2 TESALONIKENGOLU 1

1Nte Poli nin Silifen anin Timote le be ɲin safe in kila n Fa Ala nin Marigi Isa Kirisita la jama ma Tesalonike. 2N Fa Ala nin Marigi Isa Kirisita xa neemo nin heero di alu ma. 3N badinŋolu, n xa xan xa barako la Ala ɲen tuma bee, alu la kuwo la. A be bennin bete n xa wo ke, bawo alu be taxala ɲa lannaya to, anin du do be kafula alu la ɲoxoxano ma xa taxa a fe. 4Wo keta ntelu kunxotota kunŋo ti Ala la jama ɲala dula tolu, bawo haali x'a tu moxolu be alu toorola, x'alu ɲaani, alu muɲata xa lannaya ke. 5Wo b'a yitala xo Ala si kiiti tilinninŋo tege moxolu xan. Alu be toorola wo ɲa ma, walasa alu xa xan Ala la Mansaya soto ti. 6Tonɲa, Ala bulu, a be tilinnin x'alu toorobaxolu sara tooro la. 7Anin du, atelu mennu be tooronin, a si daho di atelu nin ntelu ma, nin Marigi Isa nin a la meleke barakemalu nata lunŋo men xa bo sanŋo to. 8N Marigi Isa s'i yita tamano to, walasa xa Alalonbalolu ɲangi anin mennu man son a la xibaru Dimanŋo ma. 9Wolu la ɲangilo si ke halagili banbalo ti. I nin Marigi te si janɲa; i ɲa me la a la sintigiya nooroma xan. 10Wo si ke Marigi nalunŋo. Marigi si na wo lunba, walasa a la moxo senumanŋolu mennu be lanin a la, wolu x'a tantu x'a jagi. Atelu kennu mu wolu do lelu ti, bawo alu lata n na seedeyalo la Isa la kuwo to. 11Wo le x'a tu, n be Ala matarala alu ɲen tuma bee. N b'a ŋininna n na Ala la, a x'alu deema, walasa a x'alu kili nilamaya men xanma, alu xa xan wo ti. N b'a tarala du a xa barako di alu ma, walasa ku beto mennu xa di alu ɲen x'e ke, anin alu b'a fe xa baaro men ke lannaya la, alu xa sin xa wolu dafa. 12Wo ɲa ma, n Marigi Isa toxo si bunɲa alu la kuwo xanma, anin alu dulu si bunɲa ate la kuwo xanma, n na Ala anin Marigi Isa Kirisita la neemo barako to.

will be added

X\