2 TESALONIKENGOLU 2

1N badinŋolu, fenŋo men mu n Marigi Isa Kirisita la nalikuwo ti, anin n na ɲoxotaro a bata, n be alu tarala xo 2alu hakilo xana ɲaxami tariya xa sila, nin dolu b'a fola xo Marigi la lunŋo sita xa ban. Haali nin do x'a fo xo Ala xo ten, walla waajulilalu x'a fo, walla do x'a safe ntelu toxo la, alu xana la a la. 3Moxo xana alu lafili ɲa si ma, bawo wo lunŋo me na fo moxo kiika xa muruti Ala ma folo, anin fo Sentanemoxo x'é yita folo, nin wo mu halagibaxato ti. 4Alaya be fola fenŋo mennu ma wo, fen fen be batula wo, a si wo bee kele, x'a fan bunɲa xa tanbi wolu bee xan. A si taxa sigi fo Alabatusuba xono, x'a fan yita x'a fo xo ate le mu Ala ti. 5Xa n tu i ɲoxo xan, ń xa wo fo alu ɲen. Alu hakilo nte a la ba? 6Fenŋo men b'a balinin saasa x'é yita jannin a la waxato xa si, alu xa wo lon. 7Bawo Sentanemoxo be baaro la dibo to xa ban, bari men b'a tomutanin saasa, nin wo man taxa xa bo je, wo kuwolu me ke. 8Bari nin wo taxata, Sentanemoxo s'í yita; bari Marigi Isa si wo jani a dafoɲo la, x'a halagi a la na nooro fe. 9Sentanemoxo nin Sentane barako le be nala. A si kawakuwo nin taagumanseedo nin kuba sifa bee ke, xa moxolu lafili. 10A si ku jaxo sifa bee do ke, walasa xa halagibaxatolu lafili. Wolu si halagi, bawo i man son xa tonɲa muta x'a xanu, wo men tun s'i kisi. 11Wo xanma, Ala be barako lajigila i xan, men s'i lafili x'e bula lala faniya la, 12walasa moxo wo moxo man la tonɲa la, fo xa tilinbaliya le xanu, kiito xa tege wolu xan. 13N badinŋolu anin Marigi la xanuninŋolu, ntelu kennu xa xan xa barako la Ala ɲen tuma bee alu la kuwo xanma, bawo kabirin duniya man da nin Ala x'alu sugandi. A x'alu kisi Ni Senunŋo barako la anin lannaya xanma tonɲa la. Wo Ni Senunŋo x'alu ke a ta ti. 14Ala x'alu kili wo kisilo xanma n na xibaru Dimanŋo la, nin alu si Marigi Isa Kirisita nooro soto. 15N badinŋolu, wo xanma, alu i balan. Alu xa tonbenno mennu soto n na xumolu walla n na safe xono, alu wolu muta bete. 16N Marigi Isa Kirisita fan, anin N Fa Ala men xa n xanu, xa hakililasigi banbalo nin gigi beto di n ma a la neemo barako to, 17wo x'alu jusudun, xa barako di alu ma xa ku beto bee ke, kewalolu nin xumolu la.

will be added

X\