1 Ń badin xanuninŋolu, ɲin mu ń na safe fulananŋo le ti xa ban, ń xa men ki alu ma. I do wo do to, ń keta a fe miiriya senunŋolu xa ke alu la, ń na hakililajigolu bee fe. 2 Nte b'a fe kila senumanŋolu xa xumo mennu fo xotonin, alu hakilo xa jigi wolu la, anin Marigi nin Kisibaxo la sariya la, alu la kiladinŋolu xa mennu lasi alu ma. 3 Alu a lon folo xo duniya labanŋo lunŋolu, moxo dolu si bo mennu be i taxamala i nidiyanɲolu la. I si alu ke jelefenŋo ti. 4 I s'a fo xo: «Xo di a man lahido ta le xo a be nala? Awa, a dun be min? Bawo kabirin mamolu sa tumo, kuwo bee b'a ɲa ma í xo duniya damuto.» 5 Wolu be i fannu laŋinala a kun xo kabirin waxati jan, Ala xa sanxulo nin duguxulo da a la xumo fe. Duguxulo talata xa bo jiyo ma, xa dara jiyo fe. 6 Wo ji kilinŋo le fe, nin wo mu waameba jiyo ti, nin duniya folo halagita. 7 Men mu ɲin sanxulu in nin ɲin duguxulu in ti, wo xuma kilinŋo le b'e lamaranin ta ɲa. A b'e lamaranin kiito anin Alaɲasilanɲabalolu halagi lunŋo ɲa. 8 Bari ń badin xanuninŋolu, fen do be je, alu man xan xa ŋina men kun: Marigi bulu, tili kilin be le í xo wulu san, anin wulu san be le í xo tili kilin. 9 Marigi xa lahido men ta, a nte mela x'a tara a man wo latimme, í xo dolu b'a miirila ɲa men. Bari a be muɲanin alu xoto le, bawo a nte a fe moxo si xa halagi; bari a b'a fe le bee xa tuubi. 10 Marigi la lunŋo be nala le í xo sunŋo. Wo lunŋo, sanxulo si sanko mankanba to. Sanxulo fenŋolu bee si jani ta fe, duguxulo nin a xan fenŋolu bee si ban. 11 Awa, nin wo fenŋolu bee be nala banna ten, wo tuma alu xanta xa men ke, alu wo lon. Alu taxamaɲa xa xan xa ke senuya to, anin alu xa xan xa do kafu alu la Alaɲasilanɲa ma. 12 Alu xa xan xa Ala la lunŋo laxono, x'alu sinkuwo bee ke walasa a xa na junna. Wo lunŋo le mu nin ta be sanxulo janila, anin sanxulo fenŋolu si xolen tafuntano bulu. 13 N be sanxulu kuto nin duguxulu kuto laxononin í xo Ala xa wo lahido ta ɲa men, tilinninɲa si sigi non. 14 Wo le x'a tu, ń badin xanuninŋolu, x'alu tu wo lunŋo laxononin, alu i jija, walasa alu senumanŋo jalagibalo xa tara a ɲa xoto, heero to. 15 Alu a jaate xo Marigi la muɲo kunŋo mu le walasa alu xa kisi, í xo n badinxe xanuninŋo Poli x'a fo alu ɲen, a la safe to ɲa men, x'a la Ala la hakilitigiya dininŋo ti a ma. 16 A be wo xumo le fola safelu bee to, a xumata ɲin ku in xan mennu to. Wo safelu dulalu dolu xa xole x'e faamu, fo moxo kulonbalolu nin basigibalolu b'e xotolu yelemala, í xo i be Kitaabo dula xote dulu kela ɲa men. Wo ɲa ma, i be halagilo lasila i fannu ma. 17 Atelu kennu, ń badin xanuninŋolu, alu lasobininŋo le mu. Wo to alu i korosi, alu xana Alaɲasilanɲabalolu ladigi, wo mennu be filixan, anin alu xana son alu xa labo alu lodula sinsinninŋo xan. 18 Bari alu taxa ɲa n Marigi anin n Kisibaxa Isa Kirisita la neemo nin a lonŋo to. Nooro xa la ate xan kabirin saasa fo abada. Amiini.
