2 PIYERE 1

1Nte Simon Piyere le xa ɲin safe in ke, nte men mu Isa Kirisita la jonŋo nin a la kiladinŋo ti. Ń b'a kila moxolu ma, mennu xa n na lannaya nafamaba ɲoxon soto, n na Ala nin n Kisibaxa Isa Kirisita la tilinninɲa barako to. 2Neemo nin heero xa ke alu ɲen fo xa fuuma, Ala anin n Marigi Isa lonniya soobe fe. 3N maakuwo be fen wo fen na nilamaya nin Alaɲasilanɲa xanma, Marigi xa wo bee di n ma a la sintigiya la, men bota Ala la. Men xa n kili xo n xa dun a fan na nooro nin a la ɲumaya xono, a xa wo lonŋo di n ma. 4Wo ɲa le ma, nin a xa fen nafamabalu nin ɲalamalu di n ma, a tun xa mennu lahido ta, walasa wolu soto fe, alu xa sin xa kisi duniya negolu ma, mennu be moxo halagila, anin alu xa sin xa Ala keɲa ta. 5Wo le x'a tu, alu i balan bete xa ɲumaya kafu alu la lannaya ma, xa lonŋo kafu ɲumaya ma, 6xa fanmuto kafu lonŋo ma, xa muɲo kafu fanmuto ma, xa Alaɲasilanɲa kafu muɲo ma, 7xa badinxano kafu Alaɲasilanɲa ma, xa xanuya kafu badinxano ma. 8Bawo nin wo jigo betolu be alu la, anin nin i keta alu la xa fuuma, i me alu tu baarabalo nin nafakebalo ti n Marigi Isa Kirisita lonŋo to. 9Bari wolu nte moxo men na, wo mu fiyonto le ti, a la jeta xa sutu. A be ŋinanin xo a xa junubo mennu ke xotonin, a senuyata xa bo wolu xono. 10Wo le x'a tu, ń badinŋolu, alu kiika kafu alu la jijalo ma walasa x'alu la kililo nin alu la sugandilo sinsin. Nin alu be wo kela, alu me boyi abada. 11Wo ɲa le ma, nin n Marigi anin n Kisibaxa Isa Kirisita la Mansaya banbalo si dayele alu ɲen a ɲa ma. 12Wo le x'a tu, nte si tu x'alu hakilo lajigi wo kuwolu la tuma bee, haali x'a tara alu x'e lon xa ban, anin alu xa tonɲa men soto, alu be sinsinnin wo xan. 13Bari nte b'a miirila xo xa nte tu ɲin bala sata in to, a xa ɲin nte x'alu tu i ɲala ń na hakililajigi xumolu fe. 14Bawo nte x'a lon xo dondin, nte si bo ɲin bala sata in to, í xo n Marigi Isa Kirisita x'a yita ń na ɲa men. 15Wo to, nte si ń jija bete walasa haali nte sa xo, alu xa sin x'alu hakilo lajigi ɲin ku innu la tuma bee. 16Awa, n Marigi Isa Kirisita be nala sintigiya men to, n man wo fo alu ɲen xa n gigo tu lanin hadamadinŋolu la taali daraninŋolu xan. Bari n fan nelu ɲa x'a je a la nooroba xono. 17Bawo a xa bunɲa nin nooro soto n Fa Ala la tumo men, ɲin xumaxan in bota Ala nooro maɲoxonjebalo la x'a fo a ɲen xo: «Ɲin mu ń Dinxe baato le ti, men na kuwo xa di bete nte ɲen.» 18Ntelu fannu xa wo xumaxanŋo me xa bo sanŋo to, xa n nin a tu kuru senumanŋo xan. 19Wo ɲa ma, n be tolala bete kilalu la xumo la. Nin alu xa i hakilo tu wo la, wo xa ɲin: Wo xumo be le í xo lanpo men be manala dibo to, jannin saxo xa yele, anin jannin saxuyelenda la loolo xa keneya bo alu jusukunŋolu la. 20Alu a lon folo xo moxo si me Kitaabo kilayaxumo do xoto lon no a fan ɲen. 21Bawo hadamadinŋo sago bada man kilayaxuma sabaabu, bari Ni Senunŋo le xa moxolu bula xumala Ala la xan to.

will be added

X\