2 YAYA 1

1Nte Moxoba le xa ɲin safe in ke x'a ki Ala la Musu sugandininŋo nin a dinŋolu ma, nte be mennu xanula tonɲa la. Nte kilin doron nte alu xanula, bari fen wo fen xa tonɲa lon, wolu dulu bee le be alu xanula. 2Tonɲa men be tunin n na, xa ke n fe fo abada, nte be alu xanula wo tonɲa koso. 3N Fa Ala nin Isa Kirisita, nin wo mu n Fa Dinxe ti, wo xa neemo nin hinno nin heero di n ma, walasa n xa tu tonɲa nin xanuya silo xan. 4Nte x'a tara í dinŋolu dolu be tonɲa silo taxamala í xo n Fa Ala la sariya x'a fo n ɲen ɲa men. Wo diyata nte ɲen kujaxu. 5Awa saasa, Musu sugandininŋo, nte b'a ŋininna í fe xo: Alan x'e ɲoxo xanu. Nte be men safela x'a ki í ma, wo nte sariya kuta ti, n xa sariya men soto kabirin folofolo, wo le mu. 6Xanuya mu men ti, wo fele: Xa Ala la sariyalu silo taxama. Alu xa wo sariya le me kabirin folofolo, walasa alu xa wo silo taxama. 7Moxolafilila kiika jenjenta duniya xono, wo lelu nte sonna xa la a la xo Isa Kirisita keta moxo ti. Wo ɲoxon moxo le mu moxolafilila ti anin Kirisita Jaxo. 8Wo to, al'alu fannu korosi, walasa n xa baaro men ke, alu xana bono wo to, bari alu xa baraaji dafaninŋo soto. 9Moxo wo moxo be taxala ɲa xa tanbi Kirisita la xaranŋo xan, Ala nte wo tigo to. Moxo men be tula Kirisita la xaranŋo xan, n Fa Ala nin a Dinxe be wo tigo to. 10Nin moxo wo moxo nin xaran xote nata alu bata, men nte Kirisita la xaranŋo ti, alu xana a jigiya alu bata, alu xana son xa haali a xonton. 11Bawo men je a xonton a bata, a be le í xo wo nin a be kafunin a la baara jaxolu la. 12Xuma kiika be ń ma x'a fo alu ɲen, bari ń nte a fe xa wolu bee safe. Bawo nte hakilo be a ma xa taxa alu bata, ń fan nin alu xa xuma da nin da, walasa n na ɲaɲo xa dafa. 13Í Badinmusu sugandininŋo du dinŋolu be í xontonna.

will be added

X\