to. 18 N Marigi Isa Kirisita la neemo xa ke alu bee fe.
