2 PIYERE 2

1Kila fanolu keta Banisirayila dinŋolu to xotonin, wo ɲa ma, karanmoxo fanolu si ke alu dulu to. I si xaransila fuwolu mundin nadun alu to. I si i bo Kuntigo la, wo men x'e kunbo, xa halagilo lasi i fannu ma tariya. 2Moxo kiika si a lo i nofe x'e la ku noxoninŋolu ɲoxonnu ke. Xumajaxo si fo tonɲa silo ma. 3Wo karanmoxo fanolu la natantunɲa xanma, i si alu domo nanbara xumolu la. Bari kabirin waxati jan nin wo moxolu la kiito lategeta xa ban, i la halagilo nte nala mela bitugun. 4Bawo melekiyo mennu xa junubo ke, Ala man wolu tu je, bari a x'e fili jahanaba, xa joloxo ke i la x'e mara dibo to non, xa kiito lunŋo laxono. 5A man duniya folo du tu je, bari a nata waameba ti wo Alaɲasilanɲabali duniya xan. A xa Nuhun ne kisi, wo men tun be waajulo kela tilinninɲa xan, anin moxo woorowula xotelu. 6A xa Sodome nin Gomore gallolu jalagi x'e halagi ta fe, xa wo ke misaali ti x'a di Alaɲasilanɲabali natalu ma. 7Bari a xa Lote kisi, wo men tun mu moxo tilinninŋo ti. Wo kujaxukela jadolu tunnu la nilamaya keɲa xa wo tooro bete. 8Bawo wo moxo tilinninŋo men tun b'e to, wo ɲa nin a tulo tun be i la lun wo lunŋo ketalu la. I la nilamaya noxoninŋo tun be a jusukun tilinninŋo toorola. 9Wo to, Marigi x'a ɲasilanɲabaxolu boɲa lon tooro xono, anin a xa kujaxukelalu lamaraɲa lon walasa x'e ɲangi kiito tegelunŋo. 10Mennu be a lola i nidiyanɲeku noxoninŋolu nofe, xa Ala la Marigiya mafele fuwo ti, wo lelu la ɲangilo be jaxuyala. Wo karanmoxo fanolu be lanin i fannu la, i la xumolu xa jaxu, i nte silala xa Noorotigolu nani. 11Haali x'a tara melekiyolu mennu fango nin i la sintigiya xa bun bete, wolu nte i jalagila x'e nani Marigi ɲa xoto. 12Bari wo moxolu kennu be le í xo wulaxonosubu hakilintanŋolu, mennu be danin mutalo nin tolilo xanma. I man men lon, i be wo nanila. I si toli í xo subolu be tolila ɲa men. 13I si sara i la kujaxu keninŋolu bee la. I be i diyanɲo sotola i nidiyanɲekuwolu kelo to, tiliya to. I mu noxo nin ɲagamo lelu ti, i be i diyanɲekuwolu kela alu lafililo ti, nin i nin alu be kafula xa domolibalu ke. 14Jadoya be lanin i ɲakeso xan, i nte fala junubeko la. I be hakilidoxonŋolu neenela x'e lafili. Wasabaliya bandeero b'e bulu, moxo danganinŋo lelu mu. 15I xa sila tilinninŋo bula. I filita x'a lo Bosore dinxe Balamu la silo nofe. Wo keta xaaliso fe, men dita a ma kujaxuko xanma. 16Bari xumo keta a ɲen a la soosolo koso. Falimusu damuntunmafenŋo xumata a ɲen í xo hadamadinŋo, xa dansigi ke kila la hakilintanɲa la. 17Wo moxolu be le í xo jiwoyo mennu jata, anin í xo xabolu, foɲoba be taxaxan mennu tila. Dibiba le be i laxononin. 18I be xumabatoxulunŋo lelu fola. Mennu birin bola moxo filininŋolu bulu, i be wolu neenela nidiyanɲeku noxoninŋolu la. 19I be hooroyalo lahido tanin wolu ɲen, x'a tara i fannu be tolininɲa la jonɲa xono, bawo fenŋo men be sinŋo sotonin í xan, í mu wo la jonŋo le ti. 20Awa, mennu bota duniya ku noxoninŋolu xono, n Marigi anin n Kisibaxa Isa Kirisita lonŋo koso, nin wo kuwolu xa wolu muta tugun, xa sinŋo soto i xan, i keɲa labanŋo si jaxuya xa tanbi i folo keɲa xan. 21Nin wo tunnu man tilinninɲa silo lon, wo le tun xa fisa i ma a lonŋo ti, wo xo xa saaginin i xodila sariya senunŋo la, men dita i ma. 22Sando men be fola xo: «Wulo xa men foono, a x'é koppa wo ma,» anin xo: «Lemuso men birin í kula, wo taxata í birigintin booxo to tugun.» Wo keta tonɲa ti i la kuwo to.

will be added

X\